119
Na taꞌu na ndetu ñayiu ka jika nuu ichi ia Dios
1 Na taꞌu na ndetu ñayiu ka jika nuu ichi ndaa,
te ka saꞌi nagua kaxtnoꞌo maa Jitoꞌo.
2 Na taꞌu na ndetu ñayiu ka jantnoꞌo tnoꞌo tatnuni ya,
te vi ni ini ni anui ka ndandukui ia Dios.
3 Te ñayiu yaꞌa, chi tu saꞌun na jakueꞌe ka saꞌi,
chi ka jikai nuu ichi maa ya.
4 Chi ni skuiso siki ña ni tnoꞌo tatnuni ni,
ja na vi skunkuu ndaa kuiti san.
5 Vaa nuu suaꞌa te kuu kaka yutnu san nuu ichi ni,
nagua ja skunkuu san nuu tnoꞌo xtaku ni,
6 te ma kendoo kanoo san, nuu na kuantnoꞌo san ndiꞌi tnoꞌo tatnuni ni.
7 Te saꞌa kaꞌnu ña san jin in anu ndaa san,
nuu na kutuaꞌa san tniuu ndaa ja saꞌa ni.
8 Kuini san ja skunkuu san tnoꞌo tatnuni ni,
te ma xndendoo saꞌun ña ni jin san.
9 ¿Naxa saꞌa in suchi kuechi ja koo vii anui?
Kuini ja saꞌi nagua kaꞌan nuu tnoꞌo ni.
10 Te jin ndiꞌi san jin anu san ndanduku ña san jin ni, vi Dios,
te ma kuandetu ni ja kujioo san nuu tnoꞌo tatnuni ni.
11 Chi ndee ini ndee anu san tavaꞌa san tnoꞌo kaꞌan ni,
nagua ja ma saꞌa san yika kuechi nuu ni.
12 Kaꞌnu ndevaꞌa kuu maa ni, vi Jitoꞌo,
te kaxtnoꞌo ni tnoꞌo ja xtaku ni nuu san.
13 Te jin yuꞌu maa san ndakani san,
ndiꞌi tnoꞌo ni kaꞌan ni ja tatnuni ni.
14 Kusii ini ndevaꞌa ka san ja kaka san nuu ichi nagua tatnuni ni,
masu ja konevaꞌa san ndiꞌi jakuika.
15 Te ndachikuaꞌa san tnoꞌo tatnuni ni,
te kinuu guaꞌa san nuu ichi ni.
16 Te kokuu sii ini san ja saꞌa san nagua xtaku ni nuu san,
te ma ndunaa saꞌun ini san nagua kaꞌan nuu tnoꞌo ni.
17 Saꞌa ni javaꞌa jin san ja jinokuechi san nuu ni, ja na koteku san,
te na kuantnoꞌo san nagua kaꞌan nuu tnoꞌo ni.
18 Kune ni nduchi nuu san, nagua ja na kondiaꞌa san,
ja luu ndevaꞌa kaꞌan nuu tnoꞌo kaxtnoꞌo ni.
19 Chi in ñayiu jikanuu ndaꞌu ni kuu san ñuyiu yaꞌa,
te ma tayuꞌu ni tnoꞌo tatnuni ni nuu san.
20 Te vi ndiꞌi ni ore kuita ndevaꞌa anu san,
ja ndioo ndevaꞌa ini san ja kuni san tnoꞌo ja xtaku ni nuu san.
21 Chi tetniuu ni tnundoꞌo ka tnaꞌa ñayiu ka saꞌa teyii maa,
vi ñayiu ni ka tau tniaꞌa, ja ka kujioo nuu tnoꞌo tatnuni ni.
22 Xtajioo ni ñayiu ka kaneꞌe ña jin san, vi ñayiu ka skexiko ña,
chi jantnoꞌo san tnoꞌo tatnuni ni nuu san.
23 Te visi ka ndatnoꞌo tnaꞌa tee ka tatnuni ja vi saꞌa ña de jakueꞌe jin san,
su maa san ja jinokuechi san nuu ni, chi ndachikuaꞌa san nuu ley ni.
24 Chi kusii ini san jin tnoꞌo tatnuni ni,
te suu kuu tnoꞌo ja xteku ña jin san.
25 Te vi ndee nuu ñuyaka ni ka katuu san, ndataa ni ja na koteku san,
nagua ni kaꞌan ni nuu tnoꞌo ni.
26 Ni xneꞌe san nagua saꞌa san nuu ni, te ni jantaꞌu ni.
Vitna te kaxtnoꞌo ni tnoꞌo ja xtaku ni nuu san.
27 Chituu ña ni ja na jinkuiꞌnu ini san naxa kaꞌan tnoꞌo tatnuni ni,
te na ndachikuaꞌa san tniuu vii ndevaꞌa saꞌa ni.
28 Te vi ja ni kuita saꞌun anu san ja kusuchi ndevaꞌa ini san,
ndasaꞌa yutnu ña ni nuu tnoꞌo ni, nagua ni kee yuꞌu ni.
29 Xtajioo ña ni nuu ichi ka jika ñayiu inu tnoꞌo,
te kaꞌan ndaꞌu kaꞌan kee ña ni ja na kondikin san tnoꞌo kaxtnoꞌo ni nuu san.
30 Chi ni kaji san ichi ndaa ja kaka san,
te ndioo ini san ja kondikin san tnoꞌo ja xtaku ni nuu san.
31 Te kuini san ja kondikin guaguaꞌa san tnoꞌo tatnuni ni, vi Jitoꞌo san,
te ma kuandetu ni ja kendoo kanoo san.
32 Te nduku ndee san ja skunkuu san tnoꞌo tatnuni ni,
chi saꞌa ni ja jinkuiꞌnu guaꞌa ka ini san.
33 Te kaxtnoꞌo ni nuu san, vi Jitoꞌo, ja na kondikin san ichi ja xtaku ni nuu san,
te na kondikin san guaa ndee kiuu sandiꞌi ja koteku san.
34 Taa ni tnoꞌo ndichi ja jinkuiꞌnu ini san, nagua ja tavaꞌa san ley ni,
te skunkuu san ndiꞌi san jin anu san.
35 Te kondeka ña ni ichi nuu tatnuni ni,
chi yun kuu nuu niꞌi san jasii ini ja oo jin san.
36 Saꞌa ni ja na ndioo ini anu san tnoꞌo tatnuni ni,
te masu ja ndioo ini san ja konevaꞌa san ja kuaꞌa ja ioo.
37 Te ma kuandetu ni ja kondiaꞌa san nuu ja tu jiniuꞌu.
Taa ni ja koteku san, nagua ja na kaka san nuu ichi ni.
38 Te skunkuu ni tnoꞌo ni kee yuꞌu ni nuu san,
ja kuu san tee jinokuechi nuu ni, nagua saꞌa ni jin ñayiu ka yuꞌu niꞌnu ña jin ni.
39 Xtajioo ni tnoꞌo kanoo ja ka kaꞌan ñayiu jin san, chi yun kuu ja yuꞌu ka san,
chi oo guaꞌa tnoꞌo ja xtaku ni nuu san.
40 Chi ndioo ini san tnoꞌo tatnuni ni,
te taa ni ja koteku san jin maꞌñu sagua tniuu ndaa ja saꞌa ni.
41 Neꞌe ni, te kaꞌan ndaꞌu kaꞌan kee ña ni jin san, vi Jitoꞌo san.
Skaku niꞌnu ña ni jin san, nagua ni kee yuꞌu ni ja saꞌa ni.
42 Saa te niꞌi san tnoꞌo ja ndajioneꞌe san nuu ñayiu ka skexiko ña jin san,
chi kukanu ini san tnoꞌo kaꞌan ni.
43 Te ni in jichi ma kindee ni tnoꞌo ndaa nuu yuꞌu san,
chi ndetu kaꞌnu san tnoꞌo xtaku ni nuu san.
44 Te nikuii nikani kosaꞌa san nagua kaꞌan nuu tnoꞌo kaxtnoꞌo ni.
45 Saa te tu na in kasi ichi,
chi ni ndanduku san tnoꞌo tatnuni ni.
46 Te kaꞌan san tnoꞌo tatnuni ni nuu tee ka kuu rey,
te ma kukanoo san.
47 Te kusii ini san jin tnoꞌo tatnuni ni,
chi kutoo ndevaꞌa san.
48 Kee yuꞌu san ja skunkuu ndaa san tnoꞌo tatnuni ni, chi kutoo san,
te kuꞌun ini san tnoꞌo ja xtaku ni nuu san.
49 Te ndakaꞌan ni tnoꞌo ni kaꞌan ni nuu san, ja jinokuechi san nuu ni,
chi jin tnoꞌo yun, te ni saꞌa ni ja ndetu kaꞌnu ña san jin ni.
50 Chi tnoꞌo maa ni kuu ja ndataa jasii ini nuu san nuu kusuchi ini san.
Te tnoꞌo ni kee yuꞌu ni, taa ja teku san.
51 Te ka jaku ndee ña ñayiu ka saꞌa teyii ndevaꞌa jin san,
su sein, chi ma kujioo san nuu ley ni.
52 Chi ni ndakaꞌan san tnoꞌo ja xtaku ni nuu san, ndee ja ni kuu nanaꞌa, vi Jitoꞌo san,
te yun ndaniꞌi san jasii ini.
53 Te kiti ini ndevaꞌa san nuu ndiaꞌa san ñayiu kueꞌe,
ja ka kujioo nuu tnoꞌo kaxtnoꞌo ni.
54 Te tnoꞌo ja xtaku ni nuu san kuu yaa
ja jita sii ini san nuu oo san inka ñuu.
55 Te ndakaꞌan ña san jin ni tnoꞌo jakuaa, vi Jitoꞌo san,
chi kuini san ja saꞌa san nagua kaxtnoꞌo ni.
56 Te ni niꞌi san javii javaꞌa,
chi ni jantnoꞌo san tnoꞌo tatnuni ni.
57 Maa ni, vi Jitoꞌo san, kuu in ja kutaꞌu kundetu san,
Te kee yuꞌu san ja saꞌa san nagua kaꞌan nuu tnoꞌo ni.
58 Te ndiꞌi san jin anu san jikantaꞌu san nuu ni.
Kundaꞌu ini ña ni jin san, nagua ni kee yuꞌu ni ja saꞌa ni.
59 Chi ni ndakani ini guaguaꞌa san nagua saꞌa san,
te ni ndajiokuiin san nuu ni, nagua ja skunkuu san tnoꞌo tatnuni ni.
60 Ni onuu ini san, te tu ni okukuee san,
ja saꞌa san nagua tatnuni ni.
61 Ni ka jionduu ña in tnii kaꞌnu ñayiu ka saꞌa jakueꞌe jin san,
su visi ni saa, te tu ndunaa ini san tnoꞌo kaxtnoꞌo ni.
62 Te ndakoo san sau ñuu ja ndakuantaꞌu san nuu ni,
chi oo ndaa tnoꞌo ja xtaku ni nuu san.
63 Te ka ndeka tnaꞌa guaꞌa maa san jin ndiꞌi ñayiu ka yuꞌu niꞌnu ña jin ni,
vi ka jantnoꞌi tnoꞌo tatnuni ni.
64 Te kundaꞌu ini ni ndiꞌi ja oo ñuyiu yaꞌa, vi Jitoꞌo san.
Te kaxtnoꞌo ni nuu san naxa kaꞌan tnoꞌo tatnuni ni.
65 Ni saꞌa ni in javaꞌa jin san ja jinokuechi san nuu ni, vi Jitoꞌo san,
nagua ni kaꞌan ni ja saꞌa ni.
66 Kaxtnoꞌo ni nuu san, ja na kuni san tnoꞌo ndaa, vi na jinkuiꞌnu ini san,
chi kandija san tnoꞌo tatnuni ni.
67 Chi ama ka ja tnaꞌa san tnundoꞌo, te ni ojika ndoñuꞌu san nuu ichi ni,
su vitna, te jantnoꞌo san nagua kaꞌan nuu tnoꞌo ni.
68 Maa ni kuu ia guaꞌa, te saꞌa ni javaꞌa.
Kaxtnoꞌo ni nuu san naxa kaꞌan tnoꞌo tatnuni ni.
69 Chi visi ni ka kaꞌan tnoꞌo ñayiu ka saꞌa teyii mai siki san,
su sein, chi skunkuu san tnoꞌo tatnuni ni jin ndiꞌi san jin anu san.
70 Chi ni ka kundee ndevaꞌa ini anu ñayiu yun, na kuinio xeꞌen ja ni jija,
su sein, chi kusii ini san nuu tnoꞌo kaxtnoꞌo ni.
71 Guaꞌa kuu ja ni tnaꞌa ndevaꞌa san tnundoꞌo,
chi saa te kutuaꞌa san naxa kaꞌan tnoꞌo ja xtaku ni nuu san.
72 Te ja nuu maa san, chi guaꞌa ndevaꞌa ka kuu tnoꞌo kaxtnoꞌo maa ni jin yuꞌu ni,
masu kuakuaꞌa mil xuꞌun ka kuu oro vi plata.
73 Chi jin ndaꞌa maa ni, ni saꞌa ña ni jin san,
te taa ni ja jinkuiꞌnu ini san, nagua ja na kutuaꞌa san tnoꞌo tatnuni ni.
74 Te na vi kusii ini ñayiu ka yuꞌu niꞌnu ña jin ni, nuu vi kuni ñai jin san,
chi kukanu ini san nagua kaꞌan nuu tnoꞌo ni.
75 Chi jini san, vi Jitoꞌo, ja oo ndaa tnoꞌo ja xtaku ni nuu san,
te ndija ni ja tetniuu ni tnundoꞌo siki san.
76 Su vitna, te kaꞌan ndaꞌu kaꞌan kee ña ni jin san, te ndataa ni tnoꞌo sii ini,
nagua ni kee yuꞌu ni ja saꞌa ni jin san, ja jinokuechi san nuu ni.
77 Neꞌe ni, te kaꞌan ndaꞌu kaꞌan kee ña ni jin san, nagua ja na koteku san,
chi kusii ini san jin tnoꞌo kaxtnoꞌo ni.
78 Saꞌa ni ja na vi kendoo kanoo maa ñayiu ka saꞌa teyii mai,
chi ka xtavi kuechi ñai jin san jin tnoꞌo tnoꞌo, su masu nagua ni saꞌa san jin,
te sein, chi ñuꞌu ini san tnoꞌo tatnuni ni.
79 Na vi ndututu san jin ñayiu ka yuꞌu niꞌnu ña jin ni,
te na vi kutuaꞌi naxa kaꞌan nuu tnoꞌo ni.
80 Te ndiꞌi san jin anu san na kuantnoꞌo ndaa kuiti san tnoꞌo ja xtaku ni,
nagua ja ma kendoo kanoo san.
81 Te vi makuita saꞌun anu san ndetu san, na kiuu guaa skaku niꞌnu ña ni jin san,
su ndetu kaꞌnu ña san jin ni nagua kaꞌan nuu tnoꞌo ni.
82 Te vi makuita saꞌun nduchi nuu san ja ndetu san tnoꞌo ni kee yuꞌu ni,
te kachi san: “¿Na kiuu saa kii ni ja ndasaꞌa sii ini ña ni?”
83 Chi ni kasun saꞌun san na kuinio in itni ñii ja intakaa nuu ñuaꞌa,
su tu ndunaa ini san tnoꞌo ni xtaku ni.
84 ¿Nasaa ka kiuu kuu ja koteku san, ja jinokuechi san nuu ni,
te saa tetniuu ni tnundoꞌo siki ñayiu ka sondikin ña jin san?
85 Ni ka jate ñayiu ka saꞌa teyii mai in yau ja vi skanakau ñai jin san.
Te ñayiu yun, chi tu ka ndikin nagua kaxtnoꞌo ni.
86 Ndiꞌi tnoꞌo tatnuni ni kuu tnoꞌo ndaa.
Chituu ña ni, vi Dios, chi ka sondikin ña ñayiu jin san, su masu na jakueꞌe saꞌa san.
87 Chi vi ja yatni ja vi xnaa ñai jin san,
su tu xndendoo san tnoꞌo tatnuni ni.
88 Te vi nagua kundaꞌu ini ña ni jin san, saa taa ni ja koteku san,
te skunkuu san tnoꞌo tatnuni ni.
89 Nikuii nikani oo yutnu tnoꞌo maa ni ndee andivi, vi Jitoꞌo san.
90 Tniuu ndaa ja saꞌa ni, chi nikuii nikani oo,
chi maa ni, ni saꞌa ñuyiu, te ni junkuiin yutnu.
91 Te ndiꞌi nagua ni chiyukun ni ja vi koo, te saa ka oo ndee kiuu vitna,
chi ndiꞌi ka jinokuechi nuu maa ni.
92 Chi nuu suaꞌa, te tu ni ndataa tnoꞌo kaxtnoꞌo ni in jasii ini nuu san,
vaa ja ni naa san nuu tnoꞌo suchi ini ja tnaꞌa san.
93 Te ma ndunaa saꞌun ini san tnoꞌo tatnuni ni,
chi jin maꞌñu sagua tnoꞌo yun, te taa ni ja teku san.
94 Skaku niꞌnu ña ni jin san, vi Dios, chi ñayiu maa ni kuu san,
chi ndikin san nagua tatnuni ni.
95 Chi ka jito guaꞌa ña ñayiu kueꞌe ja vi xnaa ñai jin san,
su sein, chi ñuꞌu ini san tnoꞌo tatnuni ni.
96 Chi jini san ja ndiꞌi nagua oo ñuyiu vi naa,
su tnoꞌo tatnuni ni, chi ma naa saꞌun.
97 Kutoo ndevaꞌa san tnoꞌo kaxtnoꞌo ni,
te ndiꞌi ni kiuu ñuꞌu ini san.
98 Siun ni oo san jin tnoꞌo tatnuni ni,
te saꞌa ja kuu ndichi ka san, saa ñayiu ka kaꞌan uꞌu ña jin san.
99 Te jinkuiꞌnu guaꞌa ka ini san saa tee ka kaxtnoꞌo nuu san,
chi siun ni ñuꞌu ini san tnoꞌo kaxtnoꞌo ni.
100 Te jinkuiꞌnu guaꞌa ka ini san saa tee nijaꞌnu,
chi jantnoꞌo san tnoꞌo tatnuni ni.
101 Te kujioo san nuu ndiꞌi ichi kueꞌe,
nagua ja skunkuu san nagua kaꞌan nuu tnoꞌo ni.
102 Te tu ni kujioo san nuu tnoꞌo ja xtaku ni,
chi saa ni kaxtnoꞌo maa ni nuu san.
103 Chi in ja vixin ndevaꞌa kuu tnoꞌo ni nuu yuꞌu san,
te vixin ndevaꞌa ka saa nduxi ñuñu.
104 Chi nuu tnoꞌo tatnuni ni, niꞌi san ja jinkuiꞌnu ini san.
Yun kuu ja skexiko san ndiꞌi tnoꞌo tnoꞌo.
105 Tnoꞌo maa ni kuu in ñuꞌu ja yeꞌe nuu jaꞌa san,
vi in ñuꞌu ja yeꞌe niꞌnu nuu ichi jika san.
106 Ni kee yuꞌu san, te skunkuu san tnoꞌo ndaa
ja xtaku ni nuu san.
107 Kusuchi ndevaꞌa ini san, vi Jitoꞌo.
Taa ni ja koteku san nagua ni kaꞌan ni nuu tnoꞌo ni.
108 Jikantaꞌu san nuu ni, vi Jitoꞌo, ja kuantaꞌu ni joo tnoꞌo ja saꞌa kaꞌnu ña san jin ni,
te kaxtnoꞌo ni tnoꞌo ja xtaku ni nuu san.
109 Ndiꞌi ni kiuu oo san ja kuu san,
su tu ndunaa ini san tnoꞌo kaxtnoꞌo ni.
110 Ni ka nduku ñayiu kueꞌe ja vi kakuiko ñai jin san,
su sein, chi tu kujioo san nuu tnoꞌo tatnuni ni.
111 Te nikuii nikani saꞌa jajin san tnoꞌo tatnuni ni,
chi suu ndasaꞌa sii ini anu san.
112 Chi vi ni ini ni anu san kuini san ja skunkuu san tnoꞌo tatnuni ni,
te siun ni kosaꞌa san guaa ndee kiuu sandiꞌi.
113 Skexiko san ñayiu inu jani ini,
su kutoo san tnoꞌo kaxtnoꞌo ni.
114 Maa ni kuu ia tayuꞌu ña vi ia jito jini ña,
te kukanu ini san tnoꞌo ni.
115 Te maa ni ñayiu ka saꞌa jakueꞌe, vi kujioo ni nuu oo san,
chi kuini san ja skunkuu san tnoꞌo tatnuni ia Dios san.
116 Chindee chituu ña ni jin san, nagua ni kee yuꞌu ni, te na koteku san,
te ma kendoo kanoo san ja ndetu kaꞌnu ña san jin ni.
117 Chindee chituu ña ni jin san, te na kaku niꞌnu san,
te siun ni na koskunkuu san nuu ley ni.
118 Te skexiko ni ñayiu ka kujioo nuu ley ni,
chi ninoꞌo ni ja vi xndaꞌui ñayiu ka ndakani ini.
119 Chi skexiko ni ndiꞌi ñayiu ka saꞌa jakueꞌe nuu ñuyiu yaꞌa, na kuinio miꞌi.
Yun kuu ja sein, chi kutoo san tnoꞌo tatnuni ni.
120 Te vi suaꞌa niꞌi yiki kuñu san ja yuꞌu ña san,
te yuꞌu niꞌnu san tnoꞌo ja xtaku ni nuu san.
121 Siun ni saꞌa ndaa san,
te ma skanakau ña ni nuu ndaꞌa ñayiu ka saꞌa ndevaꞌa ña jin san.
122 Saꞌa ni javaꞌa jin san ja jinokuechi san nuu ni,
te ma kuandetu ni ja vi saꞌa ndevaꞌa ña ñayiu ka saꞌa teyii mai.
123 Te vi ja makuita saꞌun nduchi nuu san ja ndetu ndevaꞌa san ja skaku niꞌnu ña ni,
chi ndetu kaꞌnu san ja skunkuu ni tnoꞌo ni kaꞌan ni ja saꞌa ndaa ni.
124 Saꞌa ni javaꞌa jin san ja jinokuechi san nuu ni, nagua kuaꞌa ndaꞌu ini maa ni,
te kaxtnoꞌo ni ja na saꞌa san nagua kaꞌan nuu ley ni.
125 Tee jinokuechi nuu maa ni kuu san, te taa ni ja jinkuiꞌnu ini san,
nagua ja na kuni san tnoꞌo tatnuni ni.
126 Ja oo kiuu ja saꞌa na in ni joo, vi Jitoꞌo san,
chi ni ka jiso kava ñayiu ley ni.
127 Yun kuu ja kutoo ka san tnoꞌo tatnuni ni, masu oro,
chi kutoo ka san saa oro ja ni nduvii ndevaꞌa.
128 Yun kuu ja ndakani ini san ja oo guaꞌa ka ndiꞌi tnoꞌo tatnuni ni, saa ndiꞌi ja oo ñuyiu yaꞌa,
te skexiko san ndiꞌi ichi xndaꞌu ña.
129 Te vi ni saꞌu kuii ini san nuu tnoꞌo tatnuni ni,
yun kuu ja tavaꞌa san ndee ini ndee anu san.
130 Te maa tnoꞌo ni yeꞌe nuu ñayiu,
te saꞌa ja ka jinkuiꞌnu ini ñayiu ka saꞌa ndaꞌu ja tu ka jini.
131 Ni june san yuꞌu san, te ni jaka ndaꞌu ini san,
chi ndioo ndevaꞌa ini san tnoꞌo tatnuni ni.
132 Kondiaꞌa ña ni jin san, te kaꞌan ndaꞌu kaꞌan kee ña ni,
nagua saꞌa ni jin ñayiu ka kutoo ña jin ni.
133 Kondeka ña ni jin san ja na kaka san nagua kaꞌan nuu tnoꞌo ni,
te ma kuandetu ni ja ni in jakueꞌe ma kundee kuu nijaꞌnu nuu san.
134 Skaku niꞌnu ña ni nuu ndaꞌa ñayiu ka saꞌa ndevaꞌa ndetnuni ña jin san,
nagua ja na skunkuu san tnoꞌo tatnuni ni.
135 Kaꞌan ndaꞌu kaꞌan kee ña ni jin san ja jinokuechi san nuu ni,
te kaxtnoꞌo ni ley ni nuu san.
136 Te nuu ndaꞌi san, te jika tee nuu san na kuinio in yute,
chi tu ka jantnoꞌo ñayiu tnoꞌo kaxtnoꞌo ni.
137 Maa ni kuu ia ndaa, vi Jitoꞌo san,
te oo ndaa tnoꞌo xtaku ni nuu ñayiu.
138 Te tnoꞌo tatnuni ni, ja ni skuiso siki ña ni jin san,
kuu tnoꞌo ndaa vi tnoꞌo ja kukanu ini san.
139 Te vi suaꞌa kai anu san ja ndiꞌni ndevaꞌa san,
chi ni ka ndunaa ini ñayiu ka kaꞌan uꞌu ña jin san naxa kaꞌan tnoꞌo ni.
140 Tnoꞌo vii ndevaꞌa kuu tnoꞌo ni,
te kutoo maa san ja jinokuechi san nuu ni.
141 In tee saꞌa ndaꞌu saꞌa kee ni kuu san, te ka skexiko ña ñayiu jin san,
su tu ndunaa ini san tnoꞌo tatnuni ni.
142 Te nuu jaꞌnde ni kuechi, chi siun ni saꞌa ndaa ni,
te tnoꞌo ja kaxtnoꞌo ni kuu tnoꞌo ndaa.
143 Tnaꞌa ndevaꞌa san tnundoꞌo vi tnoꞌo suchi ini,
su tnoꞌo tatnuni ni ndataa jasii ini nuu san.
144 Te tnoꞌo tatnuni ni, chi siun ni kuu tnoꞌo ndaa.
Taa ni ja jinkuiꞌnu ini san nagua ja na kuu koteku san.
145 Te jin ndiꞌi san jin anu san kana san nuu ni, vi Jitoꞌo.
Tanundaꞌa ni konini ni joo tnoꞌo kaꞌan san, te na skunkuu san nagua kaꞌan nuu Ley ni.
146 Nuu maa ni kana san, ja skaku niꞌnu ña ni,
te skunkuu san tnoꞌo tatnuni ni.
147 Te ama ka ja tuu ja ndakiꞌin inka kiuu, te ndakoo san jikantaꞌu san nuu ni, ja chituu ña ni jin san,
chi ndetu kaꞌnu ña san jin ni, nagua kaꞌan nuu tnoꞌo ni.
148 Te vi niñuu niñuu ni nduku ndee san ja ndito san,
nagua ja ndakaꞌan san naxa kaꞌan nuu tnoꞌo ni.
149 Konini ni joo tnoꞌo kaꞌan san, vi Jitoꞌo, nagua kuaꞌa ndaꞌu ini ni,
te taa ni ja koteku san nagua kuaꞌa saꞌa ndaa ni.
150 Chi ni ka kuyatni ñayiu ka sondikin ña jin san ja vi saꞌa ñai jakueꞌe,
su ni ka kuu jikai nuu tnoꞌo kaxtnoꞌo ni.
151 Yatni ñuꞌu oo ni, vi Jitoꞌo,
te ndiꞌi tnoꞌo tatnuni ni kuu tnoꞌo ndaa.
152 Te ndee ja ni kuu nanaꞌa, ni jini san tnoꞌo tatnuni ni,
ja ni saꞌa ni ja koo nikuii nikani.
153 Kondiaꞌa guaꞌa ni tnundoꞌo tnaꞌa san, te skaku niꞌnu ña ni,
chi tu ndunaa ini san tnoꞌo kaxtnoꞌo ni.
154 Kuiin niꞌnu kuiin sagua ni ja jaꞌa san, te ndatau ña ni nuu tnundoꞌo.
Taa ni ja koteku san nagua ni kaꞌan ni nuu tnoꞌo ni.
155 Jika oo ja vi kaku niꞌnu ñayiu ka saꞌa jakueꞌe,
chi tu ka ndandukui ley ni ja vi kondikin.
156 Kaꞌnu ndevaꞌa ja ndaꞌu ini ni, vi Jitoꞌo.
Taa ni ja koteku san nagua kuaꞌa saꞌa ndaa ni.
157 Kuakuaꞌa ñayiu ka kaꞌan uꞌu ña jin san, vi kuaꞌa ñayiu ka sondikin ña,
su tu kujioo san nuu tnoꞌo tatnuni ni.
158 Ndiaꞌa san ñayiu kachi yata tnoꞌo ni, te kiti ini ndevaꞌa san,
chi tu ka jantnoꞌi nagua kaꞌan nuu tnoꞌo ni.
159 Kondiaꞌa ni, vi Jitoꞌo, ja kutoo ndevaꞌa san tnoꞌo tatnuni ni.
Taa ni ja koteku san nagua kuaꞌa kundaꞌu ini ña ni.
160 Ndiꞌi tnoꞌo maa ni kuu tnoꞌo ndaa,
te ndiꞌi tnoꞌo ndaa ja xndaku ni koo nikuii nikani.
161 Ni ka sondikin ña tee ka tatnuni jin san, su masu na jakueꞌe ni saꞌa san de.
Su maa san, chi yuꞌu niꞌnu san tnoꞌo ni.
162 Kusii ini ndevaꞌa san jin tnoꞌo ni kee yuꞌu ni,
nagua kusii ini in ñayiu ni ndaniꞌi in jakuika ndevaꞌa.
163 Skexiko san tnoꞌo tnoꞌo vi tu jantaꞌu san,
su kutoo san tnoꞌo kaxtnoꞌo ni.
164 Te uja jichi saꞌa kaꞌnu ña san jin ni in in kiuu,
chi tnoꞌo ndaa kuu tnoꞌo ja xndaku ni nuu san.
165 Ka oo mani ndevaꞌa ñayiu ka kutoo tnoꞌo kaxtnoꞌo ni,
te tu saꞌun na in guaa skanakau ña jin.
166 Ndetu san ja skaku niꞌnu ña ni jin san, vi Jitoꞌo san,
vi saꞌa san nagua tatnuni ni.
167 Skunkuu san tnoꞌo tatnuni ni,
vi kutoo ndevaꞌa san.
168 Jantnoꞌo san tnoꞌo tatnuni ni vi tnoꞌo xtaku ni nuu san,
chi jini maa ni ndiꞌi nagua saꞌa san.
169 Ndetu kaꞌnu san ja na kenta tnoꞌo ja kana ndaꞌu san.
Konini ni, vi Jitoꞌo san, te taa ni ja jinkuiꞌnu ini san nagua kaꞌan nuu tnoꞌo ni.
170 Te na kenta tnoꞌo ja ndakuatu san nuu ni,
te skaku niꞌnu ña ni, nagua ni kee yuꞌu ni ja saꞌa ni.
171 Te na kana in yaa nuu yuꞌu san ja saꞌa kaꞌnu ña san,
chi kaxtnoꞌo maa ni naxa kaꞌan nuu ley ni.
172 Te na kata san in yaa ja kaꞌan tnoꞌo ni kee yuꞌu ni ja saꞌa ni,
chi ndiꞌi tnoꞌo tatnuni ni kuu tnoꞌo ndaa.
173 Te kotuaꞌa ni ja chituu ña ni,
chi ni kaji san tnoꞌo tatnuni ni ja kondikin san.
174 Ndioo ndevaꞌa ini san ja skaku niꞌnu ña ni jin san, vi Jitoꞌo san,
chi kusii ini san jin tnoꞌo kaxtnoꞌo ni.
175 Kuandetu ni ja koteku san, nagua ja na kosaꞌa kaꞌnu ña san jin ni,
te na chituu ña tniuu ndaa ja saꞌa ni jin san.
176 Ni ojika ndoñuꞌu san, na kuinio in ndikachi ja ni ndoñuꞌu ti,
su neꞌe ni, te ndanduku ña ni jin san ja jinokuechi san nuu ni,
chi tu saꞌun ndunaa ini san tnoꞌo tatnuni ni.