65
Kuaꞌa javii javaꞌa saꞌa ia Dios te na vi chiñuꞌo ya
Yaa ni tee David
1 Ndee Sión ka saꞌa kaꞌnu ña san jin ni, vi Dios,
te nuu maa ni vi skunkuu san tnoꞌo ni ka kee yuꞌu san.
2 Chi nini maa ni tnoꞌo ka kaꞌan san nuu ka ndakuatu san,
te nuu maa ni vajikuei ndiꞌi ñayiu ñuyiu.
3 Te nuu kundee jakueꞌe ja skuita ña jin san, te jakuei san nuu ni,
te maa ni, chi jakaꞌnu ini ni yika kuechi ka saꞌa san.
4 Na taꞌu na ndetu ñayiu ni kaji maa ni vi jaka ni jin ja vi koo yatni nuu oo ni,
nagua ja na vi koi nuu veꞌe ii ni.
Saa te vi konevaꞌa san ndiꞌi jaguaꞌa vi javii oo nuu veñuꞌu ni.
5 Maa ni, vi Dios, kuu ia skaku niꞌnu ña, chi nini ni tnoꞌo ka ndakuatu san nuu ni,
te saꞌa ni tniuu vii ndevaꞌa ja saꞌa ndaa ni.
Te ndiꞌi ñayiu ñuyiu ka kukanu ini ña jin ni,
te suni ndiꞌi ñayiu ka oo ndee jika ka yuꞌu ndute mar ka kukanu ini ña.
6 Te ni jani yutnu maa ni yuku naꞌnu jin jakaꞌnu ni,
chi ia ndakui kuu ni.
7 Te maa ni junkani ja ka kañu xeen ndute mar vi ja jiso ndevaꞌa kagua tnaꞌa nuu de,
vi ja ka saꞌa niꞌi ka saꞌa ioo ñayiu ndiꞌi ñuu.
8 Te yun kuu ja ka yuꞌu ñayiu ka oo ninii ñuyiu tniuu vii tniuu vaꞌa saꞌa ni,
te saꞌa maa ni ja ka kana ñayiu ka oo ichi nuu jinonta nikandii vi ichi nuu makee ja ka kusii ini.
9 Te jito maa ni ñundeꞌi, te skuun ni sau ja joso ni,
te saꞌa ni ja vii ndevaꞌa kuvaꞌa.
Te ñuꞌu chitu ndute yute maa ni, vi Dios, te saꞌa tuaꞌa ni ñundeꞌi,
nagua ja vi kuaꞌnu vii triu.
10 Te joso guaꞌa ni ja vi ndee kiundoꞌo ndute nuu yukun vi skuechi ni tiꞌvi,
vi skuun ni sau ja nduu vita ñundeꞌi, vi saꞌa vii saꞌa vaꞌa ni ja kee nuu ñundeꞌi yun.
11 Te saꞌa vii saꞌa vaꞌa ni in in kuia,
te ndee nuu viko, skuun vii ndevaꞌa ni sau.
12 Te vi ndee vivii kuii ka oo ite nuu ñuꞌu teꞌa,
te vi ndee sii ini sii ini ka oo tinduu.
13 Te vi ninii nuu yoso ka ñuꞌu chitu ndikachi,
te ninii chikoꞌi kaa triu,
te ndiꞌi ka jita vi ka kana ja ka kusii ini.