थेस्सलनीकरास मंडळीक पौल राशीनेद पहिला पत्र
लेखक
प्रेषित पौल स्वताक इ पत्रद लेखक कान रोंड तुकला संबोध शेशिडाड (1: 1; 2:18). सीला आणि तीमथ्य (3: 2, 6), मंडळीद स्थापणा आएन्द बाद दुसरा सुवार्थ फेरी लोन पौल प्रवास (प्रेषित 17:1-9), वाड एदी पत्र वार एडशी हिनापुड काही महिना लाने विश्वास फेटेतोरक राशा. थेस्सलनिका इद पौल्द सेवा तों फक्त यहुदी ओर क लेद तर उनगो जाती ओरक मान्सलाकभी स्पर्श शेषा. मंडलीलोनोर सना मंदी उनगो जातीद मूर्तीपूजा नुस बेटीक वाचीनीर, याद आ काळलोनोर यहुदाला वेशेष्ट समस्या लेका हो (1 थेस्सल. 1:9).
तारीख आणि लीवाशेनेद जागा
साधारण इ.स. 51.
पौलुड करिंथ शहरलोनोर्क थेस्सलनीका एद टोरक मडळीक मनाद पत्र राशा.
प्राप्तकर्ता
तरी इदी सर्वसाधारण पनागोन अन्ता क्रिस्ती माणसालान माटलाडेद उंड्या तरी, 1 थेस्स. 1:1 थेस्सलनीकाकरांक पहिलाद पत्रद अपेक्षित वाचक कान “थेस्सलनीका इडी टोर मंडळी” नोर सदस्यन ओळखास्ताद.
हेतू
पौलंद इदी पत्र राषेद उद्देश उंड्या कि कोता रुपातरिक मन्सलाद वारद परीक्षेला उत्तेजन एचेद (3: 3-5), धार्मिक जीवन जगाशे कसरोम सूचना एचेद (4: 1-12) इंगा क्रीस्ताद इंगा वचेद पहिला सचेटोर विश्वासवेटीनोर बाविशाबद्दल आश्वासन एचेद (4: 13-18), एमी पण उन्गोट, नेतिक ईगा व्येवारिक गोष्टी सुधाराशे कस्रोम पत्र राषीडार.
विषय
मंडळी समंधी काही माटल
रूपरेषा
1. धन्यवाद एचेद — 1: 1-10
2. प्रेषितीय क्रियांद संरक्षण — 2: 1 — 3:13
3. थेस्सलनीका कसरोम उपदेश — 4: 1 — 5:22
4. समाप्तीद प्रार्थना आणि निष्ठा — 5:23-28
1
दंडम व उपकारस्तुती
1 परमेश्वर आब्बा इंगा प्रभू येशु ख्रिस्ता वारता उंडीन्द थेस्सलनिका शहराल्द मंडळी दान्क पौल, सील्वान तिमथ्य वानद्वारे मीरक कृपा व शांती उंडान.
2 मीम मनाद प्रार्थनाला मीद आठवण शेस्केन सर्वदा मीर आंदार ईशयला परमेश्वरदी उपकार स्तुति शेस्ताम.
3 मनाद द्यावार आब्बा मुदारा मीरद इश्वासागोन शेशीद फणी, प्रीतीगोन शेशीन्द श्रम व मनाद प्रभू येशु ख्रिस्तामिदूडद आशेगोन फटीन्द सहनशीलता दान्द मीम निरंतर आठवण शेस्ताम.
4 तम्मूलु, मीर द्यावारद प्रिय उंडार, मीद आईन्द निवड माक यरका उंडादच;
5 कारण माद सुवार्ता केवळ शब्दागोन लेद, तर सामर्थ्यागोन, पवित्र आत्म्यागोन व पूर्ण खात्रीगोन मीरक तेलपदेन्क वच्या आळाच मीर इचाका मीम मीरबराबर उंडीनाप्पुड यळा वागास्तीम इदी मीक यरक्का उंडाद.
6 मीर शना संकटाला उंडीनाप्पुड पवित्र आत्म्याद आनंदागोन वचन अंगीकार शेशी माद प्रभून्द अनुकरण शेशातोर आयिर;
7 एलाकी मासेदोणीया व अखया दाटलोन्द आंता इश्वास फेट्या तोरक मीर उदाहरण इळा आइनेद उंडार.
8 मासेदोणीया व अखया दानटल्या मिरतिकूट प्रभून्द वचनाद घोषणा आईन्द उंडाद; इन्ताच केवळ लेद तर परमेश्वर मिन्दुडदी मिद इश्वासाद बातमीही आन्तातिक पसराशिंद उंडाद; दानगोन दानइश्य माक यम शपेद गरज लेद.
9 कारण मिरता माद वचेद याद प्रकारद आय्या, इदी वार मनाम आइ माईशयला शपतार; मीर मूर्तीदग्गारनूट परमेश्वरतीक यळा वळास्तीम इंगा जीवंत व खरेम परमेश्वर सेवा शस्देन्क,
10 इंगा वान्द कोडकु येशु वान्द स्वर्गानूट वच्चेद दावा सूस्देन्क, वाड कडंकु आंटे येशु वान्क द्यावारा सावानूट लेफ्या व वाड मना भावी क्रोधानूट इडशातोड उंडाळ.