24
- 19 -
1 Ma kokuu kuasun ini ron jin tee ka saꞌa jakueꞌe,
ni ma kondioo ini ron ja vi kondeka tnaꞌa guaꞌa ron jin de.
2 Chi maa ni ka ndakani ini de ja vi suꞌu de jin tnoꞌo xeen,
te ninoꞌo ni ka kaꞌan de ja vi saꞌa de jakueꞌe.
- 20 -
3 Kondichio te saꞌo in veꞌe,
te jin ja jinkuiꞌnu inio, te tauo cimiento ja koo yutnu veꞌe yun.
4 Te kondichi inio naxa tnaa chituo veꞌe yun
jin ndiꞌi ndatniuu vii ja ndee yaꞌu vi ja junkuaan inio.
- 21 -
5 Ñayiu ndichi, chi ondakui,
te ñayiu jinkuiꞌnu ini, chi kuu ndakui kai.
6 Chi chikuaꞌa guaꞌa ron naxa kasi ron nuu vi kaxin tnaꞌa ron,
te nuu oo kuakuaꞌa tee ka xteku ña kuu nuu kundee ron.
- 22 -
7 Te jika ndevaꞌa oo tnoꞌo ndichi, te ma niꞌi tee vasa,
te ma niꞌi saꞌun de tnoꞌo kaꞌan de nuu ka ndututu ñayiu ñuu.
- 23 -
8 Tee ndakani ini ja saꞌa de jakueꞌe,
vi xnani ron jin de, “seꞌe tee ndakani kueꞌe ini”.
9 Te ja ndakani kueꞌe ini tee vasa yun kuu yika kuechi,
te ndiꞌi ñayiu ka skexiko tee kuasun ini.
- 24 -
10 Nuu ja kuita ron kiuu tnaꞌa ron tnundoꞌo,
te masu ondakui guaꞌa ron.
- 25 -
11 Skaku niꞌnu ñayiu ni ka jaka ja vi kaꞌni,
te ndatau ñayiu ka oo yatni ja vi kuu.
12 Chi visi na kachi ron: “Jandaa ndija ja tu ni jini san”,
¿te a kaꞌan ron ja tu jinkuiꞌnu ini ia skuaꞌa naxa oo anu in in ñayiu?
¿A kaꞌan ron ja tu jini ia jito ña jin ron?
Te maa ya kuu ia ndatniuyaꞌu ña jin ñayiu na kuu na kuu na tniuu ni ka saꞌi.
- 26 -
13 Kaa nduxi yaꞌa, vi seꞌe, chi asin ndevaꞌa jaa,
te vixin kuni ron jioo nduxi yaꞌa nuu yuꞌu ron.
14 Te saa vixin kuni ron tnoꞌo ndichi nuu anu ron,
te nuu ja niꞌi ron tnoꞌo ndichi yun,
te niꞌi ron in jaguaꞌa,
te nuu skundiꞌi ron, te ma naa ndoñuꞌu ja ndetu kaꞌnu ron.
- 27 -
15 Roon ja kuu ron ñayiu kueꞌe, ma ndakani neꞌe ini ron siki ñayiu veꞌe tee ndaa,
ni ma suꞌu ron nagua oo veꞌe de.
16 Chi visi uja jichi na junkau tee ndaa, su kundee de ndakoo de.
Su ndia tee kueꞌe, chi tnaa niꞌnu de maa de nuu jakueꞌe.
- 28 -
17 Ma kokuu sii ini ron nuu kanakau ñayiu nee uꞌu tnaꞌa jin ron nuu jakueꞌe,
ni ma kokuu sii ini ron nuu tnaꞌi tnundoꞌo.
18 Kana saa ma jinkuaan ini Jitoꞌo nuu na kuni ya,
te ma tetniuu ka ya tnundoꞌo siki ñayiu yun.
- 29 -
19 Ma kiti ini ron ja jaꞌa ñayiu kueꞌe,
ni ma kokuu kuasun ini ron jin ñayiu ka saꞌa jakueꞌe.
20 Chi tu nagua ndetu kaꞌnu ñayiu kueꞌe yun,
te ñayiu saꞌa jakueꞌe, chi ndaꞌvai na kuinio in lámpara.
- 30 -
21 Koyuꞌu niꞌnu Jitoꞌo, vi seꞌe, te kuanyuꞌu kuandetu nuu rey,
te ma kondeka tnaꞌa ron jin ñayiu ka ndakoo ja ka saꞌa jakueꞌe.
22 Chi sanaa ni te kenta tnundoꞌo ni tetniuu ia Dios vi rey,
te na jinio na tnundoꞌo vi tnaꞌa ñayiu yun.
Sava ka tnoꞌo jaꞌvi ja ni ka kaꞌan tee ndichi
23 Suni tnoꞌo yaꞌa kuu tnoꞌo jaꞌvi ja ni ka kaꞌan tee ndichi:
Masu vatuka kuu ja ka saꞌa siin siin ron in in ñayiu nuu ka jaꞌnde ron kuechi.
24 Na in kachi nuu ñayiu kueꞌe: “Ñayiu ndaa kuu ni”,
te vi xtau tniaꞌa ña ñayiu ñuu kueli jin, te vi skexiko ña ñayiu ñuu naꞌnu jin.
25 Su ñayiu saꞌa ja tniuyaꞌu ñayiu kueꞌe yun ja saꞌi,
te kee yiñuꞌi, te koo javii javaꞌa jin.
26 Te ñayiu kaꞌan tnoꞌo ndaa ndija
kuu na kuinio in ñayiu ja chitu yuꞌu inka ñayiu ja kaꞌan too tnaꞌi.
27 Xtnañuꞌu ka ndasaꞌa ñundeꞌi ron,
te saꞌa tuaꞌa ñuꞌu ron ja na koo nagua skuita ron,
yun te saa saꞌa ron veꞌe ron.
28 Ma kaꞌan ron tnoꞌo ja masu nagua jini ron siki tnaꞌa kuikin ron,
ni ma kaꞌan ron tnoꞌo luu ja kaꞌan tnoꞌo ron ja jaꞌi.
29 Ma kachi ron: “Vi nani ni saꞌa ñai, te suni saa ni na ndasaꞌo jin,
na ndaxtenao jin, nagua ni saꞌa ñai jion”.
30 Ni yaꞌa rin nuu ñuꞌu tee kuꞌndu,
vi yatni nuu oo tnu uva tee tu jinkuiꞌnu ini.
31 Te ni jini rin ja nii nuu ñuꞌu yun ni nana tnu iñu,
vi ninii nuu ni nana yuku,
te ja ni tnani korra yuu ja ndesi yuꞌu ñuꞌu yun.
32 Te nuu ni jini rin yaꞌa, te ni ndakani ini rin jin anu rin,
te nuu ni ndiaꞌa rin, te ni kutuaꞌa rin tnoꞌo yaꞌa:
33 Joo ni kusun ron, te joo ka kusun ndei ron,
te ndakanu ndee ndaꞌa ron joo ka ja ndatatu ron,
34 te kenta ni ja kundaꞌu ron na kuinio in kuiꞌna,
axi na kuinio in tee nee kuji.