86
Doʼa Emaniana Tulungi minaaka i Manga Musu
86:1-17
1 Doʼana Daud.
E KAWASANA OPU, perangoiaku tee ulawaniakumo,
roonamo kunarakaa tee kumisikini.
2 Jagania o inyawaku roonamo iaku kutaʼatiko,
pasalaamatia o bhatuamu moparacaeana tee Ingkoo.
3 Maasiakaaku, e Kawasana Opuku,
roonamo saeoa kudoʼa i Ingkoo.
4 Paunde-undemea o ngangarandana bhatuamu sii,
roonamo i Ingkoomo tampaku kusomba, e Kawasana Opu.
5 E Aualataʼala, Ingkoo umalape tee upekaʼamponi,
kaasimu molagina ataralabhi-labhi to bhari-bharia mia modoʼana i Ingkoo.
6 E KAWASANA OPU, perangoimea o doʼaku,
tee faduliakaaku wakutuuna kuemani tulungi.
7 Wakutuuna kumaseke iaku kugora i Ingkoo
roonamo Ingkoo bheutarima doʼaku.
8 Inda dhaangia mopokanana tee Ingkoo i tanga-tangana manga dewa, e Kawasana Opu,
tee inda dhaangia mopokanana tee opea ipewaumu.
9 Bhari-bharia lipu ipadhaangiamu
bheaumba tee asuju i aroamu, e Kawasana Opu,
tee bheamuliangia o saromu.
10 Sababuna Ingkoo umakaa tee upewau manga giu inda momentela.
Tangkanamo Ingkoo o Aulataʼala.
11 E KAWASANA OPU, adhariakaaku dhalamu,
mamudhaakana kudhadhi kuosea kabanaramu;
pekatangkea incaku mamudhaakana kuhoromati saromu.
12 E Aulataʼala, KAWASANA OPU, iaku bhekupujiko tee mpuu-mpuuna incaku,
tee bhekumuliangi saromu saʼumurua.
13 Roonamo kaasimu molagina amaoge mpuu to iaku,
Ingkoo padhamo upasalaamatiaku minaaka i mate.
14 E Aulataʼala, manga mia mosombo ahumbuniaku;
rombongana manga mia masega gauna apekamateaku,
tee manga incia inda afaduliakako.
15 Maka Ingkoo e Kawasana Opu, satotuuna o Aulataʼala mobukeakana kaasi,
usabara tee ataralabhi-labhi o kaasimu molagina tee pojanjiamu tee iaku inda amabhotu.
16 Tontoaku tee umaasiakaakumo;
dhawuakea bhatuamu sii kakaamu tee upasalaamatiaku,
roonamo mboomo inaku, iaku uka kulaianiko.
17 Dhawuakaaku saangu tanda ande Ingkoo umalape
mamudhaakana manga mia mobanciaku amaea wakutuuna akamatea
ande Ingkoo, KAWASANA OPU, motulungiaku tee mopekatangkana incaku.