54
Koo in kiuu koo vii koo vaꞌa ñuu Jerusalén
1 “Kokusii ini ron, ñaꞌa ja ña kuu koo seꞌe ron, ja ña uun skaku ron lulu,
te kata vi kana jaa, ja kusii ini ron,
ja tu na ama jaꞌnde chii ron ja skaku ron lulu ron,
chi koo kuaꞌa ka seꞌe ñaꞌa ni ndoo, saa seꞌe ñaꞌa ndeka tnaꞌa”,
kachi Jitoꞌo.
2 “Saꞌa kaꞌnu ka veꞌe saꞌun ron, te ndaskaa ka saꞌun veꞌe ron,
te ma kochikuaꞌa ron nuu koo ron.
Ndasaꞌa kani ka yoꞌo vi ndakani guaꞌa nduyu ja kotnii veꞌe ron.
3 Chi kuu jite ka ron ichi ndaꞌa kuaꞌa vi ichi ndaꞌa satni,
te vi kindee ndikin tata ron kuaꞌa ñuu naꞌnu ja vi saꞌa jajin,
te vi koi ñuu ja ni ka ndondaꞌu yun.
4 Te ma koyuꞌu ron, chi ma kendoo kueꞌe ron
ni ma saꞌa ndaꞌu ron maa ron, chi ma kendoo kanoo ron,
chi suaꞌa ndunaa ini ja kanoo ni tnaꞌa ron nuu kuechi ron,
te ma kondakaꞌan ka ron ja ni ka oskexiko ña jin ron nuu ni ndondaꞌu ron.
5 Chi ia ni saꞌa ña jin ron kuu yii ron,
te Jeovaa, ia ndakui ndevaꞌa, nani ya,
te ia ni ndatau ña jin ron kuu ia ii ñayiu Israel,
ja nani ya ia Dios ninii ñuyiu.
6 Chi ni ndakana ña Jitoꞌo jin ron na kuinio ñasiꞌi ni ndoo maa,
te kusuchi ndevaꞌa ini ña, na kuinio ñasiꞌi kuechi ja ni tnandaꞌa te ni ndoo maa in”,
kachi Jitoꞌo ron.
7 Te suni kachi ya: “Ni xndendoo ña rin ndee saa kiuu,
su kundaꞌu ndevaꞌa ini ña rin, te ndakuaka ña rin jin ron.
8 Chi jin ja ni kiti ini rin, te tu ni xtuu nuu ka rin ndesaa kiuu nuu oo ron,
su ni kundaꞌu ini ña rin, chi kutoo ña rin jin ron nikuii nikani”,
kachi Jitoꞌo, ia ni ndatau ña jin ron.
9 “Chi inuu ni saꞌa rin vitna jin nagua ni saꞌa rin kiuu ja ni oo ndi Noé,
nani kee yuꞌu rin ja ma ndaa ka ndute ja xnaa ka de ñuyiu.
Suni saa ni kee yuꞌu rin vitna ja ma kokiti ini ka rin, ni ma kokuxeen ka rin nuu ron.
10 Chi visi na vi ndasama yuku nuu ka oo, te na vi kanda tinduu,
su ma sama ja kundaꞌu ini ña rin jin ron,
ni ma naa tratu ni saꞌa rin ja vi koo mani ron”,
kachi Jitoꞌo, ia kundaꞌu ini ña jin ron.
11 “Ndaꞌu ni ka ron, ñuu Jerusalén ja ni tnaꞌa ndevaꞌa ron tnundoꞌo,
te tu na tnoꞌo sii ini oo jin ron.
Su vitna te siki yuu kuaꞌa nditnuu sonee ña rin jin ron,
te ndee kaꞌa nuu kuvaꞌa ron kani rin yuu ndindiꞌi.
12 Te jin yuu kuakuaꞌa saꞌa rin torre ron,
te yeꞌe ron saꞌa rin jin yuu yeyeꞌe,
te ndiꞌi muro ron saꞌa rin jin yuu vii ndevaꞌa.
13 Te maa rin kaxtnoꞌo nuu ndiꞌi seꞌe ron,
te vi koo vii vi koo vaꞌi.
14 Te koyutnu ron, chi saꞌa ndaa rin,
te ma koyuꞌu ka ron, chi vi kuu jika ñayiu ka saꞌa ndevaꞌa ña jin ron,
te ma vi jatnaꞌa ka ñai ja vi siuꞌu ñai jin ron.
15 Te nuu ja ndeja ndakoo siki ron, te masu ruꞌun tetniuu,
te nuu ja ndeja ndakoo siki ron, te kanakau nuu ndaꞌa maa ron.
16 Te kondiaꞌa ja maa rin ni saꞌa tee kani kaa ja tiuu niꞌni de nuu ñuꞌu tikayi,
te saꞌa de ndatniuu ja ka jantniuu nuu ka jaxin tnaꞌa.
Te suni maa rin ni saꞌa ñayiu ja xnaa ña jin sava ka ñayiu.
17 Te ni in ndatniuu ja ka keneꞌe ñayiu yun,
ma kundee ja xnaa ña jin ron.
Te vi skasi yuꞌu ron ndiꞌi ñayiu ja ka kaꞌan kuechi ja jaꞌa ron.
Te yaꞌa kuu ja kuñaꞌa rin ja vi saꞌa jajin ñayiu ka jinokuechi nuu rin,
ja chituu rin jin ja vi kundei nuu jakueꞌe”,
jiñaꞌa Jitoꞌo.