5
Siwuluna Adamu
5:1-32
1 Siimo tulatulana siwuluna Adamu. I wakutuuna Aulataʼala apadhaangia maanusia, Incia apamembalia mboomo gambarana Aulataʼala.
2 Umane tee bhawine, apadhaangiaia manga. Incia abarakatia manga tee asarongiakea "Maanusia" i wakutuuna manga incia apadhaangiaia.
3 Sapadhana Adamu akoʼumuru 130 tao, alaahirimo to incia anana mboomo gambarana karona tee mboomo sandarana karona. Asarongiakea anana sumai Set.
4 Sapadhana Adamu akoanaaka Set, adhadhi 800 tao tee akoanaakamo uka manga anaana umane tee bhawine.
5 Adamu akawamo umuruna 930 tao, kasiimpomo amate.
6 Sapadhana Set akoʼumuru 150 tao, akoanaakamo Enos.
7 Sapadhana Set akoanaaka Enos, adhadhi 807 tao akoanaakamo uka manga anaana umane tee bhawine.
8 Set akawamo umuruna 912 tao, kasiimpomo amate.
9 Sapadhana Enos akoʼumuru 90 tao, alaahirimo Kenan to incia.
10 Sapadhana Enos akoanaaka Kenan, adhadhi 815 tao akoanaakamo uka anaana umane tee bhawine.
11 Enos akawamo umuruna 905 tao, kasiimpomo amate.
12 Sapadhana Kenan akoʼumuru 70 tao, alaahirimo Mahalaleel to incia.
13 Sapadhana Kenan akoanaaka Mahalaleel, adhadhi 840 tao akoanaakamo uka anaana umane tee bhawine.
14 Kenan akawamo umuruna 910 tao, kasiimpomo amate.
15 Sapadhana Mahalaleel akoʼumuru 65 tao, alaahirimo Yared to incia.
16 Sapadhana Mahalaleel akoanaaka Yared, adhadhi 830 tao akoanaakamo uka anaana umane tee bhawine.
17 Mahalaleel akawamo umuruna 895 tao, kasiimpomo amate.
18 Sapadhana Yared akoʼumuru 162 tao, alaahirimo Idris to incia.
19 Sapadhana Yared akoanaaka Idris, adhadhi 800 tao akoanaakamo uka anaana umane tee bhawine.
20 Yared akawamo umuruna 962 tao, kasiimpomo amate.
21 Sapadhana Idris akoʼumuru 65 tao, alaahirimo Metusalah to incia.
22 Sapadhana Idris akoanaaka Metusalah, incia adhadhi amalape pokaiana tee Aulataʼala kangengena 300 tao, tee akoanaakamo manga anaana umane tee bhawine.
23 Idris akawamo umuruna 365 tao.
24 Idris adhadhi amalape pokaiana tee Aulataʼala, kasiimpomo incia indamo dhaangia roonamo Aulataʼala aangkamea.
25 Sapadhana Metusalah akoʼumuru 187 tao, alaahirimo Lamekh to incia.
26 Sapadhana Metusalah akoanaaka Lamekh, adhadhi 782 tao akoanaakamo uka anaana umane tee bhawine.
27 Metusalah akawamo umuruna 969 tao, kasiimpomo amate.
28 Sapadhana Lamekh akoʼumuru 182 tao, alaahirimo to incia samia anana umane.
29 Incia asarongiakea Nuh, kooni, "Anaana sii bheamangadhawu kalalesa i ingkita i nuncana karajaata tee kanguleana limata roonamo o tana padhamo itundana KAWASANA OPU."
30 Sapadhana Lamekh akoanaaka Nuh, adhadhi 595 tao akoanaakamo uka manga anaana umane tee bhawine.
31 Lamekh akawamo umuruna 777 tao, kasiimpomo amate.
32 Sapadhana Nuh akoʼumuru 500 tao, alaahirimo Sem, Ham, tee Yafet to incia.