5
Doʼana Saeona
5:1-13
1 To kapalana molaguna. Tee kagasiana suli. Zaburuna Daud.
2 E KAWASANA OPU, rangoa o pogauku,
perangoia ipeenciakaku.
3 Rangoa o goraku kuemani tulungi,
e Rajaku tee Aulataʼalaku,
roonamo i Ingkoomo iaku kudoʼa.
4 E KAWASANA OPU, i wakutuuna raneeo Ingkoo urango doʼaku,
i wakutuuna raneeo kuʼatoro pasombaa to Ingkoo tee kuantaantagi kalawanimu.
5 Ingkoo mencuana Aulataʼala momaasiakana pewauna mia mokodosa;
mia madhaki inda amembali amboore i aroamu.
6 Mia mosomboakana karona inda uundaakea adhaangia i aroamu.
Ingkoo ubanci bhari-bharia mia mopewauna kadhaki.
7 Ingkoo upabinasa manga mia mogau-gau.
Umarikaia ukamata pande pekamatena mia tee pande tipu.
8 Maka rampaakanamo kaasimu inda momabhotu,
iaku bhekupesua i nuncana bhanuamu,
tee kusuju kusomba kupoaro i bhanuamu momangkilo,
tee kumaeka i Ingkoo.
9 E KAWASANA OPU, susuakaaku dhalamu mobanara
roonamo manga musuku mojoli-joliaku.
Pekakatea o dhalamu i aroaku,
mamudhaakana kumembali kuose peeluamu.
10 Sababuna pogauna manga incia inda amembali atoparacaea,
i nuncana ngangarandana, manga incia gauna apahancuru mia mosagaanana.
Goncona manga incia mboomo koburu moponganga,
dhela tee kawujuna manga incia amameko.
11 E Aulataʼala, taroakamo manga incia atanggo kasalahana,
bheakangkanai i karona opea mopadhana ihaejatiakana to mia.
Padhencua manga incia roonamo abhari o kasalahana,
tee manga incia adorohaka i Ingkoo.
12 Maka bhari-bharia mia mopeuluna i Ingkoo bheakaunde-unde,
manga incia bheasambo-sambo saʼumurua.
Jagania manga mia momaasiakana saromu,
mamudhaakana manga incia akaunde-unde i nuncana opea ipewaumu.
13 Sababuna Ingkoomo mobarakatina mia mobanara, e KAWASANA OPU,
Ingkoo ujagani manga incia tee kaasimu mboomo katangkesi.