105
Manga Kapujia to Pewauna Kawasana Opu i Zamani Mangenge
105:1-45
1 Sukurumo i KAWASANA OPU, tee ugoraakamo sarona,
pakoleleakea opea ipewauna i tanga-tangana manga lipu!
2 Lagumo to Incia, tee upuji-pujimea;
petulatulaakamea bhari-bharia ipewauna inda momentela!
3 Kaunde-undemo roonamo sarona momangkilo;
taroakamo akaunde-undeaka manga mia mopeelona KAWASANA OPU.
4 Sadiamo upeelo KAWASANA OPU tee uemani kakaa minaaka i Incia;
sadiamo upeeloa.
5 Udhania manga pewauna inda momentela mopadhana ikarajaana,
manga muuzizatina, tee manga kambotu ipakawaakana,
6 e siwuluna Ibrahim, o bhatuana Aulataʼala,
e siwuluna Yakub, uumati ipilina Kawasana Opu!
7 KAWASANA OPU satotuuna o Aulataʼalata;
kambotuna atopake i saangua alamu.
8 Incia sadia bheaudhania o pojanjiana,
tee firimani mopadhana iparintaakana saʼumurua to siwulu bhemoumbana naile itu,
9 siitumo o pojanjia ibhokena tee Ibrahim,
tee o sumpana tee Ishak,
10 Incia apekatangka sumpa incia sumai to Yakub amembali saangu katotapu,
tee amembali pojanjia mobakaa to miana Israel,
11 firimanina, "Tana Kanaan bhekudhawuaka to ingkoo,
amembali tinaurakamu."
12 Wakutuuna miana Israel o kabharina tangkanamo saidhe,
saidhemea, tee manga incia amboore mboomo mia dhaga iwe sumai,
13 manga incia apekalingka-lingka minaaka i saangu lipu sakawana i lipu mosagaanana,
minaaka i saangu pamarinta sakawana i pamarintana lipu mosagaanana.
14 Maka o KAWASANA OPU inda ataroaka incema uka mopisakina manga incia.
KAWASANA OPU audhaniaka manga raja to ajagani manga incia,
15 "Bholi ukia-kiaia manga mia ipiliku,
tee bholi upacilaka manga nabiiku!"
16 Wakutuuna o KAWASANA OPU aumbaaka balaana kaara to lipu incia sumai,
tee apahancuru bhari-bharia kinande modhaangiana iwe sumai,
17 KAWASANA OPU atumpumo samia moporikanaakana manga incia,
sarona mia incia sumai o Yusuf, mopadhana iaso amembali bhatua.
18 Aena apekambelaakea tee rante,
bhorokona atobhokeaka tee rante minaaka i ase;
19 sabutuna opea ipekilalaakana Yusuf atopamondomo,
KAWASANA OPU afirimani ande o Yusuf abanara.
20 Rajana Mesir momaogena kuasana sumai,
atumpu mia to apabebasi Yusuf minaaka i katorongku.
21 Incia aangkea amembali samia momalangana pangkatina i nuncana maligena raja,
tee o raja adhawua kuasa to moʼurusuna bhari-bharia harataana,
22 tee uka adhawua kuasa to aʼatoro manga pagawena raja peepeeluana incana,
tee aadhariaka hikimati to manga mancuana monaasehatina raja.
23 Kasiimpo Yakub aumba i Mesir,
Yakub amboore i Tana Ham mboomo samia dhaga.
24 KAWASANA OPU, apamembalia o uumatina ajulu o kabharina,
tee apamembalia manga incia alabhi o kakaana minaaka i bhalina.
25 Kasiimpo KAWASANA OPU abhalii incana manga miana Mesir to abanci uumatina,
tee atipu miana Israel.
26 Sumaimo Incia alamboko Musa,
tee Harun, bhatuana mopadhana ipilina.
27 Rua-rua miaia apadhaangia manga giu inda momentela minaaka i Kawasana Opu i tanga-tangana manga miana Mesir sumai,
tee apewau manga muuzizati i Tana Ham.
28 Kawasana Opu aumbaaka kalalanda, sumaimo amalalandamo o lipu incia sumai
maka o miana Mesir inda aose firimanina.
29 Incia abhalii uwena miana Mesir amembali raa,
tee apekamate bhari-bharia ikanena manga incia.
30 Manga barakaka abuke i lipuna manga incia
sampe apesua uka i nuncana kolemana raja.
31 Kawasana Opu afirimani, sabutuna aumbamo manga lale mosampa,
tee ngkonunu apabuke saangua lipu.
32 Incia apasapo waona esi,
tee bhibhito mokakila-kila i saangua lipuna manga incia.
33 Incia apabinasa puuna angguru tee puuna ara,
tee apatobhata bhari-bharia manga puuna kau i lipuna manga incia.
34 Kawasana Opu afirimani uka, kasiimpo aumbamo manga kabhoro,
tee o kabhoro mopolaka kabharina inda atogagari.
35 Kabhoro sumai akande bhari-bharia penembula i lipuna manga incia,
tee apepadhaia bhari-bharia hasilina inawuna manga incia.
36 Kawasana Opu uka apekamate bhari-bharia ana tumpe umane modhaangiana i lipuna incia sumai
siitumo bhaa-bhaana o kakaana manga incia.
37 Kasiimpo Aulataʼala apalimba miana Israel apoose abhawa pera tee bulawa,
bhari-bharia manga incia amalape o namisina tee amakaa o bukuna wakutuuna alimba minaaka i Mesir.
38 Miana Mesir akaunde-unde wakutuuna manga incia alingka abholi lipu sumai
roonamo miana Mesir amaeka mpuu tee miana Israel.
39 Aulataʼala abhakesaka taʼina ngalu to apapeulu uumatina,
tee waa to kasuluwi i wakutuuna amalo.
40 Manga incia aemani kinande i Aulataʼala, sabutuna o Aulataʼala alambokoakea manu-manu sonta,
tee manga incia apekambosuakea roti minaaka i laiana.
41 Awetaia o bhatu maoge, kasiimpo apidhimo o uwe,
asiwulu mboomo umala i tana matuu,
42 roonamo Incia audhani firimanina momangkilo,
tee audhani Ibrahim o bhatuana sumai.
43 Jadi Incia abhawa uumatina alimba tee akaunde-unde,
tee manga mia ipilina alagu tee asambo-sambo.
44 Aulataʼala adhawuakea tanana manga lipu mosagaanana to manga incia,
sabutuna manga incia apotibhaaka harataana manga lipu incia sumai.
45 Tee mboo sumai, manga incia amembali akenia pekatangka manga katotapuna,
tee aose kaadharina.
Pujimea o KAWASANA OPU!