10
ख्योवा ताङ पेर्मी टलुप कोर्ला येशूकी सुङ्गुप
(मत्ती १९:१-१२; लूका १६:१८)
1 तेसुर येशू लानी यहूदिया लुङ्बा ताङ यर्दन चङ्बी फर्केन फेप्सुङ। ते येलुङ मी मङ्मु खोकी चाला जोम्सुङ। तमा खोकी नरी दोके क्यानी तिवाला येन्देन नाङ्सुङ।
2 ती पेला फरिसीतिवा खोला खोक्पा ल्हापला खोकी चाला वानी, “ख्योवी खोरो पेर्मी क्युर्नी ज्योकुप ति ठिमला गिवी ताङ मेङ्गिवी?” सिनी टिसुङ।
3 तमा खोकी तिवाला टि नाङ्सुङ, “मोशाकी ख्यिराङला काङ सिनी क बिन वे?”
4 तिवी सिक्यासुङ, “टलुप यिकी टिनी खोरो पेर्मीला टल्सिन गिवी सिनी मोशाकी सिक्या वे।”
5 यिने येशूकी तिवाला सुङ्सुङ, “ख्यिरा सेम क्योङ्बु वोतुप तप्की मोशाकी दुका क टिनी बिन्दुप यिन।
6 यिने कोन्छ्योककी जम्बुलिङ ज्येङ्गुप थल्मा नेज्युनी खोकी मीतिवाला ख्योक्पेजा ताङ पुम्पेजा जो नाङ्सुङ।
7 तुक क्यानी मीकी खोरो फमाला क्युर ज्याक्नी खोरो पेर्मी ताङ मुला थिन्नी देकिवी।
8 तमा तिवा ङ्यी ति जु च्यिक राङ च्युङ्गिवी। त तिवा ङ्यी मिन, च्यिक राङ यिन।
9 तुक क्यानी कोन्छ्योककी डिङ ज्यकुप तीला मीकी डेलुप मेङ्गिवी।”
10 येलुङ खोतिवा खाङ्बी नाङ्ला वोतुप पेला लोमातिवी खोला ती ताम्ङेकी कोर्ला टिसुङ।
11 तमा खोकी तिवाला सुङ्सुङ, “सी साङ खोरो पेर्मी क्युर ज्याक्नी यम्बा पुम्पेजाला जेन्दी क्यासिन तीकी खोरो पेर्मीला शम्डेन क्यावु यिन।
12 लोङ पेर्मीकी साङ खोरो ख्योवा क्युर ज्याक्नी यम्बा ख्योक्पेजा ताङ मुला जेन्दी क्यासिन तीकी साङ शम्डेन क्यावु यिन।”
येशूकी आङा टिक्पेतिवाला मोलाम नङ्गुप
(मत्ती १९:१३-१५; लूका १८:१५-१७)
13 मीतिवी आङा टिक्पेतिवा येशूकी चाला टि वानी तिवी खला खोकी छ्याक ज्याक नाङ सिनी सिक्यासुङ। यिने लोमातिवी तिवाला वोरु तेन्सुङ।
14 येशूकी ती थोङ्सिमा ङ्यिर्मु क्यानी लोमातिवाला सुङ्सुङ, “आङा टिक्पेतिवाला ङे चाला वुङ च्यी, तिवाला माग्येक। च्यिलासिसिन कोन्छ्योककी ग्येल्खाप ति दिवा च्यिन्दैकी ति यिन।
15 ङ ख्यिराङला टेङ्बो सिरिन, सी साङ आङा टिक्पेतिवी दोके क्यानी कोन्छ्योककी ग्येल्खाप खोरो सेमला मिलिङ वे, ती ति नाम्साङ ती नाङ्ला शुक मुथुपी।”
16 तमा खोकी आङा टिक्पेतिवाला पाङ्दुर लानी तिवी खला छ्याक ज्याक्नी तिवाला मोलाम नाङ्सुङ।
ख्योक्पेजा छ्युक्पु
(मत्ती १९:१६-३०; लूका १८:१८-३०)
17 तेसुर येशू लामला फेपिन कितुप पेला मी मिरा च्यिक छ्योङ्बाल ग्यकिन खोकी चाला वानी पुमुङ सला चुनी टिसुङ, “ओ गेकेन टेङ्बु, नाम्साङ मिशिवु मिजी ङ्येतुपला ङे काङ कि गोकिवी?”
18 येशूकी तीला सुङ्सुङ, “ख्योरो ङला च्यिला टेङ्बु सिनी सिवी? कोन्छ्योक च्यिक मिसिन सु साङ टेङ्बु मे।
19 कोन्छ्योककी नङ्गुप कतिवा याङ ख्युरुङला छ्या वे। तिवा ति दी यिन, ‘मी मासे, शम्डेन माकी, कुन माकी, जिनोक जोनी पङ्बु मातेर, माक्येन, तमा ख्योरो फमाला ताङ्देन की।’ ”
20 तीकी खोला सिक्यासुङ, “गेकेन, दी कतिवा ति तेरी टिक्पे नेज्युनी ङे र्हुङ्गुप यिन।”
21 तमा येशूकी तीला ल्हानी ङ्यिङ्ज्ये लानी सुङ्सुङ, “तरोङ साङ ख्युरुङला ताम्ङे च्यिक ङ्युङ्मु वे। त गल्नी ख्योरे मुला वोतुप ति तेरी चोनी पेराङ्बुतिवाला बिन। तुक क्यासिन ख्युरुङला देवाच्येनकी नोर थोप्किवी। तमा वानी ङे तिङ्ला तिङ्यो।”
22 ती ताम्ङे थोसिमा तीकी ङो ति नक्पु गल्नी सेमला पप लानी गाल, च्यिलासिसिन तीकी ति नोर टोङ्बा बङी नोक।
23 तमा येशूकी फार छुर ल्हानी लोमातिवाला सुङ्सुङ, “मी छ्युक्पुतिवाला कोन्छ्योककी ग्येल्खापला शुकुप ति छासे कले गिवी।”
24 ती थोनी लोमातिवा हलेवा क्यासुङ। येशूकी तिवाला लोङ सुङ्सुङ, “आङातिवा, कोन्छ्योककी ग्येल्खापला शुकुप ति छासे कले गिवी।
25 मी छ्युक्पुला कोन्छ्योककी ग्येल्खापला शुकुप सिनाङ सेम्ज्येन वोङ्मुला खपकी मिरु नाङ्ला शुकुप ति जोल्हमु गिवी।”
26 लोमातिवा मङ हलेवा लानी, “तुकै यिन्सिन सु ति थर थुप्किवी?” सिनी सिक्यासुङ।
27 येशूकी तिवाला ल्हानी सुङ्सुङ, “दी ति मीकी कि मुथुपी, यिने कोन्छ्योककी कि थुप्किवी। च्यिलासिसिन कोन्छ्योककी कि मुथुपुप ति काङ साङ मे।”
28 पत्रुसकी खोला सिक्यासुङ, “ल्हो ताङ, ङ्यिरा याङ तेरी क्युर ज्याक्नी गेकेनकी तिङ्ला तिङ्यायिन।”
29 येशूकी सुङ्सुङ, “ङ ख्यिराङला टेङ्बो सिरिन, ङ ताङ लेन ल्यामुकी थोक्ला खोरो खाङ्बा ताङ अच्युनुप ताङ अज्यीनुम ताङ पपाआमा ताङ पुज्युङपुम ताङ शिङ क्युर्नी ज्योकुप तीला
30 दी मिजीला छेटाङ साङ ङ्येकिवी, यिन्सिनाङ तीला दोम्बा खाल च्यिथम्बा खाङ्बा ताङ अच्युनुप ताङ अज्यीनुम ताङ पपाआमा ताङ पुज्युङपुम ताङ शिङ थोप्किवी। तमा तिङ्ला वुङ्गुप कल्वाला नाम्साङ मिसिवु मिजी थोप्किवी।
31 यिने गोमाला वोतुपतिवा बङी तिङ्ला गिवी, तमा तिङ्ला वोतुपतिवा बङी गोमाला गिवी।”
येशूकी खो टुङ्गुप कोर्ला येलुङ नम्दर शेतुप
(मत्ती २०:१७-१९; लूका १८:३१-३४)
32 तमा येशू ताङ खोकी लोमातिवा यरूशलेम फेप्सालेन्सिन येशू लोमातिवा सिनाङ गोमाला फेपिन नोक। ती पेला लोमातिवा हलेवा क्यासुङ, तमा खोकी तिङ्ला तिङ्योकुप मीतिवा ति ज्यिवा क्यासुङ। येलुङ येशूकी खोरे लोमा च्यिङ्ङीतिवाला तिराङ कुतुक टि गल्नी त खुरुङला काङ ख्येल्गिवी सिरुप ति तिवाला सुङ्सुङ,
33 “ल्होसा, त दाक्पु यरूशलेमला डोयी वे। ते लेप्सिमा मी पुज्युङला कोङ्यार छ्येतिवा ताङ यहूदी छ्योकी गेकेनतिवी क्येन तेर्किवी, तमा तिवी तीला सेतुप छ्येर्पा कल्नी यहूदी मिन्दुप मिरिक यम्बातिवी लकला चेक तेकितो।
34 तिवी तीला मर्च्या किवी, छ्यिन्दुर ग्यकिवी, तमा तल्ज्येक ग्यप्नी सेकिवी। यिने ङ्यिमा सुमकी तिङ्ला ती ति सेन्बु लङ्गिवी।”
याकूब ताङ यूहन्नाकी येशूला गोङ्बा शुवु
(मत्ती २०:२०-२८)
35 ती ज्युक्ला जब्दियाकी पुज्युङ याकूब ताङ यूहन्ना ति येशूकी चाला वानी, “गेकेन, ङ्यिरा गेकेनला काङ लङ्सिनाङ ती ति ङ्यिराङला नङ्शी सिरुप ति ङ्यिरा नो वे।” सिनी सिक्यासुङ।
36 येशूकी तिवाला टि नाङ्सुङ, “ङे ख्यिरा थोक्ला काङ किशी सिरुप नो किवी?”
37 तिवी खोला सिक्यासुङ, “गेकेनला मोवा ङ्येतुप पेला ङ्यिराङ ङ्यिवुला च्यिक ति गेकेनकी यावी थाकाला, च्यिक ति येन्बी थाकाला देतुप ङ्येशी।”
38 तमा येशूकी “ख्यिरा काङ लोङ्गुप ति ख्यिराङला राङ छ्या मे। ङे थुङ्गुप दुक्पाकी कोरा नेमा ख्यिरा थुङ थुप्किवी? तमा ङे लङ्गुप बप्तिस्मा ख्यिरा लङ थुप्किवी?” सिनी सुङ्सुङ।
39 तिवी खोला “कि थुप्किवी।” सिनी सिक्यासुङ। तमा येशूकी तिवाला सुङ्सुङ, “यिन, ङे थुङ्गुप कोरा नेमा ख्यिरा थुङ्गिवी, ङे लङ्गुप बप्तिस्मा ख्यिरा लङ्गिवी।
40 यिने ङे यावी थाका ताङ येन्बी थाकाला देतुप ति ङे कि ज्यितुप मिन। ती ति कोन्छ्योककी सी थोक्ला टडिक क्यावे, तीला राङ देतुप ङ्येकिवी।”
41 ती थोनी लोमा च्यिथम्बातिवा याकूब ताङ यूहन्नाला ङ्यिर्मु क्यासुङ।
42 तमा येशूकी लोमातिवाला मुला राङ खोरे चाला कताङ्नी सुङ्सुङ, “ख्यिराङला छ्या वे, दी जम्बुलिङला ग्येला कितुपतिवी खोरो लुङ्बाकी मीतिवाला ओङ्ज्येन किवी। तमा ग्येल्वी ओङला लाका कितुपतिवी साङ मीतिवाला ओङ्ज्येन किवी।
43 यिने ख्यिरा पर्ला ति तुकै कितुप मेङ्गिवी। ख्यिरा पर्ला सु छ्ये डोप नो किवे, तीकी ख्यिराङ तेरीकी शब्ज्यी कितुप च्युङ गोकिवी।
44 तमा ख्यिरा पर्ला सु गोमाला थेन्दुप नो किवे, तीकी तेरी मीतिवी योक्पु च्युङ गोकिवी।
45 च्यिलासिसिन ङ मी पुज्युङ ति खोरुङला शब्ज्यी लङ्गुपला वावु मिन, यिने मीतिवाला शब्ज्यी कितुपला वावु यिन। तमा मी मङ्मुला थर ज्यितुपला खोरो मिजी तेरुपला वावु यिन।”
येशूकी बारतिमैला मिक थोङ थुपुप जोवु
(मत्ती २०:२९-३४; लूका १८:३५-४३)
46 तमा येशू लोमातिवी मुला यरीहो ग्येसाला फेप्सुङ। खोतिवा मी मङ्मु ताङ मुला ती ग्येसा क्युर ज्याक्नी फेप्सालेन्सिन तिमैकी पुज्युङ बारतिमै सिरुप मिक मोथोङ्गुप ति लामला लोङ्यिन सिरा देन्नोक।
47 ती बारतिमै तीकी नासरतकी येशू फेपिन नोक सिरुप ति थोनी, “ओ दाऊदकी सेवु येशू, ङला ङ्यिङ्ज्ये की!” सिनी थोर ग्यप्सुङ।
48 मी मङ्मुकी तीला खरक्पा दे सिनी वोरु तेन्सिनाङ तीकी मङ ल्हक्पा थोर ग्यप्नी, “ओ, दाऊदकी सेवु येशू, ङला ङ्यिङ्ज्ये की!” सिनी सिक्यासुङ।
49 येशू फेपिन फेपिन टङी लानी, “तीला छुर कतोङ।” सिनी सुङ्सुङ। तमा मीतिवी ती मिक मोथोङ्गुप तीला कताङ्नी सिक्यासुङ, “ङाडेङ क्यानी येर लो। खोकी ख्युरुङला कतोङ्यिन नोक।”
50 ती थोसिमा तीकी खोरो खयिटो पिन क्युर्नी खोक लानी खोकी चाला वासुङ।
51 तमा येशूकी तीला टि नाङ्सुङ, “ख्योरो थोक्ला ङे काङ कितुप?” ती मिक मोथोङ्गुप तीकी खोला “गेकेन, ङे मिक थोङ थुपुप डोशी।” सिनी गोङ्बा शुसुङ।
52 येशूकी तीला “ख्युरुङ ग्युक। ख्योरो ङला तेपा क्यावु तप्की ख्योरो मिक थोङ थुपुप गाल्सुङ।” सिनी सुङ्सुङ। ती पेला राङ शार्क्येक तीकी मिक थोङ थुपुप गल्नी येशूकी तिङ्ला तिङ्यासुङ।