12
Jesús ꞌbejña kjuakusun ngatꞌa tseꞌe nchja chꞌokun xi tsaꞌexako uva
Mt. 21:33-46; Lc. 20:9-19
1 ꞌBa Jesús ꞌetutsꞌinre nga ꞌejña kjuakusun:
—Jngu xuta ꞌentje tsujmi ntje xi uva ꞌmi, ꞌba ꞌenchꞌare; ꞌba kiskjuꞌngi jngu ngaꞌnde ña sitsꞌiungi uva, ꞌba kiskjenitjen jngu torre nkꞌa tuxi sikuenda yejeni.
’ꞌBa jaskan kitsikeyare nangiu nchja xi mare tsaꞌexako uva, ꞌba kui xin kiji.
2 ꞌBa kionga echu chanre tu, kui kitsikasen jngu chuꞌndare tuxi kuekiꞌanire nchjabiu chan xi ꞌbakore.
3 Tunga nchjabiu kitsuba chuꞌndabiu ꞌba yeꞌere, ꞌba tu tjejen ntsja nga kitsikasen.
4 ꞌBa kio xi naire nangiu kitsikasen ngani ngijngu chuꞌndare; tunga nchjabiu kitsiꞌonre nindaku chuꞌndabiu, ꞌba chꞌo kitsure.
5 ꞌBa kjaꞌe kitsikasen ngani, ꞌba kibi kjinikꞌen. ꞌBa jaskan nkjin chuꞌndare kitsikasen; tjin xi kisatere ꞌba yakꞌa xi kjinikjesun.
6 ’ꞌBa tu ngijngu xuta tijña ngisare, kui xi kiꞌndire fa, xi ꞌñu mejénre. ꞌBa xi fetꞌani kui kitsikasen, nga kitsikjaꞌetsjen: “Nchjabiu skuekun= kiꞌndina̱.”
7 Tunga nchja xi tsaꞌexako uva kitsure xinkjin: “Kibi= xi sa̱ku yejere tsajmi xi tjinre naꞌenre; tusa sikꞌian, tuxi tsajan ku̱anni mé= xi sakure.”
8 ꞌBa ꞌbatsaꞌen kitsuba, ꞌba kitsikꞌen ꞌba kiskanikjaꞌa tꞌaxin yojore ña tjintje tsujmi ntje uvabiu.
9 ’ꞌBa, ¿jó mixun jun? ¿Mé= xi saꞌen xi naire nangiu? Ngu kjuaꞌetsikjesun nchjabiu, ꞌba kjaꞌe xuta sikeyare nangiu.
10 ’¿A kje ꞌbexkiyajíun enre Naꞌenchana? Nga tsu:
Ndiojo xi chjine xjo tsꞌaxjengi,
kui= xi je kuánni ndiojo titjun.
11 Naꞌenchana xi ꞌbi kitsaꞌen, ꞌba tu makun=na ña nga ꞌya.
12 ꞌBa kio xuta titjun kuamejénre kitsuba Jesús, ngatꞌa be= nga Jesús ꞌejña kjuakusunbi ngatꞌa tseꞌe kui. Tunga tsakjunke xutankjiun, ꞌba kitsikꞌejña tajngu Jesús ꞌba kiji.
Jesús bakuya ngatꞌa tseꞌe kjuaꞌbechjintjai
Mt. 22:15-22; Lc. 20:20-26
13 ꞌBa kjinikasen ña tijña Jesús yakꞌa nchja fariseo ꞌba ko xutare Herodes, tuxi sikinchjani Jesús en xi ku̱an kuangini.
14 ꞌBa kui nchjabiu jaꞌetsure:
—Ji naꞌen, ji̱n ꞌya=ni nga kjuakixi= xi sji nga bi tu enre xuta ꞌmini_ri ꞌba nga bi tu isenre xuta ꞌmini_ri ngayeje, ngatꞌa bakuye nga ko kjuakixi ndiyare Naꞌenchana. ¿A tixaꞌnde asa bi tixaꞌnde nga kꞌuechjintjai_ra ña xuta ngakure Romano? ¿A kꞌuechji=ña, asa bi kꞌuechja?
15 Tunga Jesús be=ni kjuajó nkjainre nchjabiu, ꞌba kitsure:
—¿Ánñu chen teꞌbejñaninuu̱? Jngu ton ndenario ndekonu, tuxi skutsejenni_ra̱.
16 ꞌBa jaꞌechanire jngu ton, ꞌba Jesús kitsure:
—¿ꞌYá= tseꞌe isen xi kjitꞌa ngaꞌe, ꞌba ꞌyá= tseꞌe jaꞌen xi kuaꞌindutꞌa?
ꞌBa nchjabiu kitsingojo:
—Tseꞌe xuta ngaku Romano=.
17 ꞌBa kio Jesús kitsure:
—Ngu taꞌe_ru xuta ngaku Romano xi kui tseꞌe, ꞌba taꞌe_ru Naꞌenchana xi tseꞌe kui.
ꞌBa tu kiskutsejenkun= nchjabiu jotsaꞌen kitsingojo ngani Jesús.
Jesús bakuyare xuta ngatꞌa tseꞌe kjuafaꞌaya
Mt. 22:23-33; Lc. 20:27-40
18 ꞌBa kio yakꞌa nchja saduceo jaꞌekun Jesús. Kui= nchjabiu tsu nga mikꞌen bi nde faꞌayanire; ꞌba tsiningiyare Jesús:
19 —Ji naꞌen, ꞌba tsaꞌen kitsiꞌindu xujunna Moisés: “Tsa jngu xiꞌin xi je tsixanko chjun kueya, ꞌba tsa bi kisꞌekore kiꞌndi, jngu ntsꞌe xuta xi kꞌion kuixanko ngani chjun kꞌanbiu tuxi sjanire kiꞌndi ntsꞌe xi kꞌion.”
20 Ngu jngu ndiya kisꞌe yatu nchja xi ntsꞌe mani. Xi ma titjun tsixan, tunga kꞌen ꞌba bi kisꞌere kiꞌndi.
21 ꞌBa kio xi majóni tsixanko ngani chjunbiu, tunga ꞌba nde kꞌen ngani ngayeje ꞌba bi kisꞌe nganire kiꞌndi; ꞌba nde ꞌba=nde kuán ngani ko xi majánni.
22 ꞌBa nga yatu ꞌba= kuán tsiꞌire, nijnguú kisꞌere kiꞌndi. ꞌBa jaskan ꞌba nde kꞌen chjunbiu ngayeje.
23 Ngu, nixtjin nga kjuaꞌaya nganire xuta, ¿ꞌyá= tseꞌe ku̱an chjunbi ngatꞌa ngayatu tsixanko?
24 ꞌBa Jesús kitsingojore:
—Jun tjijñunu, ngatꞌa bi ꞌyo mé= xi kuaꞌindutꞌa enre Naꞌenchana ninga kjuaꞌñure Naꞌenchana.
25 Kionga mikꞌion kjuaꞌayare, bi nde kuixanni ninga bi nde sikixanni kiꞌndi nistire, ngu joni ankjele xi tjindu ngankꞌaa ku̱an.
26 Tunga ngatꞌare nga kjuaꞌaya nganire xuta, ¿a kje ꞌbexkiyajíun xujun xi kitsiꞌindu Moisés ngatꞌa tseꞌe ya naꞌya xi tjitijin ndiꞌi? Kionga Naꞌenchana kitsure Moisés: “An= ña̱ naꞌenre Abraham, naꞌenre Isaac ꞌba ko tseꞌe Jacob.”
27 ꞌBa Naꞌenchana bi naꞌenre mikꞌen kuán, tu tseꞌe sani xi tjindukun; ꞌba kui= kjuañu ne ꞌñu titsujñuninu —kitsu Jesús.
Jesús bakuya ñáre kjuatexuma xi ngisa tjun tijña
Mt. 22:34-40
28 ꞌBa jaꞌe jngu chjine kjuatexuma, ꞌba kjintꞌe nga nchjabiu inyafoyanire xinkjin, ꞌba kionga je tsabe nga Jesús nda kitsingojore, kitsitiñatꞌare Jesús ꞌba tsiningiyare:
—Ngajinre ngayéje kjuatexuma, ¿ñáre̱ kjuatexuma xi ngisa tjun tijña?
29 ꞌBa Jesús kitsingojore:
—Kjuatexuma xi tijña titjun yejere ngayéje, kui xi tsu: “Tasen ñojon, xuta naxinanda Israel, xi Naina kui xi Naꞌenchana mani xi tu jngututu ma sani.
30 Timején Naꞌenchana xi Naꞌenri ko ngayéje inimari, ko ngayéje yojori, ko ngayéje kjuafaꞌetsjenri ꞌba ko ngayéje ngaꞌñuri.”
31 ꞌBa kjuatexumabi kui= xi majóni: “Timején xingi jotsaꞌen nimején yojori.” Tsajain kjaꞌe kjuatexuma xi ngisa tjun tijña tuꞌbani nga ko kibi.
32 ꞌBa chjine kjuatexuma kitsure:
—Jun nde, naꞌen, ꞌba= tjin. Kjuakixi= xi sji, nga tu jngututu mani Naꞌenchana, ꞌba nga nde tsajainni xi kjaꞌere.
33 ꞌBa nga ña simijían Naꞌenchana ko ngayéje inimana, ko ngayéje kjuafaꞌetsjenna, ꞌba ko ngayéje ngaꞌñuna, ꞌba nga simijían xingia jotsaꞌen nimijáan yojona, kui= xi ngisa chjire tuꞌbani ko ngayéje kjuatjo xi ngasun altar ti.
34 ꞌBa kionga Jesús tsabe nga chingabiu nda kitsingojo, kitsure:
—Bi kjin teni_ri ña batexuma Naꞌenchana.
ꞌBa niꞌyá nde manikakun nga miningiya ngisare.
Jesús miningiya ꞌyá ntje ndibanire Cristo
Mt. 22:41-46; Lc. 20:41-44
35 ꞌBa kionga tibakuya Jesús ngajin ndetsinre ningu, tsiningiya:
—¿Ánñu chjine kjuatexuma tsuni nga ntjere David ndibani Cristo?
36 Ngu ndekuini David kitsu, kionga Isennixtjintsjere Naꞌenchana kitsikinchja:
Naꞌenchana kitsure Naꞌenna̱ an:
“Teni ngate kixina̱,
kaꞌnda nga̱ xi bi nda yaꞌari ngi ndsakui sikꞌendaa̱.”
37 ꞌBa ¿jótsaꞌen Cristo ntjere David kjuendibani, nga ndekuini David naꞌenna̱ tsure?
ꞌBa xutankjiun tsja tjinre nga inyabasen ñojonre Jesús.
Jesús baneje chjine kjuatexuma
Mt. 23:1-36; Lc. 11:37-54; 20:45-47
38 ꞌBa Jesús kitsu ngisa nga yakuya:
—Chutsejen_ru yojonu ngatꞌa tseꞌe chjine kjuatexuma, ngu matsjare ꞌbetsuma ko najñu nduju ꞌba matsjare nga ko kjuaxuta nikjaꞌayare ngajin ndetsin.
39 ꞌBa matsjare nga ꞌbendusun yaxile xi tjun inya niꞌya sinagoga ꞌba ngaꞌnde xi ngisa nda chun kjaꞌajin nga jngu sꞌi,
40 ꞌba kui xi kjaꞌare niꞌyare yanchjin kꞌan ꞌba, tuxi kꞌueꞌmotaꞌen yojore, ꞌñu tsé fako Naꞌenchana. Kui kjua ne tsé kjuanima kjuaꞌaxtiuni.
Jesús bakuya ngatꞌa tseꞌe ton chje
Lc. 21:1-4
41 Jngu ndiya Jesús tsekꞌejña ngankjain nkjin kaxa ña xinya ton chje nga tikutsejen jótsaꞌen inyaminya tonre xuta kio. ꞌBa ꞌñu tsé ton inyaminya nkjin xuta nyina.
42 ꞌBa kio jaꞌe jngu chjun kꞌan xi ni̱ma̱ ꞌba ꞌeya ngaya jngu kaxabiu jó ton xkua xi chuba kjiya.
43 ꞌBa kio Jesús kinchjare xutare ꞌba kitsure:
—ꞌBa xinkixi_nuu̱ nga kui chjun kꞌan nimabi ngisa= tsé kitsja tuꞌbani ko ngatsiꞌi xi ꞌeya ton kaxa ton chjebi.
44 Ngu ngatsiꞌi tu kui xi ꞌbangire tsja, tunga chjunbi, ngajin kjuanimare, je kitsja yeje xi machjenre nga kꞌuejñakun.