57
Apajerea Musu, maka Atulungia Kawasana Opu
57:1-12
1 To kapalana molaguna.
Mboomo lagu: Bholi upahancuru. Zaburuna Daud, wakutuuna incia apalaiaka Saul tee aopo i nuncana lia.
2 Maasiakaaku, e Aulataʼala, maasiakaaku,
roonamo i Ingkoomo kupeulu.
I tambena panimu iaku kupeulu,
sakawana garura sumai aunto.
3 Iaku kudoʼa kuemani tulungi i Aulataʼala Momalanga,
Aulataʼala apamondo ihaejatiakana to dhadhiku.
4 Maasangia Incia bhealawaniaku minaaka i sorogaa tee apasalaamatiaku,
Incia bheapaʼaebu manga mia molanda-landakiaku.
Sela
Aulataʼala alamboko kaasina molagina tee inda bheamabhotu janjina tee iaku saʼumurua.
5 Iaku kudhaangia i tanga-tangana musu,
manga incia mboomo singa mobhembaruna maanusia.
Ngincina amatadha mboomo pandanga tee anana pana,
tee dhelana mboomo ewanga momatadha.
6 E Aulataʼala, susuakea kaogesamu i laiana
tee kamuliangimu i saangua alamu.
7 Manga musuku ataa katapu to iaku,
sakawana amate akalaku.
Manga incia aseli kabhalongko i aroaku to apacilakaaku,
maka o karona manga mokotibuna.
Sela
8 Ngangarandaku amatangka, e Aulataʼala, ngangarandaku amatangka.
Gauku bhekulaguaka lagu kapujia to Ingkoo.
9 Iaku bhekubhangu
tee kumagasiaaka gambusu tee kecapi!
Iaku bhekubhangu raneeooge!
10 Iaku bhekusukuru i Ingkoo i tanga-tangana manga lipu, e Kawasana Opu,
tee kulaguaka manga lagu kapujia.
11 Sababuna kaasimu molagina amaoge akawa i laiana,
tee kabanaramu akawa i taʼina ngalu.
12 E Aulataʼala, susuakea kaogesamu i laiana,
tee kamuliangimu i saangua alamu.