3
Kaem Nineveh ikup tuokko
1 O Nineveh, ikup ko ikup arikkowo!
Ni kariimet gue ko wonong,
kawel munan ago terong maem,
kager munan te mel gia mu ago terong maem,
kariimet saki nunga bita maguwura
mu nika mel ningo nunguning iwita!
2 Karis ko girigirik nirung kaposo
se horse ko wip niaso owore ikiko!
Horse ko suwik se karis numi koma ko
kaposo ko nirung owore me ikisam e?
3 Kager kari wuli karogo horse darangara nungarsan,
nunga baenat mu kore biliwilik bagoso,
se nunga gatu mu kore nikim kapawoso.
Kariimet suen biya kueman,
ale nunumi awote duruk tarigiman,
se nunga kaura ko koma mena se
kariimet nunga ira kalakumu nama taisan.
4 Duap mu, Nineveh, ni lage luan imet
biya bo iwita baga se saman katagot
ko mang sima te sor saki nunga tagi bowa tugukasam.
5 Yawe Sokel Garagar mu iwita balso,
“Ikiko. Aitak ani kerak kager biya bitirikko.
Ani ka guang kopa patatuwurik ale sipiling te irekko.
Se nunguning la bager se sor suen la
se kingdom bibiya ka kimik ari kutuwumonko.
6 Ani inang yu iwiwara kalakalok gi
kimik kuali warik ale abiring gurugu
kisek, ale kariimet nomotam te den dolara kisekko.
7 Se kariimet suen la ni karkamon mu
nagumon ale balmon,
‘Nineveh, ni am maga saperem, se awiri
nika mauk niarukko? Mena!’ ma balmonko.
Se awiriya gemang motam sangam tuokko mu mena tala.”
8 Nineveh, agi ni pa wonong Thebes
iwita yu Nile luan te daigem ale bagasam e?
Se yu ka bataguru tam ale ka lautam kerak bagoso e?
9 Nu mu sor Cush se Egypt mu noko
saonga aora pempem la bagakasan;
se sor Put se Libya mu agotala nu
nongorak numi kuting iluwam.
10 Bare ikiko! Nu me terong.
Kager ningi ilu talipaman ale gi ilak namaman,
se ko kuriang mimili mu nunga giman ale lage gotektek suen la te
manga te nunga usagukasan se kuakasan.
Se nunga kari dom bibiya mu manga
kolara kolakasan ale koma koma ura
dungan kari ko nunga gikasan,
ale sen te nunga kalokasan.
11 Nineveh, ni betela nguanger ale
ngualer siperko;
kager ka maguwurokko taiso mu ko
nguanger ale nagu nama yumurko.
12 Nika kager ko bitua kuwim aora aora
mu tam fig muguri yopara karogo iwita,
se tom kager taiso sisiwuso se
nunguning yopara mu kutukutuk maso kaposo uwutatala,
nika bitua kuwim mu parasa kaposo.
13 Ka kager kari alo mu nungarkiko,
nuna imet iwita nosokel mena!
Nika songkuring suen la ko tam aora mu
tama kani saparam, se am nganga woselawasan,
se kager kari te utu nagumonko mu am guyak.
14 Kager taiso mu ko, yu noko mu utu nunguru bitar,
ale ka por aking kuli nunguruko!
Ali gege aora mu gi ale por te kulirko
brick moar se kaparukko, se gi ale ka por te kuli kuli ago namarko.
15 Ikia duap duap bitar ta wore, tama am ka lakumokko;
baenat kore mu am ka batutumu saparukko,
ale locust tam gawa batutumu sapa kam ka batutumurokko.
Locust gue pagasan iwita, gue pagerko!
16 Ni ka manga kari bibiya mu suen biya
aman ale baras taiti gomang te mu nunga kiaman ta,
bare locust tam gawa gurek no sapasan
ale binga namasan iwita, ka mel ningo ningo gi ago namamonko.
17 Nika sor bitua ko kari alo se ka kari
bibiya mu locust talip ago iwita,
sor me karso mu nuna por awote dagiwa
worem basuso mu nuna binga
namasan se kariimet bo nuna aguwaya namaman mu me ko ikisan.
18 O Assyria ko king, ka sipsip bitua kari
animan, ka kari dom bibiya mu nungamuru nirung kapawoso;
se ka kariimet mu parasaman ale duruk
ira sapaman, se bo nunga bolala awurokko mu mena.
19 Mel bo nika lot sumu nungok se aurokko mu mena;
nika lot sumu menara ko lot iwita mena, karogo kuarko.
Se sor suen biya nika dagula ko nirung
sumu ikisan ale nuguting moa gilingisan,
mu awuk, ni ninguru ta nunga bita maguwu lagerem.