109
Kari kumik memek bo mena, am ikup ningi baga se Yawe ko saonga ko aiso
(David ko wur)
1 O Kaem, ni keta suanta ani nika nip patawu lagasam,
ni ani ago ko kiring me kaloko.
2 Mu awuk, kariimet memek nuguring kawel ago mu aga balu maguwusan,
ale ani ago ko den kawel balsan.
3 Nuna nongomang memek te den te aga bita gilingisan;
bare mu kumik duap bo mena biya.
4 Ani nunga kuesam, bare nuna ani den kawel te aga atumusan;
bare ani mu guranek ko kari.
5 Nuna ani kiwem ningo betesam mu ko koma kiwem memek agate betesan,
ale ani nunga kuesam mu ko koma nuna ani aga bita maguwusan.
6 Kari memek alo ago ko iwita balsan,
“Kari memek bo atumukiral se den te ilak aratuk ale den kawel te atumokko.
7 Tom biguwura te ilak aratamon ale
munak arigimon mu, nuguta memek ko duap mu ma balmonko;
ale noko guranek mu yam kawel la ko balmonko.
8 Buta se nu tom maiya biya marak me bagarukko;
se kari bo nu kuwim te kari dom ko aratukko.
9 Se noko kuriang mu nungumik nonet
mena bagamon, se noko nuwus mu gerewa bagarukko.
10 Noko kuriang mu ngual ngual geraga se ngatang te gi no se lagamonko;
se nunga bagara kuwim memek te bagasan mu te nunga karomonko.
11 Se awiriya nongote mel ipi giam mu
taimon ale kote melmasak suen la gi sapamonko,
ale noko ura kowar ko nunguning ningo ningo mu agotala gi sapamonko.
12 Se bo ta kiwem ningo bo me ta kumik te betemonko,
agi ko kuriang marmar mu nunga nonoman me batagukko.
13 Buta se noko gue te mu menamonko;
se kariimet gue luan udagi mu eng me nunga ikimonko.
14 Se noko nuet nongotak nunga memek
bita lagaman mu Yawe me ta siwu warukko;
ale ko nuam ko memek mu me ta siwu tuokko.
15 Se nunga memek mu Yawe koma te butata anirukko;
se nunga nunup ali imi te mu mena namarukko.
16 “Mu awuk, nu kiwem ningo bo
bitirukko ikia bo me ta tokaso;
nu kituwura guat se nungumik mel mena
alo mu nunga bita maguwukaso se
nongomang bataga laga kua namakasan.
17 Nu kariimet memek te kua namamonko ko bala mu ko kuakaso,
buta se nu kota mu uwutata kuerukko;
nu marak ningo ko den ningo balukko me
ta amilmilakaso, buta se marak ningo ko den nu me balu tumonko.
18 Kari bo ko guang ningo bo pempem nagurokko ko kua lagoso iwita,
nu bo memek te kua namarukko den mu
balukko ninguru ko kua paga lagoso;
se bala memek mu yu bagun ningi lai kam kumik ningi laiso,
ale kanga welang kunum kuting awote palenga kam kumik sokelel ningi palengoso.
19 Buta se kota ko den mu giris palaguk ale guang iwita taliparukko,
ale nasuguri te kaola ko mayang iwita ko luan kalok se me ta kutugokko.”
20 Kager kari memek mu ago ko den memek uwutata balman;
se Yawe nunga den memek mu ko koma ko uwutata nunga maguwurokko.
21 Bare O Yawe, ni keta suanta ni Kaem,
nika nip biya mu ko ningo te aga sangaruko;
nika kua aisa mu ko munan ningo umu te aga bataguru toko.
22 Mu awuk, ani kituwura, angimik
saonga mena, se angamang motam ningi ninguru batagawoso.
23 Ani sor bainga awuru iluwa ko
tiromorom taiso iwita, yumu namawasam;
ale kusiska marir itugu saposo iwita.
24 Ani inang kalem ale inang kuwim ko aga abugura sokel menaram;
ale angimik guang sokel numi iluwam.
25 Ani mu nononga bala memek ko mel bo iwita agarkasan;
tom nuna ani agarkasan mu nusupuling sisuwusan.
26 O Yawe, aninga Kaem, ni aninga
sangaruko; nika kua aisa mu ko munan ningo umu te, aga bataguru toko.
27 Ale nika kiting mu nunga kasuru se
arigimon ale ikimon mu ni, Yawe, aninga sangaru taem.
28 Nuna maga namara ko den balmon, bare ni marak ningo mu aninga te bitarko;
tom agarak kagermon mu dolara ningi
kapamonko, bare ani nika ura kari mu amilmilarikko.
29 Kager kari memek mu dolara birigira mu guang iwita nunga iramurok,
se dolara mu, guang nunumi te isi
gurugusan mu iwita, nungumik isi gurugokko.
30 Ani agiring te Yawe tawun biya amilmil tuekko;
kariimet nunga biguwura biya ningi nup patawurikko.
31 Mu awuk, nu awiriya nungumik saonga
mena mu nuguting duap ningi nunga iluso,
ale den te nunga betesan mu nunga sangaru taso.