करिंथकरांस मंडळीक पौल राशीनेद पहिलाद पत्र
लेखक
पौलनी इ पुस्तक लेखक मानास्तार (1 करिंथ 1: 1-2; 16:21) आल्ले पौल दी पत्र आन्का सुद्धा ओळखास्तार. काई वेळ पहिला लेकाते वाड इफिसला उंडेत्तापुड पौल करिंथ मंदीक इदी पहिला पत्र लीवाश्या (1 करिंथ 5:10-11) इंगा करिंथ मंदीक इदी पत्र तेल्वालेद इंगा दुर्दैवता आदी पत्र अस्तित्वला लेद. इ “पहिला पत्रय” (येनटीन आंटार) आन्नी माटलू पूर्ण येरका लेद, पहिला करिंथ मंदीक पौल करिंथ मंडळी तीकनुस शिक्कीने पत्रद उत्तर आन्का विचार शेशीनाड, दान कसोम आदी इ पहिला पत्रद उत्तर विषयला कदाचित राशिनाड.
तारीख इंगा राशिनेद जागा
साधारण इ.स. 55 - 56.
इदी पत्र इफिस तीकनुस राशिनार (1 करिंथ. 16:8).
प्राप्तकर्ता
जरी पौल वान उद्देशता वाचाशेतोरनी “आन्नी तीकुड मना प्रभू येशु ख्रिस्तन फेरता प्रत्येक ठिकाणला कुतेस्ताड” (1: 2) तरी 1 करिंथटोर इच्छा उंडीनोर वाचकलू “करिंथ इंदूड द्यावार मंडळीटोर” सदस्य उंडीर. (1 करिंथ 1:2).
हेतू
करिंथ इंदूड मंडळी सध्या स्थिती बद्दल पौलकी शेंगेम स्त्रोतला तीकनुस माहिती शिकीन्या. इदी पत्र राशेद वानदी हेतू इदी उंड्या की मंडळीन क्षेत्रलोन कमीपनाद शिकवण इचकाम इंगा पुनर्संचयित शेस्काम (1 करिंथ 15), वाईट, खोटा शिक्षणला लेका चुकुय पद्धतलु सुधरामतकाम. (1 करिंथ 5, 6:12-20), इंगा प्रभू भोजन दी गैरवापर (1 करिंथ 11:17-34). करिंथ इंदुड मंडळी भेट इचीन्या (1: 4-7) पण अपरिपक्व इंगा अयोग्य (3: 1-4), दान कसोमे पौल मंडळी नडमा पापलाद समस्या यल्ला इडपियाला दिन बद्दल वगाट महत्वद प्रतिकृती इच्या. संबंधला भागलू इंगा आन्नी प्रकारी वाईट माटलातीकुड कंडलु तीप्पांदे तर वार समस्याल ईडपीचीर.
विषय
विश्वासू मंदीद आचरण
रूपरेषा
1. ओळख — 1:1-9
2. करिंथ मंडळीला भागलू — 1: 10 - 4: 21
3. नैतिक इंगा नीती विषयला मतभेद — 5: 1 - 6: 20
4. फेंडलीद सिद्धांत — 7: 1-40
5. प्रेषितलाद मोकळीकता — 8: 1 - 11: 1
6. आराधना इंगा निर्देश — 11: 2-34
7. आत्मिक वरदानलु — 12: 1 - 14: 40
8. पुनरुत्थान मिन्दनुस शिकवण — 15: 1 - 16: 24
1
दंडाम इंगा उपकारस्तुती
1 द्यावार इच्छाता ख्रिस्त येशुन प्रेषित आयदेंक फिल्चीनोड, नीन पौल इंगा तम्मूड सोस्थनेस तीकनुस,
2 करिंथ शहरला उंडीने द्यावार मंडळीक नीन पत्र रास्तान, आंटे ख्रिस्त येशुन तीकनुस पवित्र शेशिनोर इंगा पवित्रमंदी आयदेंक फीलचीनोर आंदार कसोम येवार प्रत्येक जागाला मना प्रभु येशु ख्रिस्तन फेरता प्रार्थना शेस्तार, वाड वारकी इंगा मनाक पण प्रभुड उंडाड
3 द्यावार मना आब्बाड इंगा प्रभु येशु ख्रिस्तन तिकनुस कृपा इंगा शांती उंडाला.
पौलदी द्यावारकी धन्यवाद
4 ख्रिस्त येशुला मी मिंदा आय्यीने द्यावार कृपा कसोम नीन नेहमी मी कसोम ना द्यावारदी उपकार मानास्तान.
5 येनटीक की, द्यावार मिमलान ख्रिस्त येशुन तीकनुस प्रत्येक बाबतीला, आन्नी माटलाला इंगा आंता आत्मिक ज्ञानला समृध्द शेशीनाड.
6 इल्ले ख्रिस्त बद्दल माद साक्ष खरेम उंडीनेद मि नडमा खात्री आय्या.
7 इप्पुड मी नोना यादुच आत्मिक दानलाद कमी लेद, यल्ला मीर मना प्रभु येशु ख्रिस्तंदी वापस वच्चेद दावा सुस्तार.
8 द्यावार मीमलान आखरी नंताक टीकायामती पण फेट्टी, दिन कसोम की मना प्रभु येशुन ख्रिस्तन वापस वच्चे दिनमुला मीर निर्दोष उंडाला.
9 वाड द्यावार विश्वासु उंडाड, यवाड मना कोडकु येशु ख्रिस्त, मना प्रभुन सहभागिताला मीमलान फीलचीनाड.
करिंथ मंडळीला फुटलु
10 तर इप्पूड, तम्मूडलु इंगा शेल्यांलू, प्रभु येशु ख्रिस्तन फेरला नीन मिक शेतुल जोडशी विनंती शेस्तान की, मीर आंदार वगामेगारसंगा वगा मनता वगातळा कावाला इंगा मीनडमा मतभेद उंडाराद, पण मीर वगाटे माटा माटलाडाला.
11 येनटीक की ना तम्मूडलु इंगा शेल्यान्लू ख्लोवेन इल्काटोर मंदीतिकनुस नाक इल्ला येरका आय्या की, मी नडमा जगडाल उंडाय.
12 नाद म्हणणं इल्ला उंडाद की मी दिन्ल्योन्टोड प्रत्येक मणशी आंटाड की, “नीन पौलनी मानास्तान.” “नीन अपुल्लोन मानास्तान,” “नीन कैफान मानास्तान,” “नीन ख्रिस्तन मानास्तान.”
13 ख्रिस्तय भागलू फडनाय येम? पौल क्रूसमिंदा मीकस्रोम खिळायदेंक वचीन्या येम? पौल फेरता मिद बाप्तिस्मा आयनाद येम?
14 इल्ला यवारूच आनाराद की, ना फेरला मीद बाप्तिमा शेयदेंक वचीनाद.
15 नीन द्यावारदी आभार मानास्तान की, क्रिस्प इंगा गायस इरनी इडशी नीन यवारदीच बाप्तिमा शेया लेद.
16 स्तेफन इंटल्योन्टोरदी पण नीन बाप्तिस्मा शेशीनान, दिन इडशिगास, तर इंगा येवारदीच बाप्तिस्मा सेशीनेद नाक ध्यानाम लेद.
17 येनटीक की ख्रिस्तड ननू बाप्तिस्मा शेयदेंक लेद तर शुभवर्तमान शपदेंक आम्पीनाड, आदी पण मनशी ज्ञानगोन लेद, इल्ला कावाराद की, ख्रिस्तंदी क्रूसमिंदा सच्चेद सामर्थ्य वाया फोवाराद.
ख्रिस्तंदी सामर्थ्य इंगा द्यावारदी ज्ञान
18 येनटीक की यवारदी नाश आतुनाद इलोन्टोरकी क्रूसदी संदेश मूर्खपनाद उंडाद, पण मनाक तारण आय्येतोरकी आदी द्यावारदी सामर्थ्य उंडाद.
19 येनटीक की पवित्र शास्त्रला इल्ला राशीनेद उंडाद,
“शहाण्योरदी शहाणपण नीन नष्ट शेश्यान इंगा
बुद्धी उंडीनोरदी बुध्दी नीन वाया फोवा मत्यान.”
20 ज्ञानीला ज्ञानुक महत्व यंदु नीलच्या? नियमशास्त्र गुरूलाद महत्व यंदु नीलच्या? इ दुन्यामला फोर फेटकुनेतोरदी महत्व यंदु नीलच्या? द्यावार दून्यामदी ज्ञान मूर्खपणाद ठराय मतालेद येम?
21 येनटीक की, द्यावार वान ज्ञानता निर्णय तीस्कुन्या की, ज्ञानी वान ज्ञानता द्यावारनी गुरतू फट्टाड, दिन कसोम, द्यावारकी इदी शिंगार वाटाश्या की मा संदेश “मूर्खता नुस” यवार विश्वास फेटतार वारदी तारण शेय्याला.
22 येनटीक की शेंगेम यहुदी मंदी चमत्कारी चिन्हल आडगुतार इंगा ग्रीक मंदी ज्ञान फुडकुतार,
23 पण मीम क्रूसमिंदा खिळाशिने ख्रिस्तन गाजामतुताम. इदी संदेश यहुदी मंदीकस्रोम अडथळा इंगा यहुदी लेनोर मंदीकस्रोम मूर्खपणा इल्ला उंडाद.
24 पण यवारनी फिलचिनेद उंडाद, इल्लोन यहुदी इंगा यहुदी लेनोर इद्दार कसोम इदी संदेश ख्रिस्त उंडाड. येवाड द्यावारदी सामर्थ इंगा द्यावारदी ज्ञान उंडाड.
25 येनटीक की याद मीर द्यावारदी “मूर्खपणा” आंटार आदी मनसुला ज्ञान काना जास्त ज्ञानी उंडाद इंगा येनटीन मीर द्यावारदी “अशक्तपणा” समजास्तार आदी मनसुला शक्ती काना जास्त शक्तीशाली उंडाद.
फक्त द्यावार मिंदा घमंड
26 तर इप्पूड तम्मुडलू इंगा शेल्यांलू, द्यावार मिमलान फिल्चीने बद्दल विचार शेयांडा. मनशी कंडलाला मीदिंटल्योन्टोर शेंगेम बुद्धिमान, सामर्थ्यशाली, फेद्दा कुळलोन्टोर लेकुंडीर,
27 पण द्यावार दून्याम लोन मूर्ख समजास्ने माटलू निवडाशीनाड, दिनकस्रोम की, ज्ञानी समाजास्ने माटलान शिग्गुना केडपाला. इंगा अशक्त समजास्ने माटलू निवडाश्या की शक्तीशाली समजास्ने माटलान शिग्गुना केडपाला.
28 येनटीक की द्यावार दुन्यामलोन नीच, तुच्छ मानाशीनोर, येवारनी “कोलवार” वारनी निवडाश्या. दिनकस्रोम की येवार “येमाना उंडार” वारनी कोल्वाराद.
29 दिनकस्रोम यवाडबी मनशी द्यावार मुंदार घमंड शेय्याराद.
30 द्यावार मिमलान ख्रिस्त येशुन संगा भेटाय मतनाड, मना फायदा कसोम द्यावार वान ज्ञान बनायमत्या, ख्रिस्त मनालनी द्यावार संगा भेटायमत्या; वाड मनालनी पवित्र शेश्या इंगा मनालनी पापलानुस मुक्त शेश्या.
31 दिनकस्रोम पवित्र शास्त्रला इल्ला राशीनेद उंडाद, “यवाड घमंड, शेस्ताड वाड प्रभुन बद्दल शेय्याला.”