2
1 Narri mungkijimuku, mankukiyi nayinda jangkurr. Narri kuyu nangangi jangkurr Jisus Krayiskanyi. Nanda Jisus Krayis nyulu walkurra mambuka, barrinani Kud. Bukambiju Krisjinmuku, nganinyimuku baki jibarrimuku, bukambiju yalu jandanyimuku Kudkanyi. Miku kudiya walkurra Kudkanyi, ngala kudiya bayakarda nangangi. Miku. Baki narri, mikujiyi yarrijba kudiya mili walkurra yingkamukuyngka. Jaliyi narri maruka muwa nangangi Jisus Krayiskanyi, jaliyi narri durrijba nangangi yuwa, baki marda narrimi jingkijba Kud, nyulu marukangka muwa bukambijuyngka yalungi, nganinyimukuyngka baki jibarrimukuyngka. Miku nyulimi maruka muwa nayi, yingkamukuyngka bijal, ngala yingkamukuyngka kudanyu. Miku nyulimi maruka muwa nani yalungi. Ngala nyulu marukangka muwa yalungi bukambijuyngka nanamannga.
2-3 Jala narri jila jurjyurri, yiningki yingkamuku jirdi kunybanyi jumbalanyi, marda jirdi kanjanyi dungalanyi, yiningki yalu jilajba jurjyurri. Ngala yiningki yingkamuku yalu jilajba jurjyurri jirdi balkinyi jumbalanyi, baki mikuyaji dungalanyi yalungi. Miku narringkiyi narringka yanyba, nayinda nganinyi jirdi kunybanyi jumbalanyi, nyulu walkurra Krisjin mambuka, kajangangi nangangi dungala. Baki mikujiyi yanyba nangangi, “Kabukawa. Jungkukiyi nayiba waluwa nanginyina darladarlana.” Mikujiyi yanyba nani nangangi, jirdi kunybanyi jumbalanyi, baki jirdi kajanyi dungalanyi. Ngala nanda yingka nganinyi, jirdi balkinyi jumbalanyi, mikujiyi yanyba nangangi, “Jungkukiyi nayiba bayngkani jambana.” Mikujiyi yanyba nani nangangi, jirdi balkinyi jumbalanyi. Miku nyulimi najba yalungi jumbala Kudwanyi. Miku nyulimi najba kudiya jirdi kunybanyi jumbalanyi, ngala kudiya jirdi balkinyi jumbalanyi. Miku nangkimi yanyba, “Nanda nyulu walkurra Krisjin, kunybayudingangi jumbalayudi, ngala nanda yingka, miku nyulu walkurra Krisjin, balkiyudingangi jumbalayudi.” Miku nangkimi yanyba Kud nani. Nyulu marukangka muwa yalungi bukambijuyngka nanamannga.
4 Jaliyi narringka mankumanku nani, baki narringka yanyba, “Ngayu jingkijba Kud, nyulu yarrijba nayinda nganinyi walkurra, ngala nanda yingka nganinyi nyulu yarrijba bayakarda.” Jaliyi narringka mankumanku nani, baki nanda balki. Ngala miku narriyi jingkijba yanka yarrijbangka nganinyi Kudwanyi. Ngawamba yuku nyulu jingkijba nani Kudwanyi, baki miku nyulimi najba yalungi dungala, jala nyulu yarrijba yalunya. Marda narrimi miku yarrijba yingka Krisjin mili walkurra waluwa yingkanyi, kajangangi nangangi dungala. Jaliyi narri yarrijba yingka mili walkurra waluwa yingkanyi, baki nanda balki.
5-6 Mankukiyi nayinda jangkurr, ngakinmuku mungkijimuku. Nanamuku jirdi balkinyi jumbalanyi, baki mikuyaji dungalanyi, marukangka Kud muwa yalungi. Miku yalimi nulijba kajanyi dungalanyi marda yajinyi, jingkijbangangi yalu Kud nyulu marukangka muwa yalungi, nyulu lalanbaka yalunya. Miku yalimi nulijba kajanyi yajinyi, lalanbakangangi yalunya Kudwanyi, baki yalu durrijba nangangi yuwa. Kuyu yali nangangi jangkurr, baki yalu durrijbangka nanda jangkurr nangangi, yarrijbayingangi yalunya Kudwanyi. Ngala miku narriyanyi mankuwa Kudkanyi, nyuli yarrijba yalunya nangangi, baki janyulu lalanba yalunya yurrngumba. Miku narriyanyi mankuwa Kudkanyi nani. Ngala yingkamuku jala miku yalu Krisjinmuku jirdi kunybanyi jumbalanyi baki jirdi kajanyi dungalanyi, yalu yabimbaka kiji nanamukuyngka jala mikuyaji dungalanyi. Yalu yabimbaka kiji yalungi.
7 Ngala nanamuku jirdi kajanyi dungalanyi, yalu jungku balki Kudkanyi jala yalu yabimba kiji yalungi Krisjinmukuyngka. Baki jala yalu yabimba kiji yalungi, baki nanda barrinani yalu yabimba kiji nangangi Jisus Krayiskanyi, jala jandanyi nangangi Kudkanyi. Nanda balki kudanyu barri. Barriwa.
8 Nanda walkurra yuwa ngambalangi, jandanyimukuyngka nangangi Kudkanyi wandijiyana. Nanda walkurra yuwa jali karu ngambalanya Jisus Krayiswanyi, nanda yuwa yanybaka nayi, “Marda narrimi maruka muwa yalungi bukambijuyngka, barrinani narringka maruka muwa.” Nanda barri walkurra yuwa ngambalangi. Jaliyi narri ngayangayijba nanankanyi yuwanyi yurrngumba, baki narri jungku kunyba nangangi Kudkanyi.
9 Ngala jaliyi narri yarrijba nanamuku jirdi kajanyi dungalanyi waluwa yalundu jala mikuyaji dungalanyi, baki miku narrimi maruka muwa yalungi bukambijuyngka nanamannga. Miku narrimi maruka muwa yalungi jala mikuyaji dungalanyi. Narri jungku balkina yuwana nangangi Kudkanyi, jaliyi miku narrimi ngayangayijba nanankanyi yuwanyi marukankanyi yalungi bukambijuyngka. Narri jungku balki nanankanyi walkurrayngka yuwanyi nangangi Kudkanyi.
10 Yiningki nganyingka yanyba, “Ngala ngayu ngayu ngayangayijba nanamukuyngka yingkamukuyngka yuwanyi nangangi Kudkanyi yurrngumba. Ngayangayijba ngayu yingkamukuyngka yuwanyi yurrngumba.” Ngala miku nanda duja jangkurr. Jaliyi ninji yurlwa yingamaliyngka jangkurranyi, jala jirrinyba ninya Kudwanyi, baki ninji jungku balki bukambijuyngka yuwanyi nangangi Kudkanyi.
11 Wajbayi ngambalanya nanganginkanyi yuwanyi Kudwanyi. Yanyba nyuli nayi, “Marda ninjimi miku kuluka yingkana jibarrina jala miku nganyi maninganja.” Baki yingka. “Marda ninjimi miku kurdanba nganinyi.” Jaliyi ninji ngayangayijba nanankanyi yuwanyi, miku kulukankanyi yingkana jibarrina, ngala ninji yurlwa nanankanyi yingkanyi yuwanyi kurdanbikanyi nganinyi, baki nanda balki. Ninji jungku balkina yuwana nangangi Kudkanyi, jaliyi ninji kurdanba nganinyi, ngala ninji ngayangayijba nanamukuyngka yingkanyi yuwanyi.
12 Marda ninjimi yanyba kunyba jangkurr yurrngumba. Marda ninjimi yabimba nanda yaji jala yurlurrmba yuwanyi Kudkanyi yurrngumba. Marda ninjimi jingkijba, bukamba nangki nanda yingka waluwa yuwa nganyi. Dulaba ninya nanamunanyi yuwananyi Kudwanyi, jala ninji kuyu jangkurr nangangi Jisus Krayiskanyi. Baki Kudwanyi, nyulu manjamanjambaka nanda balki yaji jali ninji yabimba wabula. Baki nanangini Kunybawanyi Ngarnduwanyi nangangi Kudkanyi, janyulu kandimba ninga, jala ninji ngayangayijba nanankanyi yuwanyi Kudkanyi nangangi.
13 Marda ninjimi yabimba kunyba yaji yingkamukuyngka. Marda ninjimi kandimba yalunya. Jaliyi nganinyiwanyi yabimba balki yaji nganyi, baki marda ninjimi mamanumba nanda balki yaji nangangi, barrinani Kudwanyi mamanumbaka nganyi balki yaji, jala nyulu manjamanjamba nanda balki yaji nganyi. Nani barri jaliyi ninji mamanumba nanda balki yaji, yabimba jali yingkawanyi nganyi, baki janyulu manjamanjamba nganyi balki yaji marda Kudwanyi. Barriwa.
14 Ngakinmuku mungkijimuku. Manku narri nayinda ngaki jangkurr. Jaliyi nganinyi yanyba, nyulu kuyungka jangkurr Kudkanyi, nyulu durrijbangka yuwa nangangi Kudkanyi, jaliyi nganinyi yanyba nani, ngala miku nyulimi maruka muwa yingkamukuyngka, miku nyulimi kandimba yalunya, miku nyulimi yabimba kunyba yaji yalungi, baki miku nyulimi durrijba nangangi Kudkanyi yurrngumba. Jala nyulu miku durrijba yuwa nangangi Kudkanyi, baki miku nyulimi marrimba nanda mardarda Kudwanyi. Miku janyulu wanka jungku nangandu Kudnyina bayngkani jalija nangka janyba. Jaliyi narri nulijba Kudkanyi, nyulu wankambikanyi narrinya baku, jungunkanyi nangandu yurrngumba, baki marda narrimi durrijba nangangi yuwa yurrngumba. Marda narrimi kandimba yingkamuku. Marda narrimi maruka muwa yalungi. Marda narrimi yabimba kunyba yaji yalungi yurrngumba, barrinani narri nulijba Kudkanyi, nyulu yabimbikanyi kunyba yaji narringi. Marda narrimi yabimba yaji nani, jaliyi narri nulijba Kudkanyi, nyulu wankambikanyi narrinya baku.
15-16 Yiningki yingka Krisjin, nyulu jungkuka mikuyaji blankinyi wurarawala, baki mikuyaji mamanyi, baki yingamali narringi yanybaka nangangi, “Barriwa barlbakiyi, baki jarrbakiyi mama. Ngaramba nganyingkaja mungana.” Ngala mikuwali nanangini jangkurrwanyi mamba nangangi muwa, mikuwali nanangini jangkurrwanyi ngaramba nganinyi mungana. Jaliyi nyulu yanyba nani, ngala miku nyulimi wajba nganinyi mamanyi baki blankinyi, baki miku nyulimi ngayangayijba nanankanyi yuwanyi nangangi Kudkanyi, marukankanyi yingkamukuyngka.
17 Nani barri jaliyi narri yanyba narri kuyu jangkurr Kudkanyi, ngala miku narrimi ngayangayijba yuwanyi nangangi Kudkanyi, baki narringka jujamba. Miku narrimi kuyu nangangi jangkurr. Narri jungku balkina yuwana nangangi Kudkanyi. Jaliyi narri maruka muwa yingkamukuyngka, baki muningka janarri wajba yalunya yajinyi, barrinani mamanyi jala yalu birrkalijba.
18 Yiningki nganinyi yanybaka, “Yingkawanyi nyulu kuyu jangkurr Kudkanyi, nyulu jandanyi Kudkanyi, ngala yingkawanyi nyulu kandimba yalunya, nyulu yabimbaka kunyba yaji yalungi.” Ngala ngayu karungka narrinya kudanyu, jala nganinyiwanyi kuyungka jangkurr Kudkanyi, baki nyulu kandimbaka yalunya marda. Jala nyulu kuyungka jangkurr Kudkanyi, baki muningka janyulu yabimba kunyba yaji yalungi, marukangangi nyulu muwa nangangi Kudkanyi. Nani barri ngayu marda, jala narri najba nanda kunyba yaji, yabimba jala ngayu yingkamukuyngka, baki narri jingkijba, ngayu kuyu jangkurr Kudkanyi, ngayu durrijba nangangi yuwa.
19 Jingkijba ninji kuna, ngawamba yingamali nyuluma Kud, miku yingka. Ngawamba nyuluma yingamali Kud ngambalangi. Jaliyi ninji jingkijba nani, baki nanda kunyba. Ngala wuwarrmukunyi, marda yalu jingkijba nani Kudkanyi. Marda yalu jingkijba nangangi, ngawamba nyuluma yingamali Kud, miku yingka nyulu Kud. Nani yalu jingkijba Kudkanyi wuwarrmukunyi, baki yalu marrala. Marrala yalu kudanyu nangangi Kudkanyi.
20 Ngala jaliyi ninji muningka yanyba nayi, “Ngayu jingkijbangka Kud, ngawamba nyuluma Kud, miku yingka nyulu Kud”, baki warriyaluku. Baki miku ninjiyala jingkijba Kud. Jaliyi ninji muningka yanyba nani, baki miku ninjimi jungku yurlurrmba nangangi Kudkanyi. Miku ninyiyi wankamba Kudwanyi bayngkani, jalija nganyingka janyba. Marda ninjimi kuyu jangkurr nangangi Kudkanyi. Marda ninjimi durrijba nangangi yuwa, baki janinji jandanyi Kudkanyi. Marda ninjimi jingkijba, nanda jala muningka yanybaka, nyulu kuyungka jangkurr nangangi Kudkanyi, ngala miku nyulimi yabimba kunyba yaji yingkamukuyngka, miku nyulimi duja kuyu jangkurr nangangi Kudkanyi.
21 Ngambalangi wankalanyi nijanganjinyi Yabrayam, nyuli kuyu jangkurr nangangi Kudkanyi, nyuli durrijba nangangi jangkurr. Yanybayi Kud nangangi Yabrayamkanyi. Karu nyuli Yabrayam, nyulu waji Kud nanganginkanyi jandayngkanyi. Baki ngayangayijba nyuli nangangi Kudkanyi. Wajba nyuli Kud nanganginkanyi jandayngkanyi Yayisakanyi. Baki nanankardi ngambala jingkijba Yabrayam, nyuli jungku yurlurrmba nangangi Kudkanyi, ngayangayijbangangi nyuli jangkurranyi Kudkanyi.
22 Marda narrimi jingkijba Yabrayam, nyuli kuyu jangkurr Kudkanyi, baki nanankardi nyuli ngayangayijba nanankanyi jangkurranyi, jali jirrinyba Kudwanyi nangangi jangkurr.
23 Nani barri nanda jangkurr najana Kudkanyi yanybaka, “Nyuli kuyu jangkurr nangangi Kudkanyi Yabrayamwanyi, baki nyuli jungku yurlurrmba nangangi Kudkanyi.” Baki yingka mili jangkurr najana Kudkanyi, karungka jangkurrwanyi Yabrayamkanyi. “Nijarrijba nyuli Yabrayam Kudwanyi, nijarrijbayi “Kandi nangangi Kudkanyi.’ ” ’
24-25 Baki nanda jibarri Rayab, jali jungku wankalana, nyuli balki jibarri, nyulili kuluka kajana nganinyina. Ngala nyuli ngadijba bulanya, nanankujarra nganinyiwuya, jali manjijba Jujuwawanyi. Nyuli ngadijba bulanya nanganginyina barndana, ngala nanganginmuku mungkijimuku, yali kujba bulangi. Baki kamu nyuli manjijba bulanya yingkana yubalina. Jingkijba nyuli Kud, ngawamba nyuluma nanda Kud. Baki nanankardi nyuli marrimba bulanya mardarda. Mikuwali yingkawanyi bulanya marrimba. Nani barri nanda jibarri nangki yangkalamba nangandurri Kudyurri. Nyuli waki Kudkanyi marda. Nyuli jungku yurlurrmba nangangi Kudkanyi nanda jibarri. Nanankujarra wankalawuya, nganinyi Yabrayam baki jibarri Rayab, buli jungku yurlurrmba Kudkanyi, buli waki Kudkanyi, kuyungangi buli nangangi jangkurr Kudkanyi.
26 Jala narri kuyu jangkurr Kudkanyi, baki marda narrimi durrijba nangangi jangkurr, marda narrimi waki Kudkanyi. Jala narri jungku yurlurrmba Kudkanyi, baki narri yabimba bukamba yaji, jirrinyba jala narrinya Kudwanyi. Ngala jaliyi narri yanyba, narri kuyu jangkurr Kudkanyi, ngala miku narrimi waki Kudkanyi, baki narri barrinani nganinyiyurru. Miku nangkiyi ngirringirrimba nganinyiyurru mankanyi. Miku nyuliyi waki. Miku nyuliyi ngayangayijba jangkurranyi Kudkanyi. Jaliyi narri miku waki Kudkanyi, baki narri barrinani nanda nganinyiyurru. Barriwa.