☰ ZABURU 110
110
Al Masi sumai Momembalina Raja tee Imamu
110:1-7
1 +Zaburuna Daud.
 
Mboo siimo o firimanina KAWASANA OPU to Opuku,*
"Uncuramo i weta kaanaku,
sakawana kupewau manga musumu amembali polandakana aemu."
 
2 KAWASANA OPU bheapekaewa pamarintamu minaaka i Kota Sion.
Kokuasamo i tanga-tangana manga musumu!
3 Raʼeatimu arela bheamaju tee totona incana,
i eona ukapalai manga pasukamu
i bhawona manga gunu momangkilo.
Manga ana manguramu bheaumba i aroamu,
mboomo alo mosapona i wakutuuna raneeo.
 
4 KAWASANA OPU padhamo apotunda
tee Incia inda bheahelaia pendua o kambotuna,
"Ingkoo satotuuna o imamu to saʼumurua
mboomo tuturana Malkisedik."†
 
5 Kawasana Opu dhaangia i weta kaanamu;
Incia bheapahancuru manga raja i eona pamuruna.‡
6 Incia bheahukumu manga lipu,
sabutuna o lipu sumai abukeaka tee manga maeati.
Incia bheapasaki bhaana manga musuna i saangua alamu.
7 Incia bheasumpu minaaka i saangu umala modhaangiana i bhiwina dhala,
siitumo incia bheaangka bhaana roonamo padhamo atalo manga musuna.
+ 110:1 Mat. 22:44; Mrk. 12:36; Luk. 20:42-43; Tul. 2:34-35; 1Kor. 15:25; Kol. 3:1. * 110:1 Opuku: Iwe sii o Kawasana Opu afirimani i Opuna Nabii Daud. Mboomo motoburina i nuncana Kitabi Lele Malape, Opu sumai atosarongiaka Isa Al Masi (kamata Mat. 22:44). † 110:4 Malkisedik: Imamu tee rajana Salem moumbana i Abram sapadhana incia atalo Raja Kedorlaomer tee manga raja mopobhawana tee incia. Siitumo incia momembalina polanciringa mopokanana tee Al Masi bhemoumbana tee bhemotoangkana to amembali raja tee imamu. Kamata Bhaa. 14:17-24 tee Ibr. 7:1-28. ‡ 110:5 Incia bheapahancuru manga raja i eona pamuruna: I wakutuuna aahirina zamani, Opu sumai bheapekatalo bhari-bharia pamarinta inda moʼadili (kamata Zab. 110:1; 2:6-9).
☰