28
Paul au Malta bonabonana
1 Maranai a ḡota au gera ma a aramanei da tauai au Malta bonabonana.
2 Dobuna ravai i nebelelai ma ivii i ai kaua awariai. Garewa atuna i vikarei ma i ubauba, ma taui au gera ai i viviri.
3 Ma Paul ai ragorago i ḡuna da ai au tepana i tereterei ma mota ḡaiḡaiawana ai bolana malana i vaia da i opui ma Paul nimana i ani.
4 Dobuna ravai i ʼnanai da motana Paul au nimana i dawedawe ma i pari-ararava, “Wei ravana lamna tauviraḡena ma eḡa ita monu wate ata god e ririwa da tauna eḡa ina lawana.”
5 Wate Paul motana i viaikwajiei da ai au menamenana i rauei ma tauna eḡa ita kero.
6 Rava i vipaipai da Paul nimana ita dodo bo ita peu da ita iraḡe. Wate maranai i vipaipai guratana ma i ʼnanai da tauna anina, taui ai nota i virai ma i riwa da tauna god ḡelauna.
7 Au gerana a ḡotaḡota - lana au ḡereḡerena lamna dobuna badana Publius ana wapu ḡaeḡaena. Tauna i taravainiai ma i paina-kauelai da aupom tonuḡa
8 Publius amana i doria manawa ruba ma iniḡuḡura i vaia da i matamatave, Paul i rui inanana aubaina ma urana au tepana i terei ma i raupariei ma i vilawani.
9 Anina ma rava anatapui doridoriai au bonabona i nei ma i vilawani.
Paul au bonabona Malta da i nae au Rome
10-11 Kampa mai Malta maiteni a mae nawaravi tonuḡa. Ma ravai i voagu-kauelai ma maranai ata vomairi, ai ḡoana vaḡai aubaina anatapuna i verelai. Ma waga ḡelauna a gerui lamna mai Alexandria ai waga bodu aubaina kampa i mae. Waga au naona lamna ai god ruaḡa kokoitaui i tai.
12 Kampa ma a amkuka-nae da au Sairakius a ḡota ma a mae aupom tonuḡa
13 Kampa da ambori damana au Regium ma maratomna rauanaḡa i wanabauni ma amkuka ma geraei a ruba da maratom ḡela au Puteoli a ḡota.
14 Kerisiana kampa a nelaḡai ma i riwelai da maiteni a mae wiki tagogi. Anina ma a babara-nae da au Rome taon a ḡeta.
15 Kerisiana au Rome riwaiai i vaia da a nenei ma i ḡei da ita nebelelai, ḡelaui i ḡei au taon e ḡoreḡorei Vaḡavaḡai Tonuḡa ai Numa ma ḡelaui i ḡae Apius ana au maket. Maranai Paul wei ravai i ʼnanai, ma i vinuaiai kaua ma God i viegualauei.
16 Maranai au Rome taon a ḡeta taui Paul numa i verei da ainelana i mae ma sorodia i terei da i ʼnana-vaitetei.
Paul au Rome i raugugula
17 Ma aupom tonuḡa au murina Jew babadai kampa maemaei i rauḡoreiai ma awarii i babani, “Varevareiu tau eḡa aiwai ata kauana-boai ata rava awarii bo amamata ai tarawatu ata viaigai. Wate au Jerusalem i paniu ma i veredamaneu Rome gavena awarina.
18 Mai Rome i etareiu ma i ḡoei da ita rupeniu aubaina eḡa aiwai apoapoena ata kauei da ina viraḡeniu.
19 Wate Jew babadai wei eḡa ita ḡoei ma lamna aubaina Rome babadai a riwei da tau eḡa ana mae wate ana ḡae au ḡaeḡaena Caesar awarina da ita rauetareiu. Wate lamna eḡa au rava ata viviḡaviei, eḡa.
20 Lamna aubaina a ḡoremi weka da tata babani gogona, ma ata riwemi da tau a vipanipani aubaina a vitumaḡana da mai Israel ai tauvilawana wariaḡa i ririwei boiboḡi i nei.”
21 Taui i paribelei, “Tauai eḡa pepa Judeaei ata vaia bo ai rava riwa ita neiai.
22 Tauai aramanei da ravai anatapui kerisiana boruna e paripari-virevirei. Wate tauai a ḡoei da am nota ana vaia.”
23 Ma taui mara i terei da Paul maiteni ita viboru, ma patara i ḡetai mepa Paul i mamaelana. Ma ubaubanai Paul God ana vigulau jimana i vikarei da waguvarai i vorovei. Moses ana tarawatu ma peroveta nununaii ai au buka i mairi ma i jima. I ḡoei da orai ita taini da Iesu ita vitumaḡanei.
24 Ana babaniei ḡelaui orai i taini ma ḡelaui eḡa ita vitumaḡana.
25 Ma taui ava babanina i viparipariniḡaiei ma muriai da ita vilamonei Paul wei riwana tagogi i latoni i pa, “Arua Vivivireina riwa kaua Peroveta Isaiah ponanei amamami i riwei i pa:
26 Ma nae am rava mai Israel awari da ma riwei,
ona nononora wate eḡa ona araramanei
ona inanai wate eḡa anona ona aramanei.
27 Aubaina wei ravai orai i bado.
Taniḡai i gudui,
Taui matai i vopotai.
Mepa da taui mataiei ita inainana,
taniḡaiei ita nononora
oraiei ita araramanei,
ma ita mae-tavirei awariu ma ata vilawani. (Isaiah 6:9-10)
28-29 —Lamna aubaina ona aramanei da God Riwana Aiaina vai-melana aubaina i paritawanei Jentail awarii. Taui ina rautaniḡana.”
30 Paul kampa numa i vivimaiei ma i mae madeḡa ruaḡa taputapuna. Ma rava maḡamaḡaui i nenei da i raraugenari ma wei i vinuaiaiei.
31 Ana tepatorana God ana vigulau ma Iesu Keriso riwana Aiaina i jimei. Ma eḡa aiai ita viḡaei.