18
Kandawuna Babel
18:1-20
1 Sapadhana incia sumai iaku kukamatamo malaaʼekati mosagaanana asapo minaaka i sorogaa. Incia akokuasa maoge, tee o dunia asuluwia tee kamuliangina.
2 Tee suara momaoge incia agora, pogauna,
"Ahancurumo, ahancurumo o Babel, kota momaoge sumai!
Sii-sii incia amembalimo tampana mbooresana manga seetani,
tampana opoana manga rohi madhaki,
tampana poteona bhari-bharia manu-manu monaajisi tee motomarika
tee tampana mbooresana bhari-bharia binata monaajisi tee motomarika.
3 Roonamo bhari-bharia lipu padhamo asumpu
uwena angguru mobukeakana nawusuu.
Manga raja i dunia padhamo apewau zinaa tee incia,
tee manga pande podhaga i dunia arangkaeamo roonamo incia gauna adhadhi ataralabhi-labhi."
4 Kasiimpo kurango suara mosagaanana minaaka i sorogaa apogau,
"E uumatiku, limbamo minaaka i kota Babel,
mamudhaakana inda uose i nuncana manga dosa ipewauna
tee inda uose akangkanaiko manga balaana.
5 Roonamo dosa-dosana asuncu-suncua sakawana i laiana,
tee o Aulataʼala audhania bhari-bharia pewauna momadhaki.
6 Pewaua opea ipewauna mboomo mopadhana ipewauna to ingkomiu,
tee ubholosia bhari-bharia ipewauna rua kali lipa.
Antokia o mangkona tee giu isumpu molabhina kakaana
rua kali lipa minaaka i giu isumpu idhawuakana to ingkomiu.
7 Apokana o kabharina kamuliangina tee karangkaeana mboomo mopadhana inamisina,
dhawuakea kasikisaa tee kasukara i incia o kabharina mboo sumai.
Roonamo i nuncana ngangarandana incia apogau, 'Iaku kuuncura mboomo samia ratu,
iaku mencuana iaiaro tee inda bheadhaangia kukamata kasukara.'
8 Rampaakanamo giu incia sumai, sabutuna saeomea kota Babel sumai akangkanaimea sagala giuna balaa,
siitumo panyaki imateaka, kasukara, tee kaara.
Incia bheatotunu i waa,
roonamo kakaana Aulataʼala o Kawasana Opu mohaakimua."
9 Manga raja i dunia mopadhana mopewauna zinaa tee modhadhina mopoosena tee incia i nuncana karangkaea bheatangi tee amaporo incana wakutuuna akamata ombuna waa mopekangauna kota Babel sumai.
10 Manga incia bheakakaro pekaridho roonamo manga incia amaeka tee kasikisaana tee agora,
'Cilaka, cilakamo, e kota momaoge sumai,
siitumo kota Babel momakaa,
roonamo soo sajamumea o kahukumumu sumai akangkanaikomo!'
11 Manga pande podhaga i dunia atangi tee amaporo incana rampaakanamo giu incia sumai, roonamo indamo dhaangia moalina paraasona manga incia moomini samia uka,
12 siitumo: bulawa, pera, tundu, muntia, kae lenan moʼalusu, kae wungu, kae sutra, kae maleʼi, tee sagala giu kau momawondu, sagala giu bara mominaakana i gadhi, sagala giu bara mominaakana i kau momaalina haragaana, tambaga, ase, bhatu marmer,
13 kulina kau momameko, rampa-rampa, mina-mina momawondu, dhupa tee polona kau momawondu, uwena angguru, mina zaitun, gulupu momalape, gandum, sapi, dumba, ajara tee kareta, manga bhatua, sampe uka o inyawana maanusia.
14 Manga incia bheapogau,
'Bhari-bharia bhakena kau ipeelumu amofumo,
tee bhari-bharia kinande momambaka tee giu mokoharagaa ailamo minaaka i karomiu,
tee indamo bheupotibhaakea pendua.'
15 Manga pande podhaga momembalina morangkaea rampaakanamo kota incia sumai bheakakaro pekaridho, roonamo manga incia amaeka tee kasikisaana. Manga incia bheatangi tee amaporo incana,
16 kasiimpo apogau,
'Cilaka, cilakamo kota maoge mopakena kae lenan moʼalusu,
kae wungu, tee kae maleʼi,
kota mopoajoakana bulawa, tundu, tee muntia.
Maka tangkanamo sajamumea bhari-bharia karangkaeana abinasamo.'
17 Bhari-bharia anakoda, mosawina i kapala, mokarajaana i kapala, tee manga mia mokopeeloana i tawo, akakaro pekaridho,
18 tee apekee wakutuuna akamata ombuna waa mopekangauna kota incia sumai. Manga incia apogau, 'Kota iapai mopokanana tee kota maoge incia sii?'
19 Manga incia akamburaka ngawu i bhawona bhaana tee apekee apoose atangi tee amaporo incana. Manga incia apogau,
'Cilaka, cilakamo kota maoge sumai,
tampana bhari-bharia mia mokokapalana i tawo
amembali arangkaea rampaakanamo manga barana momaali.
Maka tangkanamo sajamumea
bhari-bharia barana abinasamo.'
20 Kaunde-undemo rampaakanamo Aulataʼala padhamo ahukumu Babel, e ingkomiu modhaangiana i sorogaa!
Kaunde-undemo, e manga mia mosaalihi, manga rasulu tee manga nabii!
Aulataʼala padhamo ahukumu kota incia sumai roonamo incia padhamo apewau madhaki tee ingkomiu."
Babel Indamo Bheabhangu Pendua
18:21-24
21 Kasiimpo samia malaaʼekati momakaana bukuna aangkamo saangu bhatu momaoge mboomo bhatu kagili, kasiimpo atudhaakea i nuncana tawo tee apogau,
"Mboo sumaimo Babel, kota momaoge sumai, bheatotudhaaka pekakaa,
tee indamo bheatopotibhaaka pendua.
22 Suarana gambusu tee suarana mia molagu, suarana suli tee suarana torompe itowiina mia,
indamo bheatorango i bhari-bharia dhala.
Manga pande mokarajaana giu opeapo uka,
indamo bheatopotibhaaka pendua i nuncana karomu, e kota Babel.
Suarana bhatu kagili uka
indamo bheatorango i kota incia sumai.
23 Caheana sulu
inda sampeampearo bhearore uka iwe sumai.
Suarana panganti umane tee panganti bhawine
inda bheatorango uka i kota incia sumai.
Manga pande podhagamu satotuuna manga kaogesa i dunia,
tee manga lipu padhamo upasaladhalea tee ilimuu sihirimu.
24 Roonamo i nuncana kota incia sumai padhamo atopotibhaaka raana manga nabii, tee raana manga mia mosaalihi,
tee bhari-bharia raana mia motopekamatena i bhawona dunia sii."