3
Bisalolm aabɔr
1 Tibɔr tee gbii la, ke unii yaa ban u li ye Yesu aanib aaninkpel kan, ni ŋan; ba pu? li ye lituln li ŋan na la.
2 Ni ŋan ke Yesu aanib aaninkpel taa li kpa taani ubaa. Ni ŋan u li joo upiibaab, ki li chur ubaa tiwan mɔmɔk ni, ki li kpa laasaab, ki li bi mbamɔm, ki li channi bicham tichann, ki li ye unii u ga ŋmaa tuk binib Uwumbɔr aabɔr mbamɔm na.
3 U taa li ye udagbiir, ki taa gbaa binib [ki taa li kpa iniman]. U li bi suuna ki taa li kpa kinikpakpak. Unimbil taa li man ŋimombil pu.
4 Ni ŋan ke u li joo waachiln ni aanib mbamɔm, ki li joo waabim mbamɔm, aan bi li pak u ki kii waamɔb.
5 Ba pu? unii yaa kaa ŋmaa joo waachiln ni aanib mbamɔm kan, u ga ŋa kinye ki li joo Yesu aanib?
6 U taa li ye unii u kaa yunn Uwumbɔr aasan ni na. U yaa ye unii u kaa yunn Uwumbɔr aasan ni na kan, nibaakan, u ga li kpa kigaak, ki kan ntafadaan ke kinimbɔŋ na.
7 Ni ŋan ke Yesu aanib aaninkpel li ye unii u kpa kipak binib bi kaa dii Yesu aasan na chee, aan binib taa galn u ki cha u lir kinimbɔŋ aagaawɔb ni.
Biteterb aabɔr
8 Tɔ, ki joo cha Yesu aanib aateterb wɔb na, ni ŋan ke bi mu li kpa laasaab. Bi taa len fam fam. Bi li ŋani baah len pu na. Bi taa li ye bidagbiib. Binimbil taa li man ŋimombil pu.
9 Ni ŋan ke bi li joo tibɔbɔrkaan ti kpiir, ki ye Yesu aabɔr na, ki li nyi mbimbin mu ŋan na, ki li ŋani kina.
10 Binib yaa ban bi li ye biteterb kan, cha Yesu aanib aaninkpiib puen lik baabimbin aah bi pu na waahr, bi yaa kaa kpa taani kan, cha bi li tun biteterb aatuln.
11 Ni ŋan ke bipuutiib mu li kpa laasaab, ki li chur bibaa, ki li ŋani tiwan mɔmɔk mbamɔm, ki taa li ye binibiinib.
12 Ni ŋan ke Yesu aanib aateterb li joo upii ubaabaa, ki li joo baabim ni baachiln ni aanib mbamɔm.
13 Binib bi tun biteterb aatuln ngbaan mbamɔm na ga kan liyimbil, ki li kpa lipobil sakpen ki tuk binib baah ga gaa Yesu Kristo ki kii pu na.
Tibɔbɔrkaan kpaan
14 Tɔ, m kpa limakl ke naan yunn, m ga dan aa chee. Le maah ŋmee kigbaŋ kee tii ni si na,
15 m yaa yunn kan, aa ga bee mbimbin mu ŋan tii Uwumbɔr Aadichal ni aanib, bi ye Uwumbɔr u ye limɔfadaan na aanib na. Waabɔr ti ye mbamɔn na bi biŋaal ni la, le bi joo ti.
16 Uwumbɔr aah kpiir waasan aabɔr ti tuk timi na, ti ye tibɔkpaan la:
U nan yoor unibɔn aawon, ki nyan ubaa mpaan pu.
Uwumbɔr Aafuur Nyaan le mɔk ke u ŋan.
Uwumbɔr aatuuntiib waa u.
Binib moon waabɔr ki tuk ŋitimbol aanib,
le binib gaa u ki kii dulnyaa wee mɔmɔk ni.
Uwumbɔr nan yoor u ki di buen paacham, ki nyuŋ u.