24
Umbaana Raja Momulia i Nuncana Baitulla
24:1-10
1 Zaburuna Daud.
KAWASANA OPU mokopewauaakana alamu tee bhari-bharia antona,
dunia tee bhari-bharia momboorena i nuncana.
2 Incia modhikana kalempesina alamu i bhawona tawo,
tee apakaroa i bhawona manga umala.
3 Incema momembalina mopenena i gununa KAWASANA OPU?
Tee incema momembalina moumbana i aroana tampa momangkilona?
4 Mia momangkilona limana tee momalapena incana,
incia inda adoʼa i manga barahala,
tee inda aposumpa gau-gau.
5 Incia bheapotibhaaka barakati minaaka i KAWASANA OPU,
tee Aulataʼala mopasalaamatia bheapabanarea.
6 Siimo manga mia mopeelona Aulataʼala,
aumba to asomba Ingkoo, Aulataʼalana Yakub.
Sela
7 Pobungkalemo pekaewa, e manga bhambana lawa!
Toangkamo, e manga bhamba motopakarona minaaka i piamo itu,
mamudhaakana Raja Momulia apesua!
8 Incema o Raja Momulia sumai?
KAWASANA OPU, momakaana tee mohebana!
KAWASANA OPU, mohebana i nuncana potimbea!
9 Pobungkalemo pekaewa, e manga bhambana lawa!
Toangkamo, e manga bhamba motopakarona minaaka i piamo itu,
mamudhaakana Raja Momulia apesua!
10 "Incema buaka Raja momulia sumai?"
KAWASANA OPUNA saangua alamu,
Incia Raja Momulia!
Sela