18
Taꞌdïnggö na Babil
1 Nïkïrï aꞌa ka tasala tadhangga könö afeꞌde unggunu akuꞌbu ndama ꞌdotomboꞌdo ana türü kadhabbu, a ꞌbüdhülü taꞌdara a töyeene tanno iini.
2 Iidhe a tumma koꞌdꞌdo,
“Maꞌdïnggö, maꞌdïnggö Babil ma dhabbu mo,
ma taꞌbuugu ma naꞌbu kadanna kide
ndama ꞌbuugu ma taneene ma naganaꞌbu tanno oroko no
nja uyi tiya nyoro ya, ya kadu kanu kide ya nyeꞌdꞌde.
3 Kadu ma ꞌbüdhülü nyeꞌdꞌde tagooye ngeeli na itoto na ma temelö tanno oono,
a naguugaara ma ꞌbüdhülü kafüngngö ana oogo,
a kadu ma na anadene ana eema tüüsü ka eema tiya oono ya dhabbu ya.”
4 Nïkïrï aꞌa ka föönyö tumma afeꞌde ndama ꞌdotomboꞌdo kiki,
“Aköꞌdö kürö ndama oono, kadu eede,
amang kada tafa tosso ka eema tiya toroko ya nja oono,
amang kada tafa tosso ka tapusu adene ka namaara nja oono.
5 Kudumma tatoroko tanno oono kakodhoncoko kalla kala ꞌdotomboꞌdo,
a Masala tagïïgï tatoroko noono.
6 Agüünï midhi kuꞌbu ana oogo afa moono ka tagüünï midhi kuꞌbu ꞌdo ana aaga kungngo,
aaga kusu midhi kono kide ma dhabbu ada yoono ka tagüünï ana aaga ya kungngo.
Aaga konyaana kerꞌde ma ngeeli tanno oono kafünü kide no.
7 Aaga apusu oogo, aaga tafa kono mafara dhindho
tamana moono ka takïdhïndhï ma taküüsü.
Mïndhïgï eyi yoono miki,
‘Aꞌa nungngo nemmi kita ka tauugaara,
taalo aꞌa na aka ma küüme,
nitaalo nussu muuyu.’
8 Nggeege ara tagorooꞌbo tümmü oogo ana uuru ka unggodho,
inde nja müürü nja ïïre,
ara ïssï tinyogo oogo
kudumma türü kungngo Masala Uugaara, mara tasigi oogo mo.”
9 Ara naguugaara ma ꞌbüdhülü sa fara kamüürü, eege na füngngö ana oogo kadhodho nja oono, kafara kene kara tasala ndhïïgö ma ïssï tanno oono.
10 Köödhï kuꞌbꞌba eene kariꞌba a tapusu adene tanno oono kiki, “Amꞌba! Amꞌba küdü anya ma dhabbu, anya ma Babil ma iiꞌbaana mo, ara oꞌo tasigidene ana ndanaaya ka unggodho.”
11 Ara kadu ma ꞌbüdhülü na anadene ana eema no, saga fara oogo kamüürü, kudumma ömöꞌdï ma tana eema kene taalo.
12 Eema ma dahaba nja fudda nja nduguri nja lüülü tiya aguꞌdaana ya, nja enꞌdi ma hariir nja enꞌdi ma silik tiya öödhe ya, nja naafa nyeꞌdꞌde na afeene nja togoogo no, nja eema tiya agalinggo adene ana igini ma mongngo ya nja keeꞌdi tanno aguꞌdaana no, nja tanyaanya nja eliili nja nduguri.
13 Nja girfa nja kondho ma ndhïïgö nja russu, nja maaga nja felengidhi, nja ngeeli nja uuꞌba nja müsö tammo ilollo mo nja migile, nja eema ma erïïdö nja kiꞌbiini nja naguttu nja karru nja kasaga nja nagoronggore ma nakömöꞌdï.
14 A kadu na anadene no tiki oono, “Eema ya aꞌdiila ya kanna küdü ya akunggeene. Eema ya kanna küdü adhabbu ya nja tïdhïndhï aꞌdugadene taalo oꞌo taluna afeꞌde.”
15 Kadu nanadene ka anya kana almaala dhabbu no kara taꞌdïngnge kuꞌbꞌba kanna kudumma eene ka ariꞌba a tapusu adene tanno oono, katafara kamüürü.
16 Kiki,
“Amꞌba! Amꞌba küdü, anya ma dhabbu mo,
magümmü enꞌdi ma ndugaara na kuꞌdaana no ka oona nja enꞌdi tiya öödhe ya,
ümmü dahaba nja kisi tanno aguꞌdaana no nja lüülü.
17 Eema yoono ya nyeꞌdꞌde kungngo ara titaalo ana ndanaaya ka unggodho.”
Namürkabü nyeꞌdꞌde nja dhabbu ma nasawaaga miini nja kadu tanno no linggo kide no, nja kadu töccö no kuri ka to ka oona no töödhï kuꞌbꞌba.
18 Kiidhe koꞌdꞌdo kene ka tasala ndhïïgö moono ka finne, “Maganna anya ma ïdhïndhï afa ma tammo kungngo?”
19 Kadhifi kuraaga eene ka nanggüüdü kafara kamüürü kiki aꞌda,
“Amꞌba! Amꞌba ka anya tammo ïdhïndhï mo,
a kadu na ana namürkabü ka to no eege
saga tatanggaꞌda ana ndanaaya ka unggodho.
20 ꞌDotomboꞌdo, adhodho kudumma oono ka tagaꞌdadene,
aaga dhodho kadu na insili no nja kadafïïnï nja naganeꞌbi
kudumma Masala ka takapusu oogo ka eema tiya oono ka tagüünï ana aaga ya.”
21 Ïkïrï tadhangga ya dhabbu ya ana türü ya, ka aꞌduga mïsï ma köje nja mïsï ma tawöönö ma dhabbu mo, apügü co to iki,
“Nggeege ara Babil ma ïdhïndhï mo tapügünja co to a türü
mitaalo mara talunadene afeꞌde.
22 Taalo kadu kara taföönyö a kadu ka tüwe tüüsü
nja fara ma perempeera nja kaaru nja tïnïïdö
taalo kadu ma linggo kara tanna küdü kanna afeꞌde,
taalo kadu kara taföönyö fara ma tawöönö küdü afeꞌde.
23 Taalo töyeene ma lamba töyeene küdü afeꞌde,
taalo taföönyö tüüsü ma kadu tanno arna no küdü,
kudumma kadu tanno anadene ka kadu ma ꞌbüdhülü na ïdhïndhï no,
a kadegeene nüüdü no kaama kadu ma ꞌbüdhülü nyeꞌdꞌde kungngo.
24 Kaduna erïïdö kono ma naganeꞌbi nja kadu tanno insili no
nja kadu na kirinadene ka ꞌbüdhülü nyeꞌdꞌde.”