10
ख्रीष्ट थेङ्मा च्यिकला तेरीकी थोक्ला जिन्बा च्युङ्गुप
1 मोशाकी ठिम ति वुतुङ्की ताम्ङे टेङ्बु मिन, यिने ज्युक्ला वुङ्गुप ताम्ङे ल्यामुकी पेशुवु तिराङ यिन। तुक क्यानी ले टेङ येलुङ येलुङ जिन्बा पुल्नी कोन्छ्योककी चिप्ला डोप छोलुप मीतिवाला टेङ्बु जो मुथुपी।
2 दोजो ती जिन्बा पुल्नी मी दिक्पातिवा नरीकी थोक्ला ताकिवी सिसिन ती जिन्बा तोङ्गुपतिवा थेङ्मा च्यिकला राङ टेङ्बु च्युङ्नी तिवी दिक्पी थोक्ला नासाम राङ तोङ मोगोवु ति यिन्जा। तमा ती जिन्बा बुलुप ति क्युर्नी ज्योकुप यिन्जा।
3 यिने ती जिन्बा तोङ्गुप लाका क्यानी याङ दाक्पुला ले टेङ ङ दिक्छेन यिन सिरुप नासाम शर ज्यिकिवी।
4 च्यिलासिसिन लङ्डु ताङ रौकी ठककी नाम्साङ मी दिक्पा ता ज्यि मुथुपी।
5 तुक क्यानी ख्रीष्ट दी जम्बुलिङला फेपुप पेला खोकी कोन्छ्योकला दुक सुङ्नी वे,
“जिन्बा ताङ बुल्वातिवा चोवोला मोगोवी,
यिने चोवोकी ङे थोक्ला जु च्यिक टडिक क्या नङ वे।
6 मीतिवी सेम्ज्येन सेनी र्हेसिमा जिन्बा पुलुप ताङ दिक्पी थोक्ला बुल्वा पुलुप ति चोवोला गा मलङ्गिवी।
7 तमा ङे ‘ओ कोन्छ्योक, ल्हो ताङ ङ दे वे।
कोन्छ्योककी सुङला ङे कोर्ला टि वोतुप दोके ङ ख्योरे नोवाला वोतुपतिवा तेरी छे ज्यितुपला वावु यिन।’ सिनी सिक्यायी।”
8 गोमाला खोकी दुक सुङ्नी वे, “जिन्बा ताङ बुल्वातिवा ताङ सेम्ज्येन सेनी र्हेसिमा जिन्बा पुलुप ताङ दिक्पी थोक्ला बुल्वा पुलुप ति चोवोला मागोसुङ, तमा गा साङ माक्यासुङ।” यिन्सिनाङ तिवा ति कोन्छ्योककी ठिमला सुङ्गुप दोके क्यावु तिराङ यिन।
9 ज्युक्ला येलुङ खोकी दुक सुङ्सुङ, “ओ चोवो कोन्छ्योक, चोवोकी नोवाला वोतुपतिवा तेरी छे ज्यितुपला ङ वायिन।” कोन्छ्योककी गोमी जिन्बातिवा क्युर्नी तीकी छापला यम्बा च्यिक टडिक क्या नाङ्सुङ।
10 तुक क्यानी ती कोन्छ्योककी नोवा तेरी छे ज्यितुपला राङ येशू ख्रीष्ट खुरुङ राङ थेङ्मा च्यिकला राङ जिन्बा च्युङ्नी दाक्पुला टेङ्बु जो नाङ्सुङ।
11 तेरी कोङ्यारतिवा जिन्बा नम्बा च्यिक तिराङ येलुङ येलुङ बुलुपला ङ्यिमी टेङ शब्ज्यी कितुपला लानी देकिवी। यिने ती बुल्वाकी नाम्साङ दिक्पा ता ज्यि मुथुपी।
12 यिने ख्रीष्टकी याङ थेङ्मा च्यिकला नरीकी थोक्ला खोरुङ राङ जिन्बा च्युङ्सुङ। तमा खो कोन्छ्योककी यावी थाकाला ज्युसुङ।
13 तमा खोकी खोरे डतिवाला खोरे शपकी वोक्ला मालेप्वा सेककी थोक्ला खो गुनी देन वे।
14 तमा खो च्यिक राङ जिन्बा च्युङ्नी दिक्पा नेसुर चाङ्मा जोवु मीतिवा तेरीला नरीकी थोक्ला टेङ्बु जो नाङ्सुङ।
15 तुक क्यानी कोन्छ्योककी थु चाङ्माकी साङ दाक्पुला खोकी सुङ्गुप ताम्ङेतिवा गोमाला दुक सिनी पङ्बु तेर्किवी,
16 “चोवो कोन्छ्योककी तुक सिनी सुङ्गिवी,
‘ज्युक्थमी ङ्यिमाला तिवी मुला ङे थाक्छ्येतुप ताम्ङे ति दी राङ यिनो,
ङ ङे ठिम ति तिवी सेमला ज्योकिनो,
तमा तिवी नासामला साङ टिनी तेरिनो।’ ”
17 येलुङ खोकी दुक साङ सुङ्गिवी,
“तिवी क्यावु दिक्पा ताङ तिवी क्यावु लाका दुक्टातिवा ङ येलुङ नासाम मोतोङ।”
18 त याङ तेरी दिक्पातिवा माफ बिन्दुप तप्की येलुङ दिक्पी थोक्ला काङ साङ जिन्बा बुल मोगोवी।
तेन्तेन क्यावु रेवाला रम्बु क्यानी देतुप कोर्ला
19 तुक क्यानी अच्युनुपतिवा, त याङ येशूकी ठककी जोसालेन्सिन दाक्पु तेरी सिनाङ चाङ्मा वोतुप दासाला ङाडेङ क्यानी शुकुप ङ्येकिवी।
20 खो टुङ्सिमा दाक्पुला चाङ्मा वोतुप कुरकी नङगी गोयोल नेसुर मिजी सम्बा थोपुप लाम सम्बा पेनी वे। ती गोयोलकी तेन्दोक ति खोकी जु यिन।
21 कोन्छ्योककी मिछाङला दाक्पी थोक्ला चोछ्येवु कोङ्यार मिरा च्यिक वोतुप तप्की
22 दाक्पी सेम टेङ्बु नेसुर तेपा रम्बु जोनी कोन्छ्योककी चिप्ला डोप। तमा दाक्पी सेमला येशूकी ठक थोर्नी दुक्टा क्यासिमा सेम नेसुर वुङ्गुप क्येन ति टेङ्बु जोप ताङ दाक्पी जु ति छ्यु चेङ्गा थ्वोनी टुवु दोके टेङ्बु च्युङ्नी वे।
23 दाक्पुला थाक्छ्येन नङ्गुप कोन्छ्योक ति खोङ्तेर्मु वोतुप तप्की दाक्पु यिसिक मिसिक माक्यानी मीतिवी दोङ्ला दाक्पी ताम्ङे क्यावु रेवाला रम्बु क्यानी देतुप।
24 तमा दाक्पु च्यिककी च्यिकला ङ्यिङ्ज्ये कितुप ताङ लाका ल्यामु कितुपला चुक क्यानी टोङ्गु तेर गोकिवी, तीकी थोक्ला नासाम तोङ्गुप।
25 मी ललाइकी मुला राङ जोम्नी डिक्जोम कितुप क्युर्किवी, यिने दाक्पु ति डिक्जोम कितुप क्युर्नी मोज्योक। यिने चोवो फेपुप तुजे चिप्ला राङ वावु ति हाक्कोवा क्यानी च्यिककी च्यिकला मङ तेपा रम्बु जोपला टोङ्गु तेरुप।
26 दोजो दाक्पी टेङ्बु काङ यिन सिरुप ति छ्या वोसिनाङ दिक्पा क्या क्यावा राङ देकिवी सिसिन तफेन्ला दाक्पी क्यावु दिक्पा तावुला यम्बा जिन्बाकी काङ साङ कि मुथुपी।
27 बोरु कोन्छ्योककी ज्यिवा लङ्गुप ठिम क्या नङ्गुप ताङ खोकी तेन्दोकला लङ्गुप मीतिवाला ना तोङ्गुप छासे मे छेन्दी तिराङ दाक्पी थोक्ला लुवु ति नासाम तोङ।
28 कोन्छ्योककी मोशाला नङ्गुप ठिम मेङ्येन्दुप मी ललाइकी कोर्ला मिरा ङ्यी सुमकी पङ्बु बिन्सिन तीला च्यम्बा माक्यावा क्यानी से गोवु लुक्सु वे सिसिन,
29 कोन्छ्योककी सेवुला मारे तोङ्गुपतिवा ताङ खुरुङला चाङ्मा जोवु कोन्छ्योककी थाक्छ्येतुप ठकला मेचेङ्गा जोप ताङ कटिन नङ्गुप खोकी थु चाङ्माला मारे तोङ्गुपतिवाला मङ छासे पर्च्या फोकिवी। ती ति ख्यिराङ राङ नासाम तोङ।
30 च्यिलासिसिन “ङ्येन लङ्गुप ति ङ यिन। ङ राङ तिवाला ङ्येन लङ्यिन।” सिनी सुङ्गुप तीला दाक्पी ङो शेकिवी। येलुङ “चोवो कोन्छ्योककी राङ खोकी मीतिवी लाका ल्यामु मेलोवा काङ क्यावे, तीकी थोक्ला ठिम क्या नङ्गिवी।” सिनी सुङ वे।
31 तुक क्यानी ङोसु वोतुप कोन्छ्योककी ठिम क्या नङ्गुप लकला ख्येलुप ति छासे ज्यिवा लङ्गुप ताम्ङे यिन।
32 ख्यिराङ थल्माला ख्रीष्टला तेपा क्यावु पेलाकी ताम्ङेतिवा नरी नासाम तोङ। ती पेला ख्यिरा चो दुक्पा खुर्सिनाङ हम क्यानी देसुङ।
33 तोजो पेला माङ्शोक मीतिवी ख्यिराङला तेरी मीतिवी मिङ्गाला मारे तोङ्गुप ताङ छेटाङ बिन्सुङ। यम्बा पेला ति ख्यिरा यम्बा दुक्पा खुरुप मीतिवी मुला दुक्पा खुर्सुङ।
34 तमा चोन्खाङला शोरुप मीतिवाला ख्यिरा च्यम्बा क्यासुङ, ख्यिरा टोङ्बा मीतिवी ठोसिनाङ ख्यिराङ गा क्यानी हम क्या देसुङ। च्यिलासिसिन ख्यिरा मुला ती सिनाङ मङ ल्यामु ताङ नरी लुवु टोङ्बा वे सिरुप ति ख्यिराङला छ्या नोक।
35 तुक क्यानी ख्यिरा तेन्तेन क्यावु ति क्युर्नी माज्योक। तमा कोन्छ्योककी ख्यिराङला छासे खक्छ्येवु छ्यक्तक ग्येर्पु नङ्गिवी।
36 तमा कोन्छ्योककी नोवाला वोतुप ति तेरी डुप्सिमा खोकी ख्यिरा थोक्ला थाक्छ्येन नङ्गुप ति थोपुपला ख्यिराङ नरी हम क्यानी दे गोकिवी।
37 च्यिलासिसिन कोन्छ्योककी सुङला
“फेप्किवी सिनी सुङ्गुप ति छासे ङमु राङ फेप्किवी,
फिमु मिकिवी।
38 ङे थोङ्दाङला टेङ्बु च्युङ्गुप मीतिवा ति ङला तेपा क्यानी सेन्बु लुकिवी,
यिने ङला तेपा कितुप क्युर्नी ज्योकुप तीकी मुला ति ङ गा मिकी।” सिनी टि वे।
39 दाक्पु याङ तेपा कितुप क्युर्नी ना डोप मीतिवा दोके मिन, बोरु तेपा क्यानी दिक्पा ने थरुपतिवा यिन।