8
Jesús tsikjén ñujun mi xuta
Mt. 15:32-39
1 Jngu nixtjin kionga ꞌñu nkjin xuta kuañajan ngani ꞌba tumé tjinre mé= xi skine, Jesús kinchjare xutare ꞌba kitsure:
2 —Ne faꞌanimana̱ xutankjinbi, ngatꞌa je ján nixtjin nga tjindukona̱ ngaꞌe ꞌba bi nde tjinnire mé= xi skine.
3 ꞌBa tsa kꞌuete kjindia ndaba, ku̱anre tsa ku̱aꞌinda ngaya ndiyo, ngu ne kjin jendiba yakꞌani.
4 ꞌBa xutare kitsingojore:
—¿Tunga ñá kuechjaꞌaña xi chine xi ku̱anire xutankjiun nga jngu ngaꞌnde tꞌaxin joni ngaꞌe nga tuꞌyá tjindu?
5 ꞌBa Jesús tsiningiyare:
—¿Jótjin niñuxtila tjinnu?
—Yatu mani —kitsingojo xutare.
6 ꞌBa Jesús ꞌexa nga xutankjiun ngatꞌendu tꞌa nangiu. Kiskjebe niñuxtila xi yatu ꞌba kionga je kitsjare kjuanda Naꞌenchana, kitsixkua ꞌba kitsjare xutare, ꞌba kui kitsikaꞌbisunre xutankjiun.
7 ꞌBa nde tjinjóre tjiuti ngayeje. ꞌBa Jesús kitsjare kjuanda Naꞌenchana ngatꞌa tseꞌe tjiutiu, ꞌba ꞌexa nga ngatatsikaꞌbisunre xutankjiun ngayeje.
8 ꞌBa ngatsiꞌi tsakjen kaꞌnda nga kitsere, ꞌba kionga kiskjaꞌañajan xkua xi tsꞌangi, yatu nisin kuán.
9 ꞌBa je mején ñujun mi mani xuta xi tsakjen. ꞌBa jaskan Jesús kitsikixantꞌa xutankjiun
10 ꞌba jaꞌasꞌen jngu barku ko xutare ꞌba kiji jngu ngaꞌnde xi Dalmanuta ꞌmi.
Nchja fariseo miꞌare Jesús nga saꞌen jngu chu̱ba̱
Mt. 16:1-4; Lc. 12:54-56
11 ꞌBa jaꞌe nchja fariseo ꞌba ꞌetutsꞌinre nga josiko Jesús. ꞌBa tuxi skutꞌayakoni, tsiꞌare nga saꞌen jngu chu̱ba̱ tuxi kuakuchuyani nga ngatꞌare Naꞌenchana jendibani.
12 ꞌBa Jesús ꞌñu jaꞌatsere ꞌba kitsu:
—¿Ánñu xuta xi tjin ngandaꞌe jngu chu̱ba̱ miꞌani? ꞌBa xinkixi_nuu̱ nga bi kuaꞌere xuta xi tjin ngandaꞌe jngu chu̱ba̱.
13 ꞌBa ꞌbatsaꞌen kitsikꞌendu kui xutabiu, ꞌba jaꞌasꞌen ngani barku ꞌba xingunda ndachikun kiji.
Jesús ꞌbejña jngu kjuakusun ngatꞌa tseꞌe naꞌyu sanre nchja fariseo
Mt. 16:5-12
14 ꞌBa xutare Jesús kichiyajinre nga tsakaꞌa niñuxtila; tu jnguchi niñuxtila yaꞌa ngaya barku.
15 ꞌBa Jesús kitsure:
—Chutsijon, ꞌba tikuendo yojonu ngatꞌare naꞌyu sanre nchja fariseo ꞌba ko tseꞌe Herodes.
16 ꞌBa xutare inyafako nijmi xinkjin ngatꞌa kuankjinre nga kui kjua nga tsajainre niñuxtila.
17 ꞌBa Jesús kuankjinre xi inyatsure xinkjin xutare, ꞌba kitsure:
—¿Ánñu techuba nijmiñu nga tsajainnu niñuxtilajín? ¿A kje machuꞌyajínnu ꞌba a ninga kje mankjinjínnu? ¿A ne tijñunu?
18 Tjin= xkún. ¿A bi machuꞌyanu? ꞌBa tjin= ñojón. ¿A bi nuꞌyo? ¿A bi nde faꞌetsjenninu?
19 Kionga kitsikaꞌbia̱ ón niñuxtila ngajinre ón mi xuta, ¿jótjin nisin kjinitsio ko xkuare xi tsꞌangi?
ꞌBa xutare kitsingojo:
—Tejó nisin.
20 —ꞌBa kionga kitsikaꞌbia̱ yatu niñuxtila ngajinre ñujun mi xuta, ¿jótjin nisin kjinitsio ko xkuare xi tsꞌangi?
—Yatu nisin —kitsingojo.
21 ꞌBa ꞌbatsaꞌen Jesús kitsure:
—¿A kje mankjinjínnu?
Jesús tsinda jngu xuta ka naxinanda Betsaida
22 ꞌBa jaskan Jesús ko xutare echu naxinanda Betsaida; ꞌba kio jaꞌechanire jngu xuta ka, ꞌba kisꞌetsꞌare nga ngatatsiko.
23 ꞌBa Jesús kiskjebe ntsja xuta ko, ꞌba ꞌetukajinko naxinando. ꞌBa kitsikaꞌnyi xkun ko ndatiare ꞌba yanere ntsja ꞌba tsiningiyare:
—¿A je matsejenri tsajmi?
24 ꞌBa xuta ko kiskutsejenndaire, ꞌba kitsu:
—Je ꞌbia̱ xuta, tunga joni ya xi setsuma matsejenna̱.
25 ꞌBa Jesús yane nganire ntsja xkun, ꞌba xutabiu nda kiskutsejen, ꞌba kuanda, ꞌba je ne nda kuatsejen yejere.
26 ꞌBa ꞌbatsaꞌen Jesús ꞌete ndaba, ꞌba kitsure:
—Bi nde bitjasꞌenjinni naxinando ngandaꞌe.
Pedro tsu nga Jesús xi Mesías
Mt. 16:13-20; Lc. 9:18-21
27 ꞌBa jaskan Jesús ko xutare kiji ngaꞌnde xi tjin Cesarea ña batexuma Felipe. ꞌBa kionga tjenya ndiyo, Jesús tsiningiyare xutare:
—¿Jó tsu xuta nga ꞌyá=niña̱ an?
28 ꞌBa kui kitsingojo:
—Tjin xi tsu nga ji= ni Juan Bautista, ꞌba tjin xi tsu nga ji= ni Elías, ꞌba yakꞌa xi tsu nga jngu ni profeta.
29 ꞌBa Jesús tsiningiyare:
—Tunga jun, ¿jó mixun nga ꞌyá=niña̱ an?
ꞌBa Pedro kitsingojo:
—Ji= ni Mesías.
30 ꞌBa Jesús ꞌñu ꞌenere nga tuꞌyá ngateꞌere nijmi kibi.
Jesús beꞌe nijmi nga kueya ꞌba nga kjuaꞌaya nganire
Mt. 16:21-28; Lc. 9:22-27
31 ꞌBa Jesús ꞌetutsꞌinre nga yeꞌere nijmi xutare nga Kiꞌndire Xuta xiꞌiun ne tse kjuanima kjuaꞌaxtiu, ꞌba nga kꞌuaxjengi xuta chingare naxinando, xi ngakure naꞌmi ꞌba xuta chjine kjuatexuma. Kitsure nga kjuinikꞌen, tunga nga kjuaꞌaya nganire xi majánni nixtjin.
32 Kibi nda kitsuyare. ꞌBa kio Pedro kikotꞌaxin Jesús ꞌba ꞌetutsꞌinre nga jatiko.
33 Tunga Jesús kitsikuꞌbeya ꞌba kiskutsejenꞌa xutare, ꞌba jatiko Pedro nga kitsure:
—¡Tisentꞌaxin ngatꞌana̱ chanayi!, ngatꞌa bi ninkjin_ri takuin tsajmi xi tseꞌe Naꞌenchana, tu xi tseꞌe xuta ngasunꞌndebi=.
34 ꞌBa jaskan Jesús kinchjare xutare ꞌba ko xutankjiun xi tjenngire, ꞌba kitsure:
—Tsa ꞌyáñu xi mejénre ku̱an xutana̱, ngatatsichiyajin yojore ꞌba ngataꞌanijin krure ꞌba ngatjandetjenngina̱.
35 Ngatꞌa xi mejénre sikꞌangi yojore, sichaja; tunga xi sichaja yojore ngatꞌana̱ an ꞌba ngatꞌare en nda xi tsikꞌangi, kui= xi sikꞌangi.
36 ¿Jótsaꞌen ku̱achjenre xuta tsa saꞌen ngayéje ngasunꞌndio ꞌba tsa sichaja kjuabenichunre?
37 ꞌBa nde ¿jótjin kꞌuechji ngatꞌare kjuabenichunre xuta?
38 ꞌBa tsa tjin xi masubare ngatꞌana̱ ꞌba ko ngatꞌare enna̱ ngixkun xuta xi tjin ngandaꞌe, xuta xi bi ntꞌere Naꞌenchana ꞌba xi xuta je, ꞌba=nde Kiꞌndire Xuta xiꞌiun ku̱asubare ngatꞌa tseꞌe kui xutabiu kionga kjuaꞌe ngani nga ko kjuajere Naꞌenre ꞌba ko ankjele tsjere.