SURANA PAUL
TO JAMAʼA I
KOLOSE
POGAU BHAA-BHAANA
Kolose sii satotuuna saangu kota modhaangiana i poropinsi Asia Maidhiidhi, i weta i timbuna kota Efesus. Kota Efesus sumai ibu kotana saangu poropinsi Asia Maidhiidhi, tee Asia Maidhiidhi sumai poropinsina lipuna Roma. Sii-sii o tampana Kolose tee Efesus atosarongi Turki. Mencuana Paul mopakakarona jamaʼa i Kolose sii, maka wakutuuna Paul alamboko manga mokarajaana minaaka i Efesus, incia anamisia dhaangia tee tanggojawapuna uka to jamaʼa i kota Kolose sumai. Paul padhamo apotibhaaka lele, ande i nuncana jamaʼa sumai dhaangia manga guru moadhariakana kaadhari mosala. Fikiri ikeniakana manga guru sumai mboo sii, siitumo to tapomatau tee Aulataʼala tee mamudhaakana tatopasalaamati, mia tabeana asomba "manga rohi mokuasaina tee moparintana saangua alamu." Mencuana soo incia sumai, maka manga guru sumai apogau mboo sii uka, manga mia tabeana ataʼati tee aose tuturana tandakia, aose opea mopadhana ilarangi tee mosagaanana uka.
Surana Paul To Jamaʼa i Kolose sii aburia to apatokamataaka kaadharina Karasiteni mobanara tee abhali kaadhari mosala iadhariakana manga guru gau-gau sumai. Antona sura incia sii satotuuna ande o Isa Al Masi amembali apekadhawuaka kasalaamati mompuu-mpuu tee o kaadhari mosagaanana sumai tangkanamo bheapekaridho mia minaaka i Al Masi. Alaloi Al Masi, Aulataʼala apadhaangia dunia sii, tee alaloi Al Masi uka o Aulataʼala apasalaamati maanusia. Tangkanamo alaloi taposaangu tee Al Masi, dunia sii dhaangiapo amembali aharapu to atopasalaamati. Sapadhana sumai, Paul apetulatulaakamo pokaiana kaadhari momalanga sumai tee dhadhina miana Karasiteni.
Faraluu uka atopogauakea iwe sii, ande o Tikhikus -- mobhawana sura incia sii i Kolose to Paul -- asabhangkea Onesimus, bhatua itumpuna Paul to ambuli i opuna, siitumo Filemon, samia jamaʼa i Kolose.
Antona
Porikanaana pogau 1:1-8
Sifatu tee bhari-bharia ikarajaana Al Masi 1:9--2:19
Dhadhi bhaau inamisina manga miana Karasiteni 2:20--4:6
Kapadhaa 4:7-18
1
Salamu
1:1-2
1 Minaaka i Paul, iangkana Isa Al Masi amembali rasulu rampaakanamo kapeeluana Aulataʼala, tee minaaka i witinaita o Timotius.
2 To bhari-bharia mia mosaalihi i Kolose, siitumo manga witinaita motaʼatina tee Isa Al Masi:
Rahumati tee dhadhi malape minaaka i Aulataʼala o Amata, apoose tee ingkomiu.
Emaniana Sukuru tee Doʼa
1:3-14
3 Ingkami sadia taemani sukuru i Aulataʼala o Amana Isa Al Masi Oputa Momalanga, wakutuuna kuemaniakakomiu doʼa.
4 Ingkami tarangomea ande ingkomiu uparacaea tee Isa Al Masi tee ingkomiu umaasiaka bhari-bharia mia mosaalihi,
5 rampaakanamo uharapuaka opea motodhikana to ingkomiu i sorogaa. Giu incia sumai padhamo urangoa i piamo itu i nuncana kaadharina kabanara, siitumo i nuncana Lele Malape,
6 mopadhana ipakawaakana to ingkomiu. Lele Malape sumai mboomo wine motopombulana i tana tee akobhake tee ajulu i saangua dunia tee atorotorosu aumbaaka kabarakati, apokana tee momembalina i tanga-tangamiu pepuu minaaka urangoa tee umaʼanai rahumatina Aulataʼala tee bhari-bharia kabanarana.
7 Giu incia sumai aadhariakakomiu Epafras, sabhangka imaasiakamami. Incia o mia molaianina Al Masi motaʼati tee akarajaa to ingkomiu.
8 Minaakamo i incia ingkami tarangoa ande tee kuasa minaaka i Rohina Aulataʼala imembaliakamiu upomaamaasiaka.
9 Rampaakanamo sumai, sarangomami giu incia sumai, ingkami indamo taunto-unto tadoʼaakakomiu. Ingkami taemani mamudhaakana o Rohina Aulataʼala adhawuakakomiu hikimati tee akala mobanara mamudhaakana ingkomiu apabukeakakomiu tee katauna kapeeluana Aulataʼala.
10 Tee tadoʼaakakomiu mamudhaakana o dhadhimiu bhealaenga i aroana Kawasana Opu, tee ingkomiu bheupasanaa ngangarandana tee apeelua i nuncana bhari-bharia giu, sabutuna opeapo uka ikarajaamiu amembali akohasiliaka giu momalape tee ahanda umatau Aulataʼala.
11 Maasangia tee kuasana Aulataʼala momulia, ingkomiu apekatangkakomiu, sabutuna ukapoia unarakaaka sagala giu hali tee usabara,
12 sumaimo tee ngangaranda mokaunde-unde ingkomiu uemani sukuru i Amata siitumo Aulataʼala. Incia mopamembalikomiu ulaenga upotibhaaka kadhawu ipasadiaakana to manga mia mosaalihi i nuncana Pamarintana Momainawa.
13 Incia uka mopadhana mangarambasakana minaaka i kuasana kalalanda tee mangapapinda i nuncana Pamarintana Anana imaasiakana.
14 Alaloi Anana sumai Incia mangatolosi, tee aʼamponi manga dosata.
Kalabhiana Al Masi
1:15-23
15 Al Masi satotuuna o gambarana Aulataʼala inda momembalina motokamata tee o Al Masi alabhi minaaka i bhari-bharia mopadhana ipadhaangia.
16 Alaloi Incia, Aulataʼala apadhaangia bhari-bharia giu, malape modhaangiana i sorogaa atawa modhaangiana i dunia, malape motokamatana atawa inda motokamatana, malape mokokauncuramakana, mokokuasana, mokopamarintana, tee mokenina kuasa. Saangua pamarinta i dunia sii, bhari-bharia sumai o Aulataʼala mopadhaangiaia alaloi Al Masi, mamudhaakana o Anana sumai amembali raja to bhari-bharia ipadhaangiana.
17 Incia adhaangia porikana minaaka i bhari-bharia giu tee roonamo Incia bhari-bharia giu adhaangia i tampana sumbesumbere.
18 Incia amembali kapala to jamaʼa, siitumo o badana. Incia o ana tumpe mobhaa-bhaana ipadhadhina pendua minaaka i mate, mamudhaakana Incia amembali atolabhiaka mpuu minaaka i opeapo uka.
19 Karona o Aulataʼala mopeeluna mamudhaakana bhari-bharia giu modhaangiana i karona, adhaangia uka i Anana.
20 Tee alaloi Anana uka o Aulataʼala amambotuakea to apewau sagala giu to apomalapeaka pendua tee Incia, malape modhaangiana i dunia, atawa modhaangiana i sorogaa. Aulataʼala apewau giu incia sumai alaloi lembokana raana Anana i kau salib.
21 Piamo itu ingkomiu umaridho minaaka i Aulataʼala tee umusuia i nuncana ngangaranda tee fikirimiu. Giu incia sumai atokamata minaaka i pewaumiu momadhaki.
22 Maka sii-sii, tee mateana Anana, Aulataʼala apambulia pendua o pokaiamiu tee Incia amembali upomalape pendua. Tee cara incia sumai ingkomiu umembali utobhawa upoaro tee Aulataʼala i nuncana kadhaangia momangkilo, inda tee kasalahamiu tee inda ukobalaci.
23 Giu incia sumai bheamembali ande ingkomiu usadhaadhaa uparacaea tee ukakaro pekatangka tee iimanimiu, tee bholi ulimba minaaka i kaharapu modhaangiana i nuncana Lele Malape, siitumo Lele Malape mopadhana irangomiu tee ipakoleleaka i saangua dunia. Iaku o Paul apamembaliakumo mia molaianina Kawasana Opu tee kupaumbaaka Lele Malape incia sii.
Kalaianina tee Kanarakaana Paul
1:24--2:5
24 Sii-sii iaku kukaunde-unde mpuu to bhari-bharia kanarakaa inamisiku to ingkomiu. Alaloi kanarakaana badaku inamisiku sii, iaku kupamondo kanarakaa bheinamisina Al Masi to jamaʼana, siitumo o badana.
25 Aulataʼala atumpuaku kumembali mia molaianina jamaʼa, mamudhaakana amembali kuadhariakakomiu bhari-bharia firimanina Aulataʼala,
26 siitumo lele irahasiaakana Aulataʼala to bhari-bharia mia minaaka i atu-atuna tao i piamo itu, maka sii-sii apaumbaakamea to uumatina.
27 To uumatina sumai o Aulataʼala gauna apaumbaakea tapanamo kalape tee muliana o rahasia sumai to bhari-bharia uumatina maanusia. Rahasia sumai satotuuna: Al Masi dhaangia i nuncana karomiu. Maʼanana giu incia sumai, ingkomiu dhaangiapo tee iharapumiu to upotibhaaka kamuliangina Aulataʼala.
28 Al Masimo sumai ipakoleleakamami to bhari-bharia mia. Ingkami taudhaniakea tee manga incia taadharia tee saangua hikimatimami, mamudhaakana manga incia amembali tapasombaakea i Aulataʼala mboomo manga mia mokawana umuruna i nuncana akalana budina, roonamo aposaangumo tee Al Masi.
29 Siitumo iʼusahaakaku tee ipotimbeakaku tee saangua kakaana bukuna Isa mokokuasana tee mokarajaana i nuncana karoku.