Ci̱ye̱i̱ du teng a bo̱nggo̱
Matayo
Tosugu
Ne̱re̱ wu bala ci̱ye̱i̱ du teng di̱na wii Matayo, yo̱ twii ne̱re̱ wu Yudaya, wu wiino a cu̱di̱ kwati̱mba Yesu wa.
Ci̱ye̱i̱ du teng a wai Matayo a ju̱ki̱ya ki̱n Yesu wii Masiya wu nu̱wa ce̱ ci̱ye̱i̱ ye̱i̱ a mi̱ri̱nggi̱ lakargari̱ndi̱ su dooi, wii yo̱ wu nu̱wa bu Yudaya wa man ni̱i̱ ki̱n baa we̱i̱. A jo̱ro̱ndi̱ tum Ci̱ye̱i̱ du teng a wai Matayo a pero a ju̱ku̱ nyindi su Yesu twanga ce̱wi̱ tu banabi̱ndi̱ ce̱i̱ a lakargari̱ndi̱ su dooi. A ju̱ku̱ya ki̱n Yesu twii ne̱re̱ wu duu Ibrahim. A jo̱ro̱ndi̱ tum a ce̱ ki̱n Yesu twii <<Bo̱l Dawud.>> Yesu a ba yi̱ gi̱ru̱ Masiya, ci̱maci̱ma yi̱ ku nu̱wa bu Yudaya wa le̱e̱ ji̱re̱. Anda kana yi̱to̱ ci̱ye̱i̱ du teng di̱na ki̱ngga bu yi̱gi̱ bu̱ru̱ wang a bo̱nggo̱ nu̱wa bu Yudaya wa. Ci̱ye̱i̱ du teng a wai Matayo ju̱ki̱ya ki̱n, Yesu Masiya baa di̱ngi̱n nu̱wa bu si̱ma wa mwa mwa, nu̱wa bu Yudaya wa yi̱ pma bu yaa yo̱o̱gi̱ nu̱wa bu Yudaya wa.Ci̱ye̱i̱ du teng a bo̱nggo̱ Matayo a ba ju̱ki̱ya dak ki̱n Yesu twii ku̱lu̱m wu gi̱ra wu kangge̱ wu ju̱ku̱gu̱ yi̱ri̱ yo̱u̱ yi̱ ce̱wi̱ ye̱i̱ a ju̱ki̱ya ki̱n wo̱o̱ yi̱ di̱mbi̱r wang, a gwala Musa.
A mi̱ri̱nggi̱ Ci̱ye̱i̱ du teng a wai Matayo nu̱wa cwaanga yi̱ri̱ng tu Yesu ju̱ki̱ya yi̱ tu ni̱ngai̱ a nuwo. Tu gawu̱ri̱ ye̱i̱, Yesu a ju̱ki̱ yi̱ri̱ a dwii ci̱ngu̱, a dwii nyindi su daa ye̱i̱ nu̱wa Yamba ba ni̱nga so̱ngma yi̱ to̱no̱i̱ (Pe̱ndi̱ 5-7). Ju̱ku̱gi̱ yi̱ri̱ a dwii ne̱re̱ wu de̱e̱ ci̱ye̱i̱ a dwii Yesu ni̱ng we̱i̱ wu̱rai̱ ye̱i̱ (Pe̱ndi̱ 8-12). Go̱ro̱ yi̱to̱ wo̱o̱ yi̱ balanggu̱ ci̱ye̱i̱ wundu wundu a dwii Lau̱ Yambau̱ (Pe̱ndi̱ 13-17). Tu ni̱i̱ ye̱i̱ do̱ng a ju̱ki̱ ni̱nga wu daaya nu̱wa bu po̱nggu̱wa ba ni̱nga (Pe̱ndi̱ 18-23). Tu cwata go̱ro̱i̱ a ju̱ki̱ tu ni̱ngdu̱ we̱i̱ a daandi su cwata go̱ro̱i̱. (Pe̱ndi̱ 24-25.)
Yi̱ri̱ng tu mi̱ri̱nggi̱ ye̱i̱
Bir Yesu yi̱ pu twiiwe 1:1-2:23
Wasi̱gu̱ ci̱ye̱i̱ Yohanna wu Ni̱ng Bati̱si̱ma 3:1-2
Bati̱si̱ma Yesu yi̱ cu̱u̱gu̱ yo̱u̱ 3:13-4:11
Wu̱rangi̱ Yesu a si̱ma Galili 4:12-8:35.
Yesu du̱we̱ si̱ma Galili a baa si̱ma Wurcalima. 19:1-20:34
Wu̱rangi̱ Yesu tu cwata go̱ro̱i̱ a Wurcalima 21:1-27:31
Pi̱i̱nggu̱ Yesu a ye̱u̱ yi̱ bo̱o̱ri̱ Ye̱i̱ 27:32-66
Wunggu Yesu bo̱o̱re̱ yi̱ ju̱ku̱ bu̱ri̱ ye̱i̱ nu̱wa 28:1-20
1
Dinendi kakaa Yesu wa
1 21Ti̱na ku̱ci̱ kakaa Yesu Masiya wa, wu twii kaka Dawud, wu yo̱o̱gi̱ kaka Ibrahim.
2 Ibrahim twii mbaa Icaku,
Icaku mbaa Yakubu,
Yakubu mbaa Yahuda yi̱ ci̱yamba ya,
3 Yahuda mbaa Perisa yi̱ Serah wu njaa pmo wii Tamar,
Perisa mbaa Esruna,
Esruna mbaa Aram.
4 Aram mbaa Amminadab,
Amminadab mbaa Nacon,
Nacon mbaa Salmon,
5 Salmon mbaa Boasa wu njaa yo̱ wii Rahab,
Boasa mbaa Obed wu njaa yo̱ wii Rut,
Obed mbaa Jesse,
6 Jesse mbaa balaa Dawud.
Dawud twii mbaa Solomon, wu njaa yo̱ nang twii nu̱re̱ Uriya,
7 Solomon mbaa Rehoboam,
Rehoboam mbaa Abija,
Abija mbaa Asa,
8 Asa mbaa Jehocapat,
Jehocapat mbaa Joram,
Joram mbaa, Ussiya,
9 Ussiya mbaa Jotam,
Jotam mbaa Ahas,
Ahas mbaa Hesekiya,
10 Hesekiya mbaa Manassa,
Manassa mbaa Amon,
Amon mbaa Josiya
11 Josiya mbaa Jekoniya yi̱ ci̱yamba ya, a jo̱r du nu̱wa ku̱ra pma ke̱wu̱ri̱ Babila.
12 Go̱ro̱ ke̱wu̱ri̱ pmai a Babila,
Jekoniya mbaa Ceyaltiyal,
Ceyaltiyal mbaa, Serubabel,
13 Serubabel mbaa Abiud,
Abiud mbaa Eliyakim,
Eliyakim mbaa Asor,
14 Asor mbaa Sadok,
Sadok mbaa Acim,
Acim mbaa Eliyud,
15 Eliyud mbaa Eliyasar,
Eliyasar mbaa Matan,
Matan mbaa Yakubu,
16 Yakubu mbaa Yusupu bwi̱ya Maryamu, wu bi Yesu wu nu̱wa yi̱ri̱ ki̱n Masiya.
17 Di̱ngi̱n to̱no̱ toso bo̱nggo̱ Ibrahim be̱e̱ bo̱nggo̱ Dawud twii kakaa kwap su̱r ni̱i̱, pero toso bo̱nggo̱ Dawud be̱e̱ jo̱r du mwatanga Babila twii kakaa kwap su̱r ni̱i̱, pero toso jo̱r mwatangu Babila be̱e̱ jo̱r Masiya twii kakaa kwap su̱r ni̱i̱.
Bir Yesu Masiya
18 Ti̱na nyinou wu nu̱wa bi Yesu Masiya. Njaa yo̱ Maryam ni̱nga le̱e̱ngi̱ laabwiya yi̱ Yusupu, pu bo̱o̱ de̱ bu yo̱ a nyi̱ngga wo̱o̱ yi̱ rwii a bo̱nggo̱ Bawei du Walwal.
19 Anda Yusupu twii ne̱re̱ wu nyaa yaa kasi̱ ba dwiiyanga yo̱ me̱lma cu̱du̱ nu̱wai̱, a kasa ba man yo̱ tukugi.
20 Anda pu wo̱o̱ danggu̱ yi̱to̱, bacama Mbaa Wu Gi̱ra a bammanu̱we̱ yo̱ a mi̱ri̱nggi̱ dweendi ki̱n, <<Yusupu bo̱l Dawud, nu̱u̱ yaa gwasi̱ de̱gu̱ Maryam ba yo̱o̱ nu̱re̱ mo̱, di̱ngi̱n tu mi̱ri̱nggi̱ pwii ye̱i̱ to̱o̱ a baa bo̱nggo̱ Bawei du Walwal.
21 Yo̱ biru we̱i̱ bwi̱ya, ma je̱e̱ ru we̱i̱ din mi̱n Yesu, di̱ngi̱n yo̱ mi̱ru̱ we̱i̱ nu̱wa ya bo̱nggo̱ we̱le̱mdi̱ pmai.>>
22 Mwa mwa to̱o̱ a ni̱ngwa palaka ba twanga tu Mbaa Wu Gi̱ra ce̱ a bo̱nggo̱ banabi̱ ki̱n,
23 <<Bwe̱e̱canga ni̱ng we̱i̱ rwii, pero biru we̱i̱ bwi̱ya, nu̱wa yi̱ri̱ we̱i̱ din ye̱i̱ ki̱n Immanuwel,>> pi̱ti̱ndi̱ ye̱i̱ ki̱n, <<Yamba wo̱o̱ kem yi̱ yo.>>
24 Pu Yusupu romwa, a ni̱nga tu bacama Mbaa Wu Gi̱ra sa yo̱, a de̱e̱ Maryam ba yo̱ nu̱re̱ yo̱.
25 Anda yaa ku daa yi̱ yo̱, ko̱po̱ jo̱r du bi bo̱l ye̱i̱. Pero a je̱e̱ din ki̱n Yesu.