7
Pam Wanch Yota One Hundred And Forty-Four Thousand Namp Umpin Ngul-Ngangk Thanttang
1 Ngul anpalana ngayana ngaantiyongk four thathangan man-um-yaark than-thanin. Nil thonaman aak mal kungk than, thonaniya, mal yiip than, aꞌ nil thonaniya, aak mal kuuw than, aꞌ thonaniya, mal kaaw than. Thanan wuntan mam-mamin nunang, nil wuntan yipam keꞌ wunpow aak earthang inganiy, aꞌ puth ngak thompang, aꞌ putha yuk thon-thonang thakan keꞌ wunpow.
2 Aꞌ anpalaniya, ngay ngaantiyongk thonangan thathangan anpal kaaw iiy-iiy, nilana maꞌangan yuk keꞌ stamp yimanangan kal-kal, yipam pam wanch al-alantangan namp umpow ngul-ngangk thanttang, yipam meenathow thanang than pam wanch God.antan, nilan man-yetham aak umpuyaman wun-wunan. Nil ngaantiyongkan wik othamayan pech thant ngaantiyongk wiy four al-alantan. Nilan God.angan kaꞌathaman work kan theeꞌ thant, than yipam aak inan aꞌ putha ngak thomp thampan wayathayna.
3 Nil ngaantiyongk anman thaw ngul thant, “Kan kuupāna! Aak earth nanana aꞌ putha ngak thompana, yuk thakan keꞌ yippak wayathāna! Kuupāna, ngamp kan namp umpāmp ngul-ngangk thanttang yuk stamp ilangan, pam wanch God.antam al-alantangan than pam wanch anangan work nungantan iiy-iiyin, nil namp ilangan waaꞌow thanang pam wanch God.antamana.”
4 Anpalaniya, nil weeꞌang nath waaꞌ ngathara, thanang pam wancha puk thaaꞌ-wantanamana, one hundred and forty-four thousand thanan namp umpin ngul-ngangk thanttang stamp alangan, thananiya, wuut mangk twelve al-alantaman wampin, aak Israel amanamana.
5 Than pam wanch puk yota twelve thousand ananganiya, wuut mangk Judah.antam wampin, ngul-ngangkang namp kalin, aꞌ putha than twelve thousand wuut mangk Reuben alantaman; aꞌ putha than twelve thousand wuut mangk Gad alantaman;
6 puth twelve thousand nungantam wuut mangk Asher alantaman; puth than twelve thousand wuut mangk Naphtali alantaman; aꞌ putha than twelve thousand wuut mangk Manasseh alantaman;
7 aꞌ putha than twelve thousand wuut mangk Simeon alantaman; putha twelve thousand wuut mangk Levi alantaman; putha twelve thousand wuut mangk Isaachar alantamana;
8 aꞌ putha twelve thousand wuut mangk Zebulun alantaman; putha twelve thousand wuut mangk Joseph alantamana, putha twelve thousand wuut mangk Benjamin alantaman.
Ngay Pam Wanch Puk Thaaꞌ-Wantanam Thathangan Thanang
9 Ngul anpalaniya, ngayan pal yuup thathanga, pam wanch puk thaaꞌ-wantanam thathangan thanang — puth weeꞌangam countimpungiy thananga? Yaꞌam paththama. Than pam wanch puk kemp wiy-wiyaman, aak nath-nathpalman aak umyompanaman aꞌ puth thaaꞌnganth thon-thonan angman yalamathwin. Aꞌ than angman chair piꞌan umang than-thanin, aꞌ um pam alantangan than-thanin, nilan keꞌ minh lamb yimanangan. Thananiya ngook pach ngoonchina, aꞌ maꞌ thanttanganiya yuk punth keꞌ coconutantam yimanangan piꞌ-piꞌin.
10 Thanan wik othamayan pech-pechin, “Nil God thonamang kaaꞌ-piichanathan ngampang! Nil chair piꞌanangan nyiin-nyiinan! Aꞌ putha pam anan keꞌ minh lamb yimanangana, nil thamp yimanang kaaꞌ-piichanathan ngampang.”
11 Than ngaantiyongk yot maꞌmangkaman-a, chair piꞌan thinthan-a, weentanam than-thanin, pam wuut manth-thayan anangan-a, aꞌ putha than pam four keꞌ minh anangan thamp um-menhang angan. Than ngaantiyongk anangana pungkang thuchin aakangan um chair piꞌan aakanakan, kaaꞌwal thanttaman natham pek aakangan wunpin, aꞌ thanana God.an thaaꞌ-kuumpin nunang.
12 Thanan thawina, “Ngampan nunang God.an thaaꞌ-kuumpāmpana! Nil puth min-minam paththama, aꞌ putha nil maꞌ-kunch thampanga! Nil piꞌan aꞌ thayan paththama! Ngampan thankyou thawāmp nunganta! Ngampan anman thaaꞌ-kuumpāmpan aꞌ thankyou thawāmpant, aak umpuyamaka!”
13 Aꞌ ngul anpalaniya, nil wuut manth-thayan thonaman engk ngathar, “Pam wanch nanangan than ngook pachangan weeꞌ-weeꞌananga? Aꞌ puth aak want-wanttinpal wampin e?”
14 Ngayan puth thawangan nunganta, “Ngay ngoongk-ngoongkama, nintar ep meeꞌmiy thananga.” Yaa, nilan putha thaw ngathara, “Than pam wanch inanganiya, pam wanch wiy al-alangana thaaꞌ-thengkathin thanangwey aꞌ piik-piikin thanang. Thanan putha min-minam pentina. Aꞌ nil God.ana way thanttaman kanam kon-ngath nunang, aꞌ puth ngangk thanttaman pachath puth nil pam keꞌ minh lamb alangan chaapar nungantaman theetath thant.
15 Keꞌ-paal thanan um chair piꞌan God.antamakan thantana, aꞌ puth maꞌ-yotam than workan iiy-iiyantan nungant aak ngench nungantamangan. Nil pam chairangan nyiin-a, an nil thanttang angman aꞌ nilan min-minakam ngul piꞌow thanang.
16 Thanan keꞌ-ngul ngakaman uth-uthamayn aꞌ putha meechan keꞌ-ngul iiy-iiyayn, aꞌ putha kinch karkanangan keꞌ-ngul wukow thanang yaꞌa.
17 Puth ngeenama? Nil puth pam keꞌ lamb alangana, nil anan menhang chair piꞌanangan-a, ngul minam piꞌ-piꞌow thanang keꞌ pam shepherdangan minh sheep nungantam anangan piꞌan yimanangan. Aꞌ puth nil thanang ngangk min ngul yumpow, keꞌ than pam wanch anangan ngangk min weemin ngakan uwin aak eꞌangan. Aꞌ nil God.angan meeꞌ kam thanttaman ngul eꞌathow, keꞌ-ngul peeyayna.”