तीतकि पौल राशीनेद पत्र
लेखक
पौल स्वता तीत की लीवशिनेद पत्रद ओळख शेश्या, वाळ स्वतान परमेश्वर दास इंगा येशु ख्रिस्त दास आन्या (1: 1). तीत संगा पौल संबंध दी सुरुवात रहस्यद उन्दाद, पण मिम आदी ओकाताळा शेषु शकस्तामकी वाळ पौल सेवाफानीला रुपांतर शेशिन्याला यवार तीतनी सामान्य विश्वासता म खरेम कोडकु आन्या (1: 4). पौल तीतनी सुवार्ता घोशीद शेशेतोळ वगा मित्र इंगा सहकारी इ नात्याता, तीतदी प्रशांशा शेस्काम, वान जेमुद भावना, इंगा इंगोगोरकी सांत्वना इचेळ बद्दल स्पष्ट आदर इच्या.
तारीख इंगा लीवशिनेद जागा
साधारण इ.स. 63 - 65.
प्रेशित्लाद इर्दी पहिला रोम इंदुळ जेलोनकेल इळीनेन्का, पौल निकोपोलीस देगार्केल तितकी स्वताद पत्र लीवाश्या. इफिस इंदू तीमया इंदू फोयेदेंक, पौल तीतसंगा क्रेतबेत मिंदा फोया.
प्राप्तकर्ता
तीत, दुसरा सहकारी इंगा विश्वासला मब्बिळा, जो क्रेतला उंड्या.
हेतू
क्रेतलोन फाता मंडळीलोनी की दोषालाद दुरुस्ती शेशेदेंक सल्ला इच्काम, वारणी ओकाताळा शेस्काम इंगा अनुचित वर्तनता सदस्यल संगा वारदी कमतरता सुधरामतकाम (1) कोता वरीष्टलाद नेमणूक शेस्काम इंगा (2) क्रेतला अविश्वास वालेर ससंगा विश्वासदी इंगा शिंगार साक्ष इद्देंक वारणी तैयार शेस्काम. (1: 5).
विषय
वागणूक शेईता लीवाशिनेद
रूपरेषा
1. अभिवादन — 1:1-4
2. आबागार्दी नेमणूक — 1:5-16
3. वेगळा वयगट संबंधला सूचना — 2:1 — 3:11
4. शेवटदी टिप्पणी — 3:12-15
1
दंडाम
1 परमेश्वर निवडासनेरदी विश्वासइचांग इंगा भक्तीलेका उंडीने खरेंमदी पूर्ण ज्ञानइचांग नेमाशिनेळ येशु ख्रीस्त प्रेशीत इंगा परमेश्वर दास पौल, इन तीकेल:
2 जो सर्वकाळदी जीवन यवारकी खोटा मातलु नळाव आ परमेश्वर युग काळपूर्वी इच्या,
3 आ जीवन दी आशा फत्तेटोर, द्यावर निवडास्ने मंदी विश्वास इचांग इंगा सुभक्ती लेका खरेंम ज्ञानइचांग, आविषयदी वचन वांदी मना ताराशेतोळ द्यावार्दी आज्ञाता नाक इचीने घोषणाला यथाकाळला वाळ प्रकट शेश्या.
4 मना सामाईक उंडीने विश्वास लेका ना खरेम बिडा तीत इनकी; परमेश्वर आबन तीकेल इंगा मना तारासेटोळ प्रभू येशु ख्रिस्त वान्तिकेल कृपा, मया इंगा शांती उंडाला.
क्रेत ला तितुस दी कार्य
5 नीन नीनु क्रेत बेट मिंदा दिनकस्रोम फेटीवस्तीन की, नु पूर्ण न आयनेय माटलाद व्यवस्था शेईयाला इंगा नीन निक आज्ञा शेशीनेलेका नु हर नगरला आब्बन नेमाय.
6 यवारणी नेमाला वाळ निर्दोष उंडाला, वगा आंडीदान मोगुल उंडाला, वान बीळलु विश्वास फेतेटोर उंडी वार्मिंदा घयरेट पनाद आरोप वचीनेद लेकुंडी वार अनावर बेक्काल्या.
7 प्रमुख इळ द्यावारतोल कारभारी उंडाळ दांचांग वाळ निर्दोष उंडाला, वाळ मोकाट, रागिस्त, सराय तागेटोर, मत्तेटोर डोंगतारला दुडलु कामाशेतोर बेकाल्या;
8 तर सुत्ताल बद्दल मंचीद, स्वभावादी आवड फेत्तेतोल; मर्यादाला, द्यावर मणशी, पवित्र, सहन शेशेतोळ,
9 इंगा इचीनेय शिक्षण लेका जो विश्वासदी वचन फेटी निलचेतोल इल्ला उन्डला; दिन्चांग कि वाळ शिक्षणदी माहिती शेयदेंग व उलटा मातालायेतोर की बरोबर उत्तर इचेतोर बेक.
खोटा शिक्षण
10 इदी महत्वद उंडाद येनटीक की संगेंम मंदी बंड शेशेतोर उंडार. यवार व्यर्थ माटलाविषइला बडबड शेस्तार इंगा मंदीन फसामत्तुतार. नीन विशेष आंटे, यवार सुंता आईनेर उंडार वारणी संबोधाशी माटलाळतुनान.
11 वार नोरलू बंद शेया बेक; वार शिका मत्ता बेकालेद आय्यी माटलु वार चुक लाभ इचांग शिका मत्तुतार इंगा पूर्ण इल्लूद उलटापालता शेस्तार.
12 वारला वगा संदेष्ट्याल आनीर कि, 'क्रेती बेट मनसलू इर हमेशा लबाड, पक्षीलेका खतरनाक, आळशी इंगा खादोळेर उंडार.'
13 इदी साक्ष खरेंम उंडाद. तरी वार वीश्वासला स्थिर उनडाला दानचांग नु वांदी निषेध शेय.
14 दिनकस्रोम कि, वार यहूदी कथालतीकुड इंगा खरेमतीकुडकेल तीप्पेटोळ, मणशी आज्ञालतीकुड लक्ष इया रोद. विश्वासला पक्का काबेक.
15 यवार शुद्ध उंडार इल्ला मंदी पूर्ण माटलू शुद्ध उंडाय पण जो नष्ट आईनेय उंडाय इंगा विश्वास फेटार इलोटोर्की एमी शुद्ध लेद पण वारी मनलु इंगा विवेक इद्दीपण घाण उंडाय.
16 वार मंदी 'मिम परमेश्वर न ओळखास्ताम' इल्ला उघड शेप्तार, पण वार आ फणीन नाकारास्तार. वार अमंगळ इंगा अंदाज शेशेटोर इंगा यादपन मंची फनिला परीक्षा बिना दिगीनेर आढळास्तार.