10
1 अच्युनुपतिवा, ङ ङे सेमगी दिङ नेज्युनी कोन्छ्योकला मोपोर कितुप ति यहूदीतिवा दिक्पा ने थर्शी सिनी यिन।
2 ङ दी ताम्ङे ति पङ्बु तेरिन। ती ति काङ यिन सिसिन, तिवी कोन्छ्योककी थोक्ला ल्यामो क्यानी शब्ज्यी कितुपला गा क्यासुङ, यिने चुक क्यानी खोला शब्ज्यी कि गोकिवी सिरुप ति तिवाला हाक्मोकोनोक।
3 तिवी कोन्छ्योककी थोङ्दाङला टेङ्बु ङ्येतुप ति हाक्माकोनी खोप्रे राङ टेङ्बु कितुप लाका तिराङ क्यासिमा खोकी थोङ्दाङला टेङ्बु ङ्येतुपला माङ्येन।
4 च्यिलासिसिन कोन्छ्योककी ठिमला गोवु तेरी ताम्ङेतिवा ख्रीष्टकी छे च्यिसुङ। तुक क्यानी सी खोला तेपा किवे, तिवा कोन्छ्योककी थोङ्दाङला टेङ्बु ङ्येकिवी।
थर्वा ति मी तेरीकी थोक्ला यिन
5 ठिमला ङ्येन्नी कोन्छ्योककी थोङ्दाङला टेङ्बु ङ्येतुपकी कोर्ला ठिमकी थेप नाङ्ला मोशाकी “ठिमला ङ्येन्दुप मीतिवा ति ती ठिम ङ्येन्दुप नेसुर मिजी क्योङ्गिवी।” सिनी टि वे।
6 यिने तेपा क्यानी कोन्छ्योककी थोङ्दाङला टेङ्बु ङ्येतुप मीतिवी दुक सिनी सिवी, “ख्योरो सेमला ‘सु देवाच्येनला डिवी?’ सिनी मासिर।” (तीकी तेन्दोक ति ख्रीष्टला मर पाम वुङ्गुप यिन।)
7 “याङ्ना ‘सु ङ्येलाला पप्किवी?’ सिनी साङ मासिर।” (तीकी तेन्दोक ति ख्रीष्टला शेप ने येर देकुप यिन।)
8 यिने तेपा क्यानी कोन्छ्योककी थोङ्दाङला टेङ्बु ङ्येतुप मीतिवी काङ सिवी सिसिन “कोन्छ्योककी सुङ ति ख्योरो चिप्ला राङ वे, ती सुङ ति ख्योरो खला वे, तमा ख्योरो सेमला राङ वे।” ती सुङ ति ङ्यिरा ख्यिराङला ख्याप्टाक क्यावु तेपाकी कोर्ला सिक्यावु सुङ यिन।
9 दोजो ख्योरो मीतिवी मिङ्गाला येशूला चोवो यिन सिनी ख नेमा सिवी, तमा कोन्छ्योककी खोला शेप ने ङोसु लङ्गुप यिन सिनी सेमला तेपा क्यासिन ख्युरुङ दिक्पा ने थर्किवी।
10 च्यिलासिसिन सी खोला सेम नेज्युनी तेपा किवे, ती ति कोन्छ्योककी थोङ्दाङला टेङ्बु ङ्येकिवी। सी मीतिवी मिङ्गाला खोला तेपा कितिन सिनी सिवे, तीला दिक्पा ने थर ज्यिकिवी।
11 तुक क्यानी कोन्छ्योककी सुङला साङ दुक सिनी टि वे, “खोला तेपा कितुप मीतिवा सु साङ ङोछाला मेख्येल्वी।”
12 यहूदी ताङ यहूदी मिन्दुप मिरिक यम्बाकी मीतिवी पर्ला काङ साङ ख्ये मे। कोन्छ्योक ति मी तेरीकी चोवो यिन। खोला रेन्दुपतिवा तेरीला छासे मोलाम थोप्किवी।
13 तीकी कोर्ला कोन्छ्योककी सुङला दुक सिनी टि वे, “चोवो कोन्छ्योकला रेन्दुपतिवा तेरीला खोकी थर ज्यिकिवी।”
14 यिने खोला तेपा माक्यावुतिवी याङ खोला चुक क्यानी रेन्गिवी रो? तिवी खोकी कोर्ला थोवु साङ माथो वे, चुक क्यानी तिवी खोला तेपा कितुप्जा? खोकी कोर्ला ख्याप्टाक कितुप मी मेसुङ सिसिन चुक क्यानी मीतिवी खोकी सुङ थोकिवी रो?
15 तमा सुङ ख्याप्टाक कितुप मीतिवा माताङ्सिन चुक क्यानी खोकी सुङ ख्याप्टाक किवी रो? ती तप्की कोन्छ्योककी सुङला “लेन ल्यामु ख्याप्टाक कितुप मीतिवी कोम्बा योपुप ति छासे ल्यामु यिन।” सिनी टि वे।
16 यिने तिवी ख्याप्टाक क्यावु लेन ल्यामु थोवु मीतिवा तेरीकी तेपा क्यावु ति मिन। ती तप्की कोन्छ्योककी लुङ्तेम्बा यशैयाकी थेपला दुक सिनी टि वे, “ओ चोवो, ङ्यिरा ख्याप्टाक क्यावु सुङला सी तेपा क्यासुङ रो?”
17 तुक क्यानी तेपा ति कोन्छ्योककी सुङ थोसिमा गिवी, तमा ती थोवु सुङ ति ख्रीष्टकी सुङ नेसुर गिवी।
18 यिने ङ ख्यिराङला ताम्ङे यी टेयी, काङ यहूदीतिवी खोकी सुङ माथोवु यिन रो? वुतुङ के तिवी खोकी सुङ थो वे। च्यिलासिसिन
“कोन्छ्योककी सुङ ति जम्बुलिङ तेरीला ख्याप्टाक क्या वे,
खोकी सुङ ति जम्बुलिङकी अन्तिम सेक्ला टम वे।”
सिनी कोन्छ्योककी सुङला टि वे।
19 येलुङ ङ ख्यिराङला ताम्ङे यी टेयी, काङ ती ख्याप्टाक क्यावु सुङ ति इस्राएलकी मीतिवी हाक्माको वे रो? मिन, हाक्को वे। तीकी कोर्ला मोशाकी दुक सिक्या वे,
“ङे मी मिन्दुप मीतिवा वासिमा ख्यिराङला ङ ठतोक कितुप जोयी।
तमा अम्बारङ्शिङ वोतुप मीतिवा वासिमा ख्यिराङला ङ ङ्यिर्मु कितुप जोयी।”
20 ती तप्की लुङ्तेम्बा यशैयाकी ङाडेङ क्यानी दुक सिक्या वे,
“ङला मोछोलुप मीतिवाला ङे ठेसुङ,
ङला मोलोङ्गुप मीतिवाला साङ ङे छ्या तेनिन।”
21 यिने इस्राएलकी मीतिवी कोर्ला यशैयाकी दुक सिक्या वे,
“ग्यिन्ना वोतुप ताङ ङे सिक्यावु ताम्ङेला मेङ्येन्दुप मीतिवी थोक्ला ङ ङ्यिमी टेङ ङे लाक्पा क्याङ्नी वे।”