83
Doʼa Aemani i Aulataʼala to Ahukumuaka Musuna Israel
83:1-19
1 Zaburuna Asaf to saangu lagu.
2 E Aulataʼala, bholi inda tee uuʼuumu,
bholi ukatongo-tongo tee usaku limamu, e Aulataʼala!
3 Kamatamea, manga musumu apewau karobho,
manga mia mobanciko apekalangamo bhaana.
4 Manga incia apadhaangia pomufaakati madhaki to aewangi uumatimu,
tee aposaangu to aewangi manga mia ijaganimu.
5 Pogauna manga incia, "Mai tapabinasea o lipuna Israel,
mamudhaakana o sarona Israel inda atoudhani!"
6 Manga incia aposaangu i nuncana saangu haejati,
tee apojanji to aewangiko.
7 Manga incia satotuuna o mia momboorena i pokemaana Edom tee miana Ismail,
miana Moab tee miana Hagar,
8 Gebal, Amon, Amalek,
Tana Filistin tee raʼeatina Tirus.
9 Tee o Asyur uka aposaangu tee manga incia,
amembali motulungina siwuluna Lut.
Sela
10 Pewaumea manga incia mboomo ipewaumu i miana Midian,
tee mboomo ipewaumu i Sisera tee Yabin i bhiwina Umala Kison,
11 mopadhana ipabinasamu minaaka i nuncana dunia,
tee o maeatina amembali karombu to pasuburuana tana.
12 Pamembalia o kaogesana manga incia mboomo Oreb tee Zeb,
patungkua o rajana manga incia mboomo Zebah tee Salmuna
13 mopogauna, "Mai takuasaia o lipu mbooresana Aulataʼala!"
14 E Aulataʼala, pamembalia manga incia mboomo ngawu mopolaka,
mboomo laena bhae ibhaleakana ngalu.
15 Mboomo waa motununa koo,
tee mboomo rorena waa mopekangauna manga gunu,
16 pajerea manga incia tee garuramu,
tee upekaekaia tee tambusisimu.
17 Taroakamea o rouna manga incia abukeaka aebu
tee taroakamo saromu, e KAWASANA OPU, abalasiaka karona.
18 Taroakamo manga incia amaea tee amaidhiidhi incana saʼumurua;
taroakamo manga incia anamisi kaea tee amate.
19 Taroakamo manga incia amataua ande tangkanamo Ingkoo mokosarona KAWASANA OPU,
Momalangana i saangua dunia.