149
Lagu Bhaau to KAWASANA OPU
149:1-9
1 Pujimo KAWASANA OPU!
Laguakamo lagu bhaau to KAWASANA OPU!
Pujimea i nuncana poromusakaana mia mosaalihi!
2 Taroakamo Israel akaunde-unde roonamo Kawasana Opu mopadhaangiakomiu,
tee taroakamo raʼeatina Sion akaunde-unde roonamo Rajana.
3 Taroakamo manga incia amanari to apuji sarona Kawasana Opu,
tee alaguaka manga lagu kapujia apoose amagasiaaka ganda-ganda tee kecapi to apuji Incia,
4 roonamo KAWASANA OPU amaasiaka uumatina,
tee Incia apakanaakea o mahakota kasalaamati to manga mia mopaporitambena karona.
5 Taroakamo uumatina akaunde-unde i nuncana kamuliangi,
tee alagu asambo-sambo i kolemana.
6 Taroakamo manga incia apuji Aulataʼala tee ngangana,
apoose akeni hancu momatadha ruaanguana matana i limana
7 to abalasi pewauna manga lipu i dunia sii,
tee ahukumu manga raʼeatina lipu i alamu sii,
8 to abhokeakea ase manga raja,
tee abhokeakea rante ase manga kaogesana lipu,
9 to ahukumu manga lipu mboomo mopadhana ipatotapuakana Aulataʼala to manga incia.
Giu incia sumai amembali saangu giu momulia to bhari-bharia mia mosaalihi.
Pujimo KAWASANA OPU!