RUT
Pogau bhaa-bhaana
Tulatulana Rut adhaangia i tanga-tangana zamanina kakaa ipetulatulaaka i nuncana boku Manga Haakimu. Rut satotuuna samia bhawine minaaka i Moab mokawina tee miana Israel. Moomini umanena amatemo, incia sadhaadhaa apatiumbaaka kaasi molagina i ina maniana o miana Israel sumai, tee sadia asambahea i Aulataʼalana miana Israel. I kapadhaana tulatula incia sii o Rut apotibhaaka samia umane bhaau minaaka i tanga-tangana witinaina umanena. Alaloi kawiana i rua mpearona sii o Rut akoopua toputuaka Daud, rajana Israel momaoge.
Tulatula i nuncana boku Manga Haakimu apatiumbaaka manga kasukara momembalina roonamo uumatina Aulataʼala abholimo Aulataʼala. Maka o tulatulana Rut apatiumbaaka manga barakati idhawuakana Aulataʼala i samia dhaga mobholina agamana to aparacaea i Aulataʼalana miana Israel. Rampaakanamo pewauna sumai incia amembali uumatina Aulataʼala.
Antona
Naomi ambuli i Bait Lahim tee Rut 1:1-22
Rut apokawa tee Boas 2:1--3:18
Boas akawi tee Rut 4:1-22
1
Rut tee Naomi
1:1-22
1-2 I zamani i piamo itu wakutuuna lipuna Israel indapo tee rajana, Israel akapalaia manga haakimu. I wakutuu incia sumai, lipu sumai akangkanaia kasukarana kaara. I wakutuu incia sumai dhaangia samia umane o sarona Elimelekh. Incia o miana Efrata, tee amboore i Bait Lahim i lipu Yuda. Roonamo kasukarana kaara sumai, sabutuna incia alingka i lipu Moab apobhawa tee bhawinena, Naomi, tee rua miaia anana umane, siitumo Mahlon tee Kilyon. Kasiimpo manga incia ambooremo iwe sumai.
3 Elimelekh amate, sabutuna soomo Naomi tee rua miaia anana.
4 Kasiimpo rua miaia anana sumai akawi tee manga kabuabua minaaka i Moab, sarona o Orpa tee Rut. Sapulu tao sapadhana incia sumai,
5 rua miaia anana Naomi sumai amatemo uka, siitumo Mahlon tee Kilyon, sabutuna o Naomi akailanga umanena tee rua miaia anana umane.
6 Sumaimo, asiapumo incia to ambuli minaaka i lipu Moab apobhawa tee rua miaia ana maniana roonamo i lipu Moab incia arango ande KAWASANA OPU padhamo amaheruaka uumatina tee adhawu kinande to manga incia.
7 Manga incia alingka apobhawa-bhawa minaaka i tampana mbooresana i Moab aporope i Tana Yuda. Wakutuuna manga incia i nuncana lingkaana,
8 Naomi apogau i rua miaia ana maniana sumai, "Lingkamo, mbulimo i bhanuana inamiu samia-samia. Sio-siomo KAWASANA OPU amalape tee ingkomiu mboomo ingkomiu umalape i manga mia momatena sumai tee uka i iaku.
9 Sio-siomo KAWASANA OPU adhawukomiu katoo mamudhaakana ukobhanua pendua tee upotibhaaka peulusa tee umane bhaau." Kasiimpo Naomi aiki manga incia. Maka o Orpa tee Rut atangi tee suara makaa,
10 tee apogau i Naomi, "Inda, ingkami bhetambuli tee ina tee talingka i lipumu."
11 Maka o Naomi apogau, "Mbulimo, manga anaku, pokia ingkomiu uoseaku? Dhaanamo iaku indamo bhekupalaahiri manga ana umane to upamembalia umanemiu naile itu!
12 Mbulimo, manga anaku. Lingkamo roonamo kumancuanamo mpuu to kukoumane pendua. Ande iaku kupogau, 'Dhaangiapo tee harapuku,' tee o malo sii uka iaku kukoumane, tee kupalaahiri ana umane,
13 buaka ingkomiu uunda uantagia sakawana manga incia amaoge? Bholi mboo itu manga anaku. Kapaʼi inamisiku sii amatamo mpuu to ingkomiu roonamo KAWASANA OPU ahukumuaku."
14 Sabutuna atangimo manga tee suara makaa. Kasiimpo Orpa aiki ina maniana, maka o Rut amendeu apogaa tee asakulaka ina maniana sumai.
15 Apogaumo Naomi i Rut, "Kamatea, Orpa ambulimo i lipuna tee i dewa isombana, ingkoo uka umbulimo upobhawa tee incia."
16 Maka o Rut alawani, "Ina, bholimo upakisaaku to kubholiko tee kumbuli tee inda kuoseko. Iapaipo ulingka iwe sumai uka iaku bhekulingka, tee iapaipo ubutu iwe sumai uka iaku bhekubutu. Lipumu o lipuku uka tee Aulataʼalamu o Aulataʼalaku uka.
17 Iapaipo uka umate iwe sumai uka iaku bhekumate tee kutokoburu. KAWASANA OPU ahukumuaku amatamo mpuu, ande bhekupogaa tee ina, tangkanamo o mate mangapapogaana!"
18 Wakutuuna Naomi akamatea ande o Rut atotuu-totuu bheaosea, sabutuna incia indamo apogauaka opeapo uka.
19 Kasiimpo Naomi tee Rut apalausakamo lingkaana sampe manga incia akawa i Bait Lahim. Sakawana iwe sumai, saangua kota atobungke tee manga bhawine sumai aabha, "Atotuumo mia incia sii Naomi?"
20 Naomi alawani i manga incia "Bholi ugoraakaaku Naomi. Sarongiakumo o Mara roonamo Aulataʼala Mokokuasa apamembali dhadhiku amapaʼi.
21 Wakutuuna kulingka minaaka i iwe sii iaku inda kukakuranga, maka sii-sii KAWASANA OPU apambuliaku inda tee opeopeaku. Rampaakanamo sumai ingkomiu bholimo usarongiaku Naomi, roonamo KAWASANA OPU Mokokuasana amembali mobhaliaku tee mopanarakaaku!"
22 Mboo sumaimo tulatulana wakutuuna Naomi ambuli i Israel minaaka i Moab apobhawa tee Rut ana maniana. Manga incia akawa i Bait Lahim i wakutuuna timpuana penembula mokoompole isarongiaka jelai.