102
Doʼa Emaniana Tulungi tee Doʼa to Sion
102:1-29
1 Doʼana samia monarakaana, i wakutuuna amangule tee amalute apeenci i aroana KAWASANA OPU.
2 E KAWASANA OPU, maasangia urangoa o doʼaku;
taroakamo o goraku akawa i Ingkoo.
3 Bholi ubuniakea o roumu minaaka i iaku
i eona kunamisi kanarakaa.
Perangoiaku;
i eona kugora madheimo ulawaniaku,
4 roonamo o dhadhiku aila mboomo ombu,
tee manga bukuku amangau mboomo dhalika.
5 Ngangarandaku mboomo ibhebhe tee amalau mboomo rumpu,
sabutuna amawala kukande.
6 Roonamo kakaana suaraku kupeenci,
badaku soomo buku.
7 Iaku mboomo manu-manu koa i tana matuu,
mboomo koa maidhiidhi i tampa mohancuru tee momalino.
8 Iaku Inda amembali kukole,
mboomo manu-manu modhadhina sambaa-mbaana i bhawona padhana bhanua.
9 Saeoa ahinaaku manga musuku;
manga incia aele-eleaku tee apake saroku to katunda.
10 Iaku kukande rapu mboomo roti,
giu isumpuku apojaloaka lolu,
11 roonamo amaramu tee pamurumu;
uangkaaku, kasiimpo ubhanakaaku.
12 Saesaeo dhadhiku mboomo ngkamia-mia i wakutuuna konowia,
tee kumalau mboomo rumpu.
13 Maka Ingkoo, e KAWASANA OPU, ukokauncuramaka saʼumurua;
saromu asadhaadhaa atoudhani saʼumurua zamani.
14 Ingkoo bheubhangu tee umaasiaka Sion,
roonamo wakutuunamo to umaasiakea,
tee akawamo wakutuu itantuakana.
15 Manga bhatuamu amaasiaka manga bhatuna Kota Sion,
moomini o bhatuna amembalimo ngawu.
16 Sumaimo manga lipu amembali amaeka tee sarona KAWASANA OPU,
tee bhari-bharia raja i alamu amaeka tee pewaumu momulia.
17 KAWASANA OPU bheabhangu Sion pendua,
tee Incia bheaumba i nuncana kamuliangina.
18 Incia bheaperangoi doʼana manga mia monarakaa,
tee o KAWASANA OPU inda bheamendeu doʼana manga incia.
19 Buria bhari-bharia o giu incia sumai to siwulu bhemoumbana naile itu,
mamudhaakana o lipu bhemolaahirina naile itu apuji KAWASANA OPU.
20 KAWASANA OPU apotonto minaaka i kalangaana i tampana momangkilo,
minaaka i sorogaa Incia apotonto i alamu,
21 to aperangoi pekidheina mia itorongku
tee arambasaka manga mia mopadhana itantuaka to atopekamate;
22 mamudhaakana o sarona KAWASANA OPU atopetulatulaaka i Sion,
tee bheatopuji i Yerusalem,
23 wakutuuna manga lipu tee manga pamarintana,
aporomusaka to asambahea i KAWASANA OPU.
24 KAWASANA OPU apaila kakaaku wakutuuna dhaangiapo kumangura,
tee apekampodho umuruku.
25 Kasiimpo kupogau, "E Aulataʼalaku, bholi uala inyawaku i pomuntangaana umuruku,
Ingkoo usadhaadhaa dhaangia saʼumurua zamani."
26 I piamo itu Ingkoo upadhaangia ariina dunia;
umbe, laiana uka karajaana limamu.
27 Bhari-bharia sumai bheamofu, maka Ingkoo usadhaadhaa udhadhi saʼumurua.
Bhari-bharia sumai bheamalusa mboomo pakea,
Ingkoo bheubhalii alamu sii mboomo satuwu juba
tee bhari-bharia uka bheakoʼaahiri.
28 Maka Ingkoo asadhaadhaa inda ubhalii,
tee o dhadhimu inda bheakoʼaahiri.
29 Anamami bheamboore tee kaʼamani,
tee o siwuluna manga incia bheasadhaadhaa i aroamu.