77
Ipewauna Kawasana Opu i Piamo itu
77:1-21
1 To kapalana molaguna. Zaburuna Asaf to Yedutun.
2 Iaku kugora i Aulataʼala tee suara momandii,
i Aulataʼala kugora, mamudhaakana aperangoiaku.
3 I piamo itu, i eona kumaseke kupeelo Kawasana Opu,
tee wakutuuna amalo kutanaaka limaku inda kumangumangule;
ngangarandaku inda aunda atotautau.
4 Ande kuudhani Aulataʼala, kupekidhei;
ande kupeudhaudhani, ahanda amaule ngangarandaku.
Sela
5 Ingkoo mopamembalina mataku sadhaadhaa atobungkale;
alilaho o namisiku sabutuna inda amembali kupogauaka opeopea.
6 Kufikifikiriaka zamani i piamo itu,
tee i tao-tao molapa.
7 Iaku kuudhani laguku i wakutuuna amalo,
kupeudhaudhani i nuncana ngangarandaku, tee o rohiku apekaabha-abha,
8 "Buaka Kawasana Opu bheamanga bholi to saʼumurua?
Tee indamo uka manga maasiaka?
9 Buaka atopadhamo o kaasina molagina?
Buaka amapupumo janjina saʼumurua?
10 Buaka o Aulataʼala amalingumo to manga maasiaka?
Buaka i nuncana pamuruna Incia atutubhi rahumatina?
Sela
11 Kasiimpo kupogau, "Siimo kaporona incaku
ande o lima kaanana Momalangana Mpuu indamo ajaganiaku."
12 Iaku bhekuudhani opea mopadhana ipewauna KAWASANA OPU.
Umbe, iaku bhekuudhani manga giu inda momentela mopadhana ipewaumu i zamani i piamo itu.
13 Iaku bhekuudhaudhania i nuncana ngangarandaku bhari-bharia ikarajaamu,
tee kufikifikiria bhari-bharia giu momaoge mopadhana ipewaumu.
14 Dhalamu amangkilo, e Aulataʼala,
Dewa iapai momaogena mboo Aulataʼalamami?
15 Ingkoomo Aulataʼala mopewauna giu inda momentela.
Ingkoo padhamo ususuaka kuasamu i tanga-tangana manga lipu.
16 Tee limamu utolosi uumatimu,
siitumo siwuluna Yakub tee Yusuf.
Sela
17 E Aulataʼala, uwe akamatako,
uwe akamatako tee amaeka;
umbe, andalaoge uka atorende.
18 Taʼina ngalu apasapo wao maranca,
tee o laiana uka akanduu-nduu;
manga anana panamu akakila-kila.
19 Ruuna guntumu atorango i nuncana tambusisi,
tee o bhibhitomu apekainawa dunia.
Alamu uka akolendu tee atorende.
20 Dhalamu alaloi tawo,
tee udhala upolimba i andalaoge;
maka o tandarana aemu inda atokamata.
21 Ingkoo ugembalaaka uumatimu mboomo mia mowuluna gulumana dumba
tee upake limana Musa tee Harun to akapalai manga incia.