96
Kawasana Opu, Aulataʼala tee Haakimu i Saangua Dunia
96:1-13
1 Laguakamo lagu bhaau to KAWASANA OPU,
Lagumo to KAWASANA OPU, e saangua dunia!
2 Lagumo to KAWASANA OPU tee upujimo sarona!
Pakoleleakea saesaeo o kasalaamati minaaka i Incia.
3 Petulatulaakea o kamuliangina i tanga-tangana manga lipu,
tee upetulatulaakea manga pewauna inda momentela i bhari-bharia uumatina maanusia.
4 Sababuna o KAWASANA OPU amaoge tee atopuji mpuu.
Incia alaenga atomaeka alabhi minaaka i bhari-bharia dewa.
5 Bhari-bharia dewa isombana manga lipu satotuuna o barahala,
maka o KAWASANA OPU mopadhaangiana laiana.
6 Incia amaoge tee amulia;
kuasa tee kakesa dhaangia i tampana momangkilo.
7 Akuimea o KAWASANA OPU, e uumatina maanusia,
akuimea o KAWASANA OPU o kamuliangina tee kakaana!
8 Akuimea o kamuliangina sarona to KAWASANA OPU,
bhawamo pasombaa tee uumbamo i aroana Bhanuana Aulataʼala!
9 Sujumo usomba KAWASANA OPU tee upake pakea momangkilo;
maekamo tee urengkumo i aroana, e saangua alamu!
10 Pakoleleakea i tanga-tangana manga lipu,
"KAWASANA OPU sumai o Raja!
Atotuu-totuu o alamu amatangka tee inda akohudha,
Incia bheahaakimu manga lipu tee kaʼadili."
11 Taroakamo o laiana akaunde-unde tee o dunia asambo-sambo;
taroakamo o tawo akanduu-nduu tee bhari-bharia modhaangiana i nuncana,
12 taroakamo inawu akaunde-unde tee bhari-bharia modhaangiana i bhawona.
I wakutuu incia sumai bhari-bharia puuna kau i koo bhealagu roonamo akaunde-unde
13 i aroana KAWASANA OPU, roonamo Incia bheaumba,
roonamo Incia bheaumba to ahaakimu alamu.
Incia bheahaakimu dunia tee kaʼadili,
tee bhari-bharia lipu tee kabanarana.