7
कोङ्यार छ्ये मल्कीसेदेककी कोर्ला
1 ती मल्कीसेदेक ति शालेमकी ग्येल्वु ताङ चोछ्येवु कोन्छ्योककी कोङ्यार यिनोक। अब्राहामकी ग्येल्वुतिवी मुला मक ग्यप्नी तिवी खला ग्येल्नी लोङ वुङ्गुप पेला तीकी अब्राहामला ठेनी मोलाम बिन्दुप यिन।
2 तमा अब्राहामकी साङ खोरो मक नेसुर ग्येल्नी खुर वावु तेरी च्यालकतिवी नाङ्ला छो च्यिथम्बी नाङ ने छो च्यिक ति मल्कीसेदेकला बुल्वा पुल्नोक।
मल्कीसेदेक सिक्यावु तेन्दोक ति गोमाला टेङ्बुकी ग्येल्वु सिक्यावु यिन। तमा ती ज्युक्ला शालेमकी ग्येल्वु साङ च्युङ्गुप तप्की तीला लोदिमुकी ग्येल्वु सिक्यावु यिन।
3 ती मल्कीसेदेककी पपाआमा ताङ पगावा हङ्गावातिवा सु यिन सिरुप ति कोन्छ्योककी सुङगी नाङ्ला कनी साङ टिनी मे। तमा खो क्येवु ताङ खो शेपकी कोर्ला साङ टिनी मे। यिने खो ति कोन्छ्योककी सेवु दोके क्यानी नरीकी थोक्ला कोङ्यार च्युङ्नी देकिवी।
4 तुक क्यानी मल्कीसेदेक चो ओङ छ्येवु नोक सिरुप ति ख्यिरा नासाम तोङ। दाक्पी हङ्गावा अब्राहामकी साङ खोरो मक नेसुर ग्येल्नी खुन वावु तेरी च्यालकतिवी नाङ्ला छो च्यिथम्बी नाङ ने छो च्यिक ति तीला पुल्सुङ।
5 लेवीकी गिपाकी कोङ्यारतिवा तेरी अब्राहामकी पेजातिवा यिन्सिनाङ तिवी खोरो इस्राएलकी मीतिवी शम्बुप टोङ्बी नाङ नेसुर च्यिथम्बी नाङ ने च्यिक ति दुकिवी। ती ति तिवाला ठिमकी कि च्यितुप यिन।
6 यिने मल्कीसेदेक याङ लेवीकी गिपा मिन। यिन्सिनाङ अब्राहाम नेसुर च्यिथम्बी नाङ ने च्यिक ति लासुङ। तमा कोन्छ्योककी थाक्छ्येन नङ्गुप ति थोपुप अब्राहामला तीकी मोलाम बिन्सुङ।
7 मोलाम थोपुप ति सिनाङ मोलाम तेरुप ति छ्ये यिन सिरुप ति तेरीला छ्या वे।
8 माङ्शोक मीतिवी च्यिथम्बा नाङ्ला च्यिक ति कोङ्यारला बुल्गिवी, यिने तेरी कोङ्यारतिवी नाङ्ला मल्कीसेदेक मिसिन तेरी कोङ्यारतिवा शिवी। च्यिलासिसिन कोन्छ्योककी सुङला खो ति सेन्बु वे सिनी सुङ वे।
9 त याङ मीतिवी च्यिथम्बा नाङ्ला च्यिक ति लेवीकी गिपाला बुल्गिवी। तुक क्यासिन अब्राहामकी मल्कीसेदेकला च्यिथम्बा नाङ्ला च्यिक ति बुलुप पेला लेवीकी साङ खोला च्यिथम्बा नाङ्ला च्यिक ति पुल्सुङ सिनी सि थुप्किवी।
10 च्यिलासिसिन अब्राहामकी मल्कीसेदेकला च्यिथम्बा नाङ्ला च्यिक ति पुल्सिमा लेवी ति अब्राहामकी गिपाला क्येसुङ। यिन्सिनाङ अब्राहामकी मल्कीसेदेकला ठेतुप पेला सेक लेवी ति माक्येनोक।
येशू मल्कीसेदेक दोके वोतुप कोर्ला
11 इस्राएलकी मीतिवाला नङ्गुप मोशाकी ठिमला लेवीकी गिपातिवाला कोङ्यारकी लाका कितुप ओङ्ज्येन नाङ्सुङ। यिन्सिनाङ ती कोङ्यारतिवी नाङ ने सी साङ मीतिवाला टेङ्बु जो माथुप्नोक। तुक क्यानी मल्कीसेदेक दोके हारूनकी गिपा सिनाङ यम्बा कोङ्यार च्यिक वुङ गोकिवी।
12 दोजो कोङ्यारतिवा बेतुप लुक्सु पोसिन मोशाकी ठिम साङ फो राङ गोकिवी।
13 च्यिलासिसिन सी कोर्ला ती ताम्ङेतिवा सिक्यावे, खो ति यम्बा गिपाकी ति यिन। खोकी गिपाला सी साङ जिन्बा बुलुप दासाला कोङ्यार छ्येकी लाका माक्या वे।
14 दी ताम्ङे ति तेरीला छ्या वे, दाक्पी चोवो येशू ति यहूदाकी गिपा नेसुर च्युङ्सुङ। यिन्सिनाङ यहूदाकी गिपा नेसुर कोङ्यार च्युङ्गुप कोर्ला ति मोशाकी काङ साङ सिमाक्या।
15 मल्कीसेदेक दोके यम्बा कोङ्यार मिरा च्यिक वावु यिन्सिन दाक्पी काङ सिक्यासिनाङ ती ताम्ङे ति छासे ल्यामु क्यानी हाक्कोवु च्युङ्गिवी।
16 खो मीतिवी जोवु ठिम नेसुर कोङ्यार च्युङ्गुप मिन, यिने नाम्साङ मिशिवु ङार नेसुर कोङ्यार च्युङ्गुप यिन।
17 तीकी कोर्ला कोन्छ्योककी सुङला साङ
“ख्युरुङ ति मल्कीसेदेक दोके नरीकी नरी थोक्ला कोङ्यार यिनो।”
सिनी टि वे।
18 ती ठिम ङ्यिङ्बा ति काङ साङ कि मुथुपुप ताङ फेन मोथोवु तप्की क्युर्नी ज्यकुप यिन।
19 च्यिलासिसिन ती ठिमकी सुला साङ कोन्छ्योककी थोङ्दाङला टेङ्बु जो माथुप। तुक क्यानी तीकी छापला कोन्छ्योककी दाक्पुला मङ ल्यामु रेवा च्यिक नङ वे। ती रेवाकी दाक्पुला कोन्छ्योककी चाला क्योल्गिवी।
20 यम्बा ताम्ङे च्यिक ति काङ यिन सिसिन कोन्छ्योककी न क्यलुप यिन। लेवीकी गिपा नेसुर कोङ्यार च्युङ्गुप पेला कोन्छ्योककी न माक्याल, यिने येशूला कोङ्यार जो नङ्गुप पेला ति खोकी न क्याल्सुङ।
21 कोन्छ्योककी खोला न क्यल्नी कोङ्यार जो नङ्गुप कोर्ला खोकी दुक सुङ्नी वे,
“चोवो कोन्छ्योककी न क्यलुप ति नाम्साङ मोपोवी।
ख्युरुङ नरीकी नरी थोक्ला कोङ्यार यिनो।”
22 तुक सुङ्गुप तप्की येशू ति कोन्छ्योक ताङ मीकी पर्ला थाक्छ्येवु ताम्ङेकी थोक्ला तेन्तेन क्या नाङ्सुङ।
23 येलुङ यम्बा ताम्ङे च्यिक ति काङ यिन सिसिन गोमाला ति कोङ्यारतिवा बङी वोसिनाङ तिवी कोङ्यारकी लाका ति नरी कि माथुप्नोक। च्यिलासिसिन तिवा ङ्यिमा च्यिक शिवी।
24 यिने येशू ति नरीकी नरी ङोसु ज्युवु तप्की खो नरीकी थोक्ला कोङ्यारकी लाका कितुप च्युङ्सुङ।
25 तुक क्यानी खोला तेपा क्यानी कोन्छ्योककी चिप्ला वुङ्गुपतिवा तेरीला खोकी वुतुङ के दिक्पा ने थर ज्यिकिवी। च्यिलासिसिन तेपा कितुपतिवी थोक्ला कोन्छ्योकला मोपोर ताङ गोङ्बा शोपला खो नरी ङोसु ज्युकिवी।
26 दाक्पी थोक्ला गोवु कोङ्यार छ्ये ति येशू यिन। खो चाङ्मा ताङ क्येन मेतुप ताङ टेङ्बु वे, तमा दिक्छेनतिवा नेसुर कुतुक पेनी देवाच्येन सिनाङ येर तेक्नी वे।
27 खो ति यम्बा कोङ्यार छ्येतिवा दोके मिन। यम्बा कोङ्यार छ्येतिवी खोरो दिक्पी थोक्ला ताङ ती ज्युक्ला मी यम्बी दिक्पी थोक्ला ङ्यिमी टेङ जिन्बा तोङ गोकिवी, यिने खो याङ थेङ्मा च्यिकला राङ खोरो मिजी ति जिन्बा च्युङ्सुङ।
28 मोशाकी ठिमकी याङ खोकी सुङ्गुप दोके कि मुथुपुप मीतिवाला कोङ्यार छ्ये सिनी चिसुङ, यिने ती ठिमकी ज्युक्ला वावु कोन्छ्योककी थाक्छ्येन नङ्गुप सुङगी नरीकी थोक्ला खोकी सुङ्गुप दोके वुतुङ के तेरी क्या नङ्गुप खोरे पुज्युङला पेन नाङ्सुङ।