12
कोन्छ्योककी नङ्गुप छालेनकी कोर्ला
1 दाक्पी गारी गुरीला कोन्छ्योकला तेपा कितुप कोर्ला पङ्बु तेरुप मीतिवा छासे मङ्मु वे। तुक क्यानी दाक्पी मिजीला तोक्सा छोकुपतिवा ताङ दाक्पुला क्येक्नी ज्योकुप दिक्पातिवा क्युर ज्यकुप, तमा दाक्पु लेप गोवु थाकाला तिराङ ल्हानी हम क्यानी छ्योङ्बाल ग्यकुप।
2 तमा दाक्पी तेपा गो जुवु ताङ ती तेरी छे ज्यितुप चोवो येशूला तिराङ नरी ल्हाप। खोकी खोरे दोङ्ला वोतुप गाकी थोक्ला मीतिवी मारे तङ्सिनाङ काङ नो माक्यानी हम क्यानी ग्यङ्शिङ लोला टुङ्सुङ। तमा कोन्छ्योककी ग्येल्ठिककी यावी थाकाला ज्युसुङ।
3 ख्यिराङ चो दुक्पा खुर गोसिनाङ येन छ्येनी यिछ्येता मिकिवुला मी दिक्छेनतिवी चो ङ्यिङ्मर क्यासिनाङ हम क्यानी देतुप येशूला नासाम तोङ।
4 ख्यिरा याङ तन्दा सेक सी साङ दिक्पा मिकिवु तेन्दोकला रङगी मिजी साङ तेर गोवु क्यानी थमु ग्यक मागो वे।
5 तमा काङ कोन्छ्योककी सुङगी नाङ्ला ख्यिराङला खोरो पुज्युङतिवाला दोके दुक सिनी टोङ्गु बिन्दुप ति ख्यिरा टोक ज्येसुङ? खोकी दुक सिनी सुङ वे,
“ओ ङे पुज्युङ, चोवो कोन्छ्योककी ख्युरुङला ल्यामु च्युङ्शी सिनी छालेन बिन्दुप ति खोङ्याम की,
खोकी ख्युरुङला कप्क्येन नङ्गुप पेला ख्युरुङ यिछ्येता माकी।
6 च्यिलासिसिन खोकी सुला ङ्यिङ्ज्ये क्या नङ्गिवे,
तीला पर्च्या साङ तेर्किवी।
तमा खोकी खोरे पुज्युङ सिनी चिवुतिवाला छ्येर्पा साङ तेर्किवी।”
7 कोन्छ्योककी ख्यिराङला छालेन नङ्गुप पेला ख्यिराङ हम क्यानी दे। च्यिलासिसिन खोकी ख्यिराङला पपी खोरो पुज्युङला कितुप दोके क्या नङ्यिन वे। काङ पपी खोरो पुज्युङतिवाला छालेन मेतेर्वी रो?
8 पपी खोरो पुज्युङपुमतिवाला छालेन बिन्दुप दोके क्यानी कोन्छ्योककी ख्यिराङला छालेन मानाङ्सिन ख्यिराङ खोकी पुज्युङपुम मिन, शम्डेन क्यानी क्येवु पुज्युङपुम यिन।
9 तोजो तिराङ मिन, जम्बुलिङला वोतुप दाक्पी पपी दाक्पुला छालेन बिन्सिनाङ दाक्पी पपाला ताङ्देन क्यासुङ सिसिन मङ देवाच्येनला वोतुप पपा कोन्छ्योककी ओङला दे मोगोवी रो?
10 च्यिलासिसिन जम्बुलिङकी पपी खोप्रे नोवाला वोतुप दोके क्यानी दाक्पुला ङ्यिमा चेयी पर सेक लाम ल्यामुला युक ज्यितुपला छालेन बिन्सुङ, यिने कोन्छ्योककी याङ दाक्पु ति खो दोके टेङ्बु च्युङ थुप्शी, तमा दाक्पुला ल्यामु च्युङ्शी सिनी छालेन नङ्गिवी।
11 ती तेरी छालेन ति दाक्पुला ख्येलुप पेला गोमाला याङ सेमला गा मालङ्गिवी, छासे कले गिवी। यिन्सिनाङ ती छालेन नेसुर तालिम ङ्येसिमा ती ज्युक्ला कोन्छ्योककी थोङ्दाङला दाक्पुला टेङ्बु ताङ लोदिमु वोतुप मिजी ङ्येकिवी।
12 तुक क्यानी ङार मेतुप लाक्पातिवा येर लोङ, तमा रम्बु मेतुप काङ्बी छिङ्गुरतिवा साङ रम्बु जोसा।
13 तमा ख्यिराङ युकुप लाम ति थेकाङ जोसा, तुक क्यासिन काङ्बा रम्बु मेतुपतिवी काङ्बी छिङ्गुर ति मोटोल्शी, यिने टेक्शी।
कोन्छ्योककी कटिनला क्युर्नी माज्योक
14 तेरी मीतिवी मुला लोदिमु क्यानी थिन्नी दे थुपा की, तमा टेङ्बु क्यानी मिजी क्योङ थुपा की। टेङ्बु मेसिन सी साङ कोन्छ्योकला मोथोङ्गिवी।
15 नासाम तोङा, ख्यिराङ सु साङ कोन्छ्योक नेमा थोपुप कटिनला क्युर्नी मोज्योक्शिता, तमा सेमला लाका मेलोवा कितुप नासाम माज्योक। नासाम मेलोवा ज्याक्सिन तीकी मङ मङ फेल्नी मी बङीला मेटेङ्बु जेवी।
16 ख्यिरा पर्ला सु साङ शम्डेनकी लाका माकी। तमा एसाव दोके कोन्छ्योकला ङ्याम मिकिवु माकी। तीकी समा छेक च्यिककी थोक्ला पुज्युङ छ्येकी ओङ साङ चोनी सोसुङ।
17 ख्यिराङला छ्या राङ वे, ती ज्युक्ला तीकी खोरो पपा नेमा थोप गोवु मोलाम ति थोपुप छाल्सुङ, यिन्सिनाङ तीला माबिन। च्यिलासिसिन तीकी मिक्च्युर ताङ्नी ती मोलाम थोपुप छाल्सिनाङ तीकी सेम ग्युरुप तुजे माच्युङ।
18 ख्यिराङ वावु दासा ति गोमाला इस्राएलकी मीतिवा सीनै रीला गलुप दोके मिन। ती दासाला ति थो तोङ थुपुप ताङ मे छेन्दी बरुप ताङ मुक्पा नक्पु छुपुप ताङ नक्तोमी ताङ छासे लुङ छ्यर्वा ग्यकुप ताङ
19 ग्येलिङ पुवु वोरु ताङ कोन्छ्योककी सुङ मेरुप वोरु देन्गिनोक। ती वोरु थोवु मीतिवी तुका वोरु ति येलुङ मोथोशी सिनी गोङ्बा पुल्सुङ।
20 च्यिलासिसिन “दोजो सेम्ज्येनकी ती रीला रेक्सिन तीला दो पोप्नी से!” सिनी कोन्छ्योककी क नङ्गुप सुङला तिवा युक माथुप्नोक।
21 ते वोतुप थोङ्छ्योल ति छासे ज्यिवा लङ्गुप नोक। तुक क्यानी मोशाकी साङ “ङ ज्यिवा लानी र्हुकिन वे” सिनी सिक्या वे।
22 यिने ख्यिराङ वावु दासा ति सियोन री ताङ देवाच्येनकी यरूशलेमला राङ यिन। ती दासा ति ङोसु वोतुप कोन्छ्योककी ग्येसा यिन। ख्यिराङ तोङ्डा बङी देवाच्येनकी लेन क्योलुप थुतिवा जोम्नी लोदिमुकी तुछ्येन तेन्दुप दासाला वानी वे।
23 तमा ख्यिराङ याङ गोमाला क्येवु पुज्युङ दोके वोतुप तेपा कितुप मीतिवा तेरी जोम्बुप चर्चला वानी वे। तिवी मिङ तेरी ति देवाच्येनला टिनी ज्याङ वे। तमा ख्यिराङ याङ तेरी मीतिवाला ठिम क्या नङ्गुप कोन्छ्योक ताङ खोकी खोरे मोवा वोतुप दोके क्यानी टेङ्बु जोवु मीतिवी थुतिवा वोतुप दासाला वानी वे।
24 तमा ख्यिराङ याङ कोन्छ्योक ताङ मीतिवी पर्ला थाक्छ्येतुप ताम्ङे सम्बा जो नङ्गुप येशू ताङ खोकी थोरुप ठकला वा वे। ती ठक ति हाबिलकी ठक सिनाङ मङ ल्यामो क्यानी दाक्पुला येन्देन तेर्किवी।
25 तुक क्यानी ख्यिराङ च्याङ्से देनी कोन्छ्योककी सुङ्गुप कला ल्यामो क्यानी ङ्येन। सीनै री नेसुर मोशाकी बिन्दुप कला मेङ्येन्दुप मीतिवा थर माथुप सिसिन देवाच्येन नेमा नङ्गुप कोन्छ्योककी कला मेङ्येन्दुप दाक्पु चुक क्यानी थर थुप्किवी रो?
26 सीनै रीला कोन्छ्योककी क नङ्गुप वोरुकी जम्बुलिङ तिराङ योसुङ, यिने त याङ खोकी दुक सुङ्नी थाक्छ्येन नङ वे, “तरोङ ङ जम्बुलिङ तिराङ योक ज्यितुप मिन, देवाच्येन साङ येलुङ थेङ्मा च्यिक योक ज्यितिनो।”
27 “येलुङ थेङ्मा च्यिक” सिक्यावु सुङगी तेन्दोक ति दी यिन, कोन्छ्योककी ज्येवु च्यालकतिवा योक थुपुप ताङ दोक थुप्किवी। तुक क्यासिन योक मुथुपुप च्यालकतिवा तिराङ लुकिवी।
28 तुक क्यानी योक मुथुपुप कोन्छ्योककी ग्येल्खाप थोपुप तप्की दाक्पु कोन्छ्योकला थुचिछे बुलुप। तमा खोला नरी ज्यिवा ताङ ताङ्देन कियी सिरा खोकी सेमला डोप सोवा बुलुप।
29 च्यिलासिसिन दाक्पी कोन्छ्योक ति पुसुकी जोप मे यिन।