103
Na vi saꞌa kaꞌnuo ia Dios
Yaa ni tee David
1 Na saꞌa kaꞌnuo Jitoꞌo Dios jin ndiꞌo jin anuo.
Na saꞌa kaꞌnuo sivi ya jin ndiꞌo jin yiki kuñuo.
2 Na saꞌa kaꞌnuo Jitoꞌo Dios jin ndiꞌo jin anuo,
te ma ndunaa inio taka tniuu guaꞌa saꞌa ya jion.
3 Chi maa ya kuu ia jakaꞌnu ini ndiꞌi jakueꞌe saꞌo.
Te maa ya kuu ia ndasaꞌa ña ndiꞌi ni nuu kueꞌe ja kuꞌo.
4 Te maa ya skaku ña nuu yau ñaña,
te maa ya ndaskutu ña jin ja kutoo ña ya
vi ja kundaꞌu ini ña ya jion.
5 Maa ya taa ndiꞌi jaguaꞌa nevaꞌo,
te ndasajaa ña ya ja nduu kuechio na kuinio in yaꞌa naꞌnu.
6 Ia ndaa kuu maa Jitoꞌo Dios,
te sandaa ya ja jaꞌa ñayiu nuu ka saꞌa ndevaꞌa ña jin.
7 Te ni xneꞌe ya ichi ya nuu Moisés,
te ni ka jini ñayiu Israel tniuu naꞌnu ni saꞌa ya.
8 Ndaꞌu ndevaꞌa ini Jitoꞌo Dios vi kaꞌnu ini ya.
Te kuekuee kiti ini ya, vi kutoo ndevaꞌa ña ya jion.
9 Chi masu vi siun ni kokuxeen ya nuo,
ni masu vi nikuii nikani kokiti ini ya.
10 Chi tu ndaxtenaa ña ya jin nagua jakueꞌe ka saꞌo,
ni tu saꞌa ya ja vi ndatniuyaꞌuo jin yika kuechio.
11 Chi vi nagua sukun ndevaꞌa ndee nuu ñuꞌu jin ndee andivi,
saa kaꞌnu ja kundaꞌu ini ña ya jin ñayiu ka yuꞌu niꞌnu ya.
12 Chi vi nagua jika nuu kana nikandii jin nuu kee,
saa jika ni skunta ya yika kuechio.
13 Chi vi nagua kundaꞌu ini tata jin seꞌe de,
saa kundaꞌu ini ña Jitoꞌo Dios jin ñayiu ka yuꞌu niꞌnu ya.
14 Chi ja jini ya naxa ni ka kuvaꞌo,
te ja naꞌa ya ja ñuyaka ni ka kuo.
15 Chi nani kuinio yuku kuii ka kuu ñayiu,
te kiuu ja ka tekui kuu na ni kuinio nuu jaa ita nuu yuku.
16 Te ni tee suaꞌa ni tee suaꞌa ni ña tachi,
te ni naa ndiꞌi ni, te ni ja tu na ndenaꞌa ka ndenu ni oo.
17 Su ñayiu ka yuꞌu niꞌnu ia Dios, chi siun ni kundaꞌu ini ña ya,
te saꞌa ndaa ya jin seꞌe ñayiu yun vi señani,
18 vi ka skunkui tratu ni saꞌa ya jin,
te ka ndakaꞌin tnoꞌo ni tatnuni ya,
te ka saꞌi nagua kuini ya.
19 Chi ni jinkoo Jitoꞌo Dios nuu tatnuni ya ndee andivi,
te tatnuni ya nuu ndiꞌi tuꞌu.
20 Vi saꞌa kaꞌnu ni Jitoꞌo Dios, maa ni ja ka kuu ni ia ka jinokuechi nuu ya,
ja ka ndiso ni tniuu naꞌnu ndevaꞌa,
te ka saꞌa ni nagua kaꞌan ya vi ka jantnoꞌo ni tnoꞌo tatnuni ya.
21 Vi saꞌa kaꞌnu ni Jitoꞌo Dios,
maa ni ja ka oo ni ndee andivi ja ka jaxin tnaꞌa ni ja jaꞌa ya,
vi ka jinokuechi ni nuu ya, vi ka saꞌa ni nagua kuini ya.
22 Vi saꞌa kaꞌnu Jitoꞌo Dios, ndiꞌi ron ja ni saꞌa ña ia Dios,
vi ndiꞌi tuꞌu nuu tatnuni ya.
Na saꞌa kaꞌnuo Jitoꞌo Dios jin ndiꞌo jin anuo.