SURANA PAUL
TO JAMAʼA I
EFESUS
POGAU BHAA-BHAANA
I nuncana Surana Paul to Jamaʼa i Efesus, Paul moburina sura sii apogauaka Haejatina Aulataʼala mamudhaakana "Bhari-bharia giu modhaangiana i sorogaa atawa modhaangiana i dunia, apaposaangua tee Al Masi to mokapalaia," (1:10). Sura incia sii uka satotuuna amembali parinta to uumatina Aulataʼala mamudhaakana manga incia adhikaia i nuncana ngangarandana o maʼanana haejati momaoge minaaka i Aulataʼala to mopaposaanguna bhari-bharia uumatina maanusia alaloi Isa Al Masi.
I weta i bhaa-bhaana surana Efesus sii apogauaka tuaapa o paposaanguana giu incia sumai bheamembali. To apogauaka giu incia sumai, Paul apetulatulaakea tuaapa o Aulataʼala padhamo apili uumatina, tuaapa o Aulataʼala alaloi Isa Al Masi o Anana, aʼamponi tee apabebasi uumatina minaaka i dosa, tee tuaapa o janjina Aulataʼala sumai atanggoa Rohina Aulataʼala. I weta rua anguna, aparintaakea to manga mobacea mamudhaakana manga incia adhadhi apomaamaasiaka mamudhaakana o giu iposaanguakana manga incia momembalina uumati moparacaeana tee Al Masi amembali atopewau.
To asusuaka ande o uumatina Aulataʼala aposaangumo roonamo aposaangu tee Al Masi, Paul moburina sura sii apake pia-pia angu ibarati. Jamaʼa satotuuna mboomo bada, tee Isa Al Masi mboomo bhaana, atawa mboomo saangu bhanua, bhatuna sandina siitumo o Al Masi, atawa uumatina Aulataʼala mboomo samia bhawine tee Isa Al Masi momembalina umanena. Paul amasanaa mpuu incana wakutuuna audhani rahumatina Aulataʼala alaloi Al Masi, sabutuna manga bhoasaka ipakena i nuncana surana apatokamataaka ande o ngangarandana ampuu-mpuu tee asukuru tee apuji Kawasana Opu. Bhari-bharia iburina sii akamatea minaaka i kaasina Al Masi, minaaka i opea ikurubaniakana Isa, iʼamponina Isa, kalapena incana tee kangkilona Isa.
Antona
Porikanaana pogau 1:1-2
Al Masi tee garejana 1:3--3:21
Dhadhi bhaau tamembali Karasiteni 4:1--6:20
Katutubhi 6:21-24
1
Salamu
1:1-2
1 Minaaka i Paul, momembalina rasuluna Isa Al Masi roonamo kapeeluana Aulataʼala. To bhari-bharia mia mosaalihi i Efesus, siitumo manga mia moparacaeana tee Isa Al Masi.
2 Rahumati tee dhadhi malape minaaka i Aulataʼala o Amata, tee minaaka i Isa Al Masi Oputa Momalanga, apoose tee ingkomiu.
Kabarakati to Manga Mia Motopili
1:3-14
3 Bhari-bharia kapujia to Aulataʼala o Amana Isa Al Masi, Oputa Momalanga mopadhana mobarakatina rohita tee bhari-bharia kabarakati minaaka i sorogaa alaloi Isa Al Masi.
4 Aulataʼala padhamo mangapili alaloi Al Masi wakutuuna o dunia sii indapo atopadhaangia mamudhaakana tamangkilo tee inda tee balacita i aroana.
5 I nuncana kaasina, ingkita padhamo mangapili minaaka i bhaa-bhaana alaloi Isa Al Masi to tatoangka tamembali manga anana apokana tee kapeeluana,
6 mamudhaakana atopuji o kamuliangina rahumatina mopadhana ibarakatiakana to ingkita alaloi Anana imaasiakana.
7 Sababuna o Aulataʼala mangatolosi rampaakanamo raana Al Masi, siitumo bhari-bharia dosata aʼamponia apokana tee kaogena rahumatina,
8 idhawuakana motaralabhi-labhi to ingkita alaloi hikimati tee akalana budi momalape.
9 Aulataʼala uka mangapaumbaaka rahasiana kapeeluana tee relana totona incana, siitumo haejatina mopadhana ipatotapuakana alaloi Al Masi.
10 Haejatina Aulataʼala sumai siitumo mamudhaakana bhari-bharia giu modhaangiana i sorogaa atawa i dunia, apaposaangua tee Al Masi to mokapalaia, tee o giu incia sumai bheapamondoa Aulataʼala ande akawamo o wakutuuna.
11 Aulataʼala akarajaa opeapo uka aose kapeeluana tee kambotuna karona. Minaaka i bhaa-bhaana Incia padhamo mangapili, roonamo Incia gauna tamembali uumatina roonamo taposaangu tee Al Masi,
12 mamudhaakana ingkita mobhaa-bhaana moharapuna tee Al Masi, tamembali tapuji Aulataʼala rampaakanamo kamuliangina.
13 Roonamo wakutuuna ingkomiu urango kasameana mobanara, siitumo Lele Malape mopasalaamatikomiu sumai, ingkomiu uparacaea tee Isa Al Masi. Kasiimpo apokana tee janjina, Aulataʼala adhawuakakomiu Rohina Aulataʼala Momangkilo ijanjiakana amembali materaina ande ingkomiu umembalimo pewauana.
14 Rohina Aulataʼala sumai momembalina jamina ande ingkita bhetatarima tinauraka mopadhana ijanjiakana Aulataʼala to uumatina. Giumo incia sumai mangapayaakinina ande o Aulataʼala bheapabebasi uumatina mamudhaakana ingkita bhetapujia rampaakanamo kamuliangina!
Doʼana Paul
1:15-23
15 Rampaakanamo sumai, sarangoku ande ingkomiu uparacaea tee Isa Oputa Momalanga tee umaasiaka bhari-bharia manga mia mosaalihi,
16 iaku indamo kuunto-unto kuemaniakakomiu sukuru i Aulataʼala, tee sadia kuudhani saromiu i nuncana doʼaku.
17 Iaku kudoʼa i Aulataʼalana Isa Al Masi Oputa Momalanga, siitumo o Amata momulia to arahumatiakakomiu Rohina hikimati tee wahiyuu mamudhaakana uʼaarifu tee uhanda umatau Aulataʼala.
18 Iaku uka kudoʼa mamudhaakana o Aulataʼala asuluwi totona incamiu, sabutuna umataua opea iharapumiu minaaka i kakembana, tee uka mamudhaakana umataua tapanamo kabhari o tinauraka momulia mopadhana ipasadiaakana Aulataʼala to manga mia mosaalihi,
19 tee tapanamo kaoge o kuasana to ingkita moparacaeana tee Incia. Kuasana Aulataʼala sumai apokana mboomo wakutuuna kakaana inda momentela asusuakea,
20 ipakena wakutuuna Aulataʼala apadhadhi pendua Al Masi minaaka i mate tee adhawuakea kauncuramaka momalanga kasiimpo adhikaia i weta kaanana i sorogaa.
21 Kauncuramakana sumai alabhi o kalangana minaaka i kauncuramakana sagala pamarinta, sagala mia mokokuasa, sagala kapala, sagala opu tee sarona incemapo uka mopadhana idhawuaka kauncuramaka momalanga, malape modhadhina i zamani sii-sii atawa modhadhina i zamani bhemoumbana naile itu.
22 Aulataʼala adhika bhari-bharia giu i tambena aena Al Masi, tee o Aulataʼala padhamo apatotapuakea to amembali kapalana bhari-bharia giu to manga jamaʼa.
23 Manga jamaʼa sumai satotuuna o badana Al Masi, tee alaloi Incia mangapabukeaka Rohina. Incia uka mopabukena bhari-bharia giu i iapaipo uka.