11
Yeso ka ana o tare o Yohana o batisma
(Luk 7:18-35)
1 Malooka Yeso ka mare ozoola a atoma kai betuuru ka leere name, na ka ere aa rana me na ka ale aaka baale ka o zoola a topepeng to Galili.
2 A were me Yohana ko batisma kaya apate aa kwilǝ ana o ezaza epa eburu, nawa kone epa eka Almasipu ya eza me, nawa tong ana o tare o wai ara Yeso
3 kane pirkǝ wai na, “Boa ondooka waya deya na, na te kare ayizi a ondo na?”
4 Na Yeso kabare nee na, “Kurǝna ka e bekaa Yohana epa eeka ee laka kangza ka ee kaa ekone,
5 obena arǝ na cǝ o laka ara, aa agǝdǝ neya teyeno, agangca ne kurǝ a sangsang, arara neya konaza ngmǝ, aa ya arsaza andaaka na gbwizǝ kangza a nya ana o dera cǝ oroka o lebo.
6 Ondo okona oleba ondooka waata cǝwǝ aa zaa o eke lenyong le wai aza ong ne.”
7 Nangka ne ale, na Yeso bore obeya angmǝ ka aromo a cake a zaa Yohana na, “E ale owake nee laka eya? E laka mawake maaka obere ya paba me na?
8 Na ee surǝ ka e laka eya? Ondo ka wa amba madibi maa rere na? Aromo akwilǝ ogomo neya ambaza madibi maa rere.
9 Na eya ee surǝ a laka me? Ondo obeya angmǝ ka mawo ma Ashili na? Nyimia, eyang bele oying na, wa dongdong kala ondo obeya angmǝ ka mawo ma Ashili.
10 Ondo ona a wele aa zaa wai na, “Laka na, ma tong ka o otoma ong kawa kala a izi au, ondooka wayo babarau orona zongka o de.
11 Eyang dongdong belle oying, ata a tukǝ o ngmenga ondo a nyimi lerambo leena ka wa dukǝ Yohana o batisma ogonga ne, pate kaa nyimi, ondooka kala a be baate a togomo te zaa shili wa kala wai.
12 O era a were o Yohana o batisma a deya o ngmeengme togomo te zaa shili teya kala o ara ozitǝ, ana o ote o zitǝ me neya yeme o emba togomo teme ka legoone.
13 Nyimia apate ana o baya ngmǝ ka mawo ma Ashili kaa makili maa kaa Ashili a nya Mosa ne beke angmǝ aa zaa togomo te me zongka Yohana de.
14 Kangza ee yo kabare ka letoma leena, Yohana waya a beka angmǝ aa zaa wai kaa a bena Iliya ya deya.
15 Pate ondo teto to kona, awa kone.
16 “Ma erang kedeya aromo awere na keeya? Naa ayana aka neya cikǝ ara ejamane, aane rare eja eceya ene aane beyana,
17 “ ‘Te ulubǝ ying tejebe,
na eta e yowa leera ne,
te beya leera le ma'ade
na eta ee ruuzi ne.
18 Lakana, Yohana wa de wata wa lyeeze aa wa soze ne, nane bekaana, ‘Cai! Waya ka o obere oburu.’
19 Nangka Kena ka Oromo ka de na ka lyeeze aka soze nane bekaana, ‘Laka na ondo okala o ara o lyeeza ka o soza, beja bena o eesa emate makeke ka ana madinǝ!’ Pate kaa nyimi, a ebelo orosa Ashili, aa zaa gole o ai waya a rose edang.”
O lyǝ udi o topepeng te odera kabare kaa Ashili
(Luk 10:13-15)
20 Naka bore ozurki a topepeng teeka ka kala ara o eza ogole o kai o tera ukpwei ne, obena aromo me neta ne kuri aa Ashili ne.
21 E lyǝ udi Korasiya! E lyǝ udi Betsaida! Obekaana ogole o tera ukpwei ooka a eze a nyimi ying aa ezea Taya ka Sidon, eeya nee samba o kurǝ aa Ashili ka o rabo aane amba majankale ka o kareze mato apung ane.
22 Azaa nyimi, eyang belo ying, a lengme lo core angmǝ, ayo kala aa kona egonegone aromo a Taya ka Sidon azaa oying.
23 Bo ma Kaparnahum, oya gonta o bena aya zalara o aa zaa shili na? Nyimia taza ne, aya jǝpǝrǝ o araaka ana o gbwizǝ zene. Epa otera ukpwei ka a eze aa nyimi oo, eya aa eze a Sadoma, Sadoma me waayo tata a deya o ngmeengme.
24 Aza nyimi, eyang bele oying, a lengme le o core angmǝ, ayo kala aa kona egonegone o makeke ma Sadoma baa zaa o.”
Deyana a mi adorana e cǝ o teeseke
(Luk 10:21-22)
25 A were namea Yeso ka bekaana, “Ate maa kona oleba o, Ateokora o zaa shili kaa deze, aa zaa obena ba baasa epaana a na o ama ka o rosa, na ba pari ara andaaka neta rosa eyapa ne.
26 Nyimia Ate, enna eya epa eeka e kala o rera aa bo.
27 Ate ang wa nya ekeeya aa taara tong. Ondo ta rosa kena kame ne soona Ate me, kangza ondo ta rosa Ate me ne soona kena kame, kaa pate ondooka kena kame kaa yeme owore o wai.
28 Deyana me pate o ying ana o zitǝ, ying ana o kona kaa be dengdeng, eyang nya ying o teseke.
29 Lyǝ na a lezara leng, ee eze epa eeka ang eze, obena mi ondo o nata ukpwei ya wai, ondooka wata ara ukpwei ne, eyo cǝ o nata anyong.
30 Obena lezara leng ta poba ne, magogoro mang kangza ta dengdeng ne.”