19
Kamuliangina Aulataʼala i Nuncana Ipadhaangiana tee Hukumuna
19:1-15
1 To kapalana molaguna. Zaburuna Daud.
2 Laiana apetulatulaaka kamuliangina KAWASANA OPU,
tee laiana apogauaka ikarajaana.
3 Saesaeo laiana abhoasaka pogauna,
tee samalo-samalo uka apakoleleaka ilimuu.
4 Inda tee pogau atawa o bhoasaka,
suarana uka inda atorango.
5 Maka o lelena atorango i saangua alamu,
tee kasameana sumai akawa i tapana dunia.
KAWASANA OPU apadhaangia laiana to mbooresana matanaeo.
6 Kasiimpo matanaeo abhete i wakutuu saeona,
mboomo panganti umane molimbana minaaka i kolemana,
mboomo samia hiri akaunde-unde wakutuu apepuungi lingkaana.
7 Matanaeo abhete minaaka i tapana laiana,
atii akawa i tapa mosagaanana,
inda dhaangia molapana minaaka i kasodhona.
8 Hukumuna KAWASANA OPU amondo tee inda tee kakurangana,
apadhadhi inca.
Tuturana KAWASANA OPU atoparacaea,
adhawu hikimati i manga mia inda moʼaarifu.
9 Tuturana KAWASANA OPU sumai abanara,
apasanaa ngangaranda.
Parintana KAWASANA OPU sumai atinda,
amembali kainawa to karota.
10 Namisi kaeka i KAWASANA OPU sumai amangkilo,
to saʼumurua.
Tuturana KAWASANA OPU sumai atoparacaea
tee aʼadili bhari-bharia.
11 Hukumuna KAWASANA OPU alabhi o kaalina minaaka i bulawa asilii,
moomini abhari bulawa asilii,
alabhi o kamekona minaaka i golana uwani,
moomini golana uwani asilii minaaka i bhanuana uwani.
12 Bhari-bharia hukumumu sumai audhaniaka bhatuamu sii;
dhaangia o fahala maoge to mia motaʼatina parintamu.
13 Incema buaka momembalina momatauna kasalahana karona?
Pekangkiloakumo minaaka i manga dosa motobuniaka.
14 Jaganiaku mamudhaakana inda kupewau dosa iporadhamii,
tee bholi utaroakea manga dosa akuasaiaku.
Kasiimpo iaku indamo uka kupewau madhaki,
tee kumangkilo minaaka i kasalaha momaoge.
15 Maasangia o pogauku tee bhokuna ngangarandaku utarimaia,
e KAWASANA OPU, peulusaku tee motolosiaku.