51
Doʼa Emaniana Amponi
51:1-21
To kapalana molaguna. Zaburuna Daud.
+I wakutuuna Nabii Natan audhaniaka Raja Daud sapadhana incia apewau zinaa tee Batsyeba.*
 
E Aulataʼala, maasiakaaku roonamo kaasimu molagina.
Apokana tee rahumatimu momaoge, hapusumea manga dosaku!
Bhanuia tee pekangkiloa karoku minaaka i kasalahaku,
tee pekangkiloaku minaaka i dosaku.
 
Roonamo kumataua manga kasalahaku,
tee dosaku sadia kuudhania.
+I Ingkoo, tangkanamo i Ingkoo kukodosa
tee kupewau opea iabhimu amadhaki.
Sabutuna ubanara i wakutuuna ufirimani ande kusala,
tee uʼadili i wakutuuna uhukumuaku.
Satotuuna, kumadhaki pepuu mina kutopalaahiri,
tee kukodosa minaaka i nuncana kadhuma.
Satotuuna, Ingkoo upeelu kabanara i nuncana baatini,
tee Ingkoo uadhariakaaku hikimati i nuncana ngangarandaku.
Pekangkilomea o dosaku, sumaimo iaku bhekumangkilo,
pekangkiloaku sumaimo bhekumembali maputi mpuu.
10 Taroakamo kurango lele kaunde-unde tee kasanaa,
tee taroakamo manga bukuku ipahancurumu sii akaunde-unde pendua.
11 Tutubhia o roumu tee bholi ukamata manga giu madhaki ipewauku,
tee uhapusumea bhari-bharia kasalahaku.
12 E Aulataʼala, padhaangiakaaku ngangaranda momangkilo,
dhikaia o rohi mobhaau tee matangka i nuncana baatiniku.
13 Bholi ubhanakaaku minaaka i aroamu,
tee bholi ualea o rohimu momangkilona.
14 Paunde-undeaku pendua roonamo kasalaamati minaaka i Ingkoo,
tee dhawuaku ngangaranda morela to kutaʼati i Ingkoo.
 
15 Sumaimo, iaku bhekuadhariaka parintamu i manga mia mopewauna kasalaha,
tee manga mia mokodosa bheambuli i Ingkoo.
16 Rambasakaaku minaaka i kasalaha roonamo kupekamate mia sagaanana, e Kawasana Opu,
e Aulataʼala mopasalaamatiaku,
tee bhekulaguaka roonamo kabanaramu.
 
17 E Aulataʼala, papogauaku,
sumaimo iaku bhekupujiko!
18 Sumaimo Ingkoo inda upeelua kurubani isumbele.
Moomini iaku kupasombaaka kurubani tunua, Ingkoo inda upeelua.
19 Satotuuna kurubani mopasanaana Aulataʼala sumai o rohi mohancuru.
E Aulataʼala, ngangaranda mohancuru tee momapuro inda bheuhinaia.
 
20 Maasangia Ingkoo usanaa pewau malape i Sion,
pakakaroa pendua rindina peulusa i sakaaratea kotana Yerusalem.
21 Sumaimo, bheupeelu utarimaia manga kurubani isumbele molaenga,
siitumo kurubani pasombaa itunu tee kurubani pasombaa mototunu saangua,
sumaimo mia bheapasombaaka manga sapi umane i bhawona tampana tunuana kurubanimu.
+ 51:2 2Sa. 12:1-15. * 51:2 Batsyeba: Bhawine sii amangada mpuu tee bhawinena samia suludaduna Daud mokosaroakana Uriah. Sapadhana Daud azina tee Batsyeba tee amataua ande incia abhawa-bhawa, Daud asampea tee antona mamudhaakana apekamate Uriah. Samatena Uriah, Daud akawi tee Batsyeba. Maka giu sumai amataua Nabii Natan. Kamatea 2Sa. 11:2-27. + 51:6 Rom. 3:4.