12
कोन्छ्योकला गा लङ्गुप चाङ्मा वोतुप बुल्वा
1 तुक क्यानी अच्युनुपतिवा, च्यम्बा वोतुप कोन्छ्योक नेसुर ङ ख्यिराङला ठाकुरे सिरिन। ख्यिरा दाक दाक्पी मिजी ति कोन्छ्योकला गा लङ्गुप ताङ चाङ्मा वोतुप जिन्बा पुल। तुक क्यावु ति ख्यिरा सेमगी दिङ नेज्युनी खोला सोवा तेकुप यिन।
2 तमा दी जम्बुलिङकी किताङ नालुला येनी मादे, यिने रङगी सेम ति सम्बा फोनी ख्यिरा थोक्ला कोन्छ्योककी नोवाला ल्यामु वोतुप ति काङ यिन, चुक क्यानी खोला गा लोङ्गुप, चुक क्यानी खोकी नोवा दोके क्यानी मिजी क्योङ्गुप, ती तेरी हाक्कोवा की।
3 कोन्छ्योककी ङला नङ्गुप कटिन नेसुर ङ ख्यिराङ रे रेला ठाकुरे सिनी गोङ्बा शोयी। ख्यिराङ छ्युङा यिन्सिनाङ, खुरुङ राङ छ्ये यिन सिनी सु साङ नासाम मातोङ। यिने कोन्छ्योककी ख्यिराङला चो तेपा नङ वे, ती ति ल्यामो हाक्कोनी ती दोके मिजी क्योङ।
4 दाक्पी जुला येन्लकतिवा बङी वोसिनाङ तेरी येन्लकतिवी ति लाका कुतुक कुतुक गिवी।
5 ती दोके दाक्पु बङी वोसिनाङ ख्रीष्ट ताङ मुला च्यिक्पा राङ जोवु तप्की जु ति च्यिक राङ यिन। तमा दाक्पु रे रे च्यिक ताङ च्यिककी येन्लकतिवा यिन।
6 तुक क्यानी कोन्छ्योककी दाक्पुला कटिन नेमा नङ्गुप ङ्येम्बा साङ कुतुक कुतुक वे। दोजो खोकी दाक्पुला नङ्गुप ङ्येम्बा ति लुङ्तेम्बाकी लाका यिन्सिन कोन्छ्योककी दाक्पुला नङ्गुप तेपाकी ओङ नेसुर लुङ्तेम्बाकी लाका कि गोकिवी
7 शब्ज्यी कितुप यिन्सिन ल्यामु क्यानी शब्ज्यी कि गोकिवी। मीला लाप्नी तेरुप यिन्सिन ल्यामु क्यानी लाम तेरुप लाका कि गोकिवी।
8 मीला टोङ्गु तेरुप यिन्सिन ल्यामु क्यानी टोङ्गु तेरुप लाका कि गोकिवी। बुल्दिर ग्यकुप यिन्सिन सेमगी दिङ नेज्युनी बुल्दिर ग्यक गोकिवी। ग्येला कितुप यिन्सिन टेमु क्यानी ग्येला कि गोकिवी। च्यम्बा कितुप यिन्सिन गा ताङ क्यानी च्यम्बा कितुप छ्या देन गोकिवी।
च्यिककी च्यिकला ङ्यिङ्ज्ये कितुप
9 ख्यिराङ मी यम्बाला ङ्यिङ्ज्ये कितुप ति मीला छ्या देन्दुपला तिराङ माकी। चुका ति दुक्टा नोके तीला ति ङ्यिङ्मर की, चुका ति ल्यामु नोके तीला राङ शु।
10 च्यिककी च्यिकला अच्युनुप दोके क्यानी ङ्यिङ्ज्ये की। रङला सिनाङ मी यम्बाला मङ ताङ्देन की।
11 हुर्ताक कितुपला तिङ छ्येनी मादे, यिने कोन्छ्योककी थु चाङ्माकी ओङ नेसुर वुङ्गुप नासाम ताङ्नी कोन्छ्योककी थोक्ला शब्ज्यी पुल।
12 कोन्छ्योककी ख्यिराङला नङ्गुप रेवाला ख्यिराङ लोदिमु क्यानी दे, छेटाङला ख्येलुप पेला हम क्यानी दे, नरी कोन्छ्योकला मोपोर की।
13 कोन्छ्योकला तेपा कितुप मीतिवा कतुकारला ख्येल वोसिन तिवाला दाल्जा किटे की। खोरो खाङ्बाला वावु डेन्बुतिवाला गासो शु।
14 ख्यिराङला छेटाङ तेरुप मीतिवाला मोताप मादेप, तिवाला मोलाम बिन।
15 गा कितुपतिवी मुला गा की, सेम्दुक कितुपतिवी मुला सेम्दुक की।
16 तेरीकी मुला सेम च्यिक राङ जोनी थिन्नी दे, अम्बारङ्शिङ माकी, यिने मी ङ्याम्छ्युङतिवी दला शु। नाम्साङ ङ राङ येन्देन वोतुप यिन सिनी नो माकी।
17 सी ख्यिराङला मेलोवा किवे, तिवाला ङ्येन मलाङ। चुका ताम्ङे ति तेरी मीतिवी थोङ्दाङला ल्यामु नोके, तीला राङ नासाम तोङ।
18 दे थुप्सिन मी तेरी ताङ मुला डिक्नी दे।
19 ङे ङ्यिङ्ज्येवु अच्युनुपतिवा, ख्यिरा नाम्साङ मीला ङ्येन मालाङ, यिने कोन्छ्योककी लकला चेक ते। च्यिलासिसिन कोन्छ्योककी सुङला “ङ्येन लङ्गुप ति ङ राङ यिन, ङ राङ ङ्येन लङ्यिन।” सिनी टि वे।
20 बोरु
“ख्योरो डतिवा ल्होवा लान वोसिन तिवाला समा बिन,
कोम्बा लान वोसिन तिवाला थुङ्गुप छ्यु बिन।
तुक क्यासिन तिवी गोला मेताक छेन्दी पुवु दोके क्यानी ख्योरो डतिवा ङोछाला ख्येल्गिवी।”
सिनी टि वे।
21 दुक्टाकी ख्योरो खला ग्येल माज्यी, यिने ख्यिराङ लाका ल्यामु क्यानी दुक्टाकी खला ग्येला की।