3
Vi kakantaꞌuo nuu ia Dios ja na chituu ña ya
Yaa ni tee David nuu ni jino yuꞌu de nuu seyii de Absalón
1 Kuakuaꞌa ñayiu ka kaꞌan uꞌu ña jin san, vi Jitoꞌo san.
Kuakuaꞌa ñayiu ka ndakoo siki san.
2 Te kuaꞌa ñayiu ka kaꞌan ndee ña jin san, te ka kachi:
“Ma skaku niꞌnu ña ia Dios jin de”.
3 Su maa ni, vi Jitoꞌo san, kuu ni na kuinio kaa tikute ja tavaꞌa ña ni,
te maa ni kuu ia taa jayiñuꞌu nuu san,
vi maa ni kuu ia ndataa tnoꞌo ndee ini.
4 Ni jikantaꞌu san nuu ni ja chituu ña ni, vi Jitoꞌo san,
te ni onini ni ndee yuku ii nuu oo ni.
5 Jinkotuu san, te kixin san, te ndoto tuku san,
chi maa Jitoꞌo jito jini ña jin san.
6 Te ma koyuꞌu san visi kuakuaꞌa ñayiu
ni ka jionduu ña jin san, ja vi saꞌa ñai jakueꞌe.
7 Neꞌe ni, vi Dios, te skaku niꞌnu ña ni,
te kani ni mamaa jiki nuu tee ka kaꞌan uꞌu ña jin san,
te taꞌu ni noꞌo tee ka saꞌa jakueꞌe, vi Jitoꞌo san.
8 Maa ni, vi Jitoꞌo, kuu ia skaku niꞌnu ñayiu,
te tetniuu ni javii javaꞌa ni ja na koo jin ñayiu ñuu ni.