YUDA yana leta
Hida leta Yuda Yemesa taina giꞋetoladina, bana Yemesa tovetumagana adi yoꞋo Yelusalema againe himiyami-ma adi tonagona kikaiwabuna. Bana Yudai-nadi Yesu Taina. (Maki 6:3)
Tovetumagana gaveyao agaidiya giꞋetoladi ma keke gidayakahidi. Nuwanuwana Yesu yana kibababala faꞋina ginaꞋetoladi tu tovehawala veꞋalololodiyao yadi kivekoyo valeyana ginogalina faꞋina hida leta againe tovetumagana giꞋagoꞋabiyedi. Kadu gigahevagadonedi be higa Yesu ana vetumagana velemoꞋena hinalugolegolena. Leta dobona hidede amine.
Lusiule. 1:1-2
Tovehawala veꞋalololodiyao yadi dewa yadi vehawala adi agolaufofola faꞋina. 1:3-16
Yadi vetumagana againe hinaꞋatuvefaꞋila. 1:17-23
Yaubada be Yesu Keliso adi davadava. 1:24-25
1
1 Yo siule omi Yaubada giluwafami-ma kalivai-mina. Iya Yuda Yesu Keliso ana agetoga kadu bana Yemesa taina yami leta gaꞋetoladina be wanaꞋitana. Omi higa Yaubada Tamada agaimiya ginuwanuwa kadu Yesu Keliso giyavayavami.
2 Yaubada yana hinekalikali yana aseniwalova yana nuwakabubu ana ayauna againe wanatutuveguvegulami.
Yuda tovehawala fwayafwayadiyao faꞋidiya givenuwaꞋatada.
3 TobohiyaꞋaseꞋasekweyao, keke gavana faꞋina tu nagona ganuwanuwa vaita ada kibababala Yaubada againe omi kadu ime buye kanuhagana-ma faꞋina agaimiya gadaꞋetoladini, tu adamoya nuwanuwa saꞋeyana magigiku gimadubodana. FaꞋina nuwanuwaku ganagahevagadonemi be tovehawala fwayafwayadiyao agaidiya Keliso ana vetumagana velemoꞋena wanalugolegolena, vetumaganai-nadi boi tuwaina tova saꞋeyanaga Yaubada ime afositolo awameya ide yana yoꞋogaga gihawaveleveleda.
4 WaꞋita, kaliva tufoidi Yaubada hivenikohiyena-ma yami yoꞋo agaimiya hilukukau be hilolomi. Yaubada yana gahe hikivilavilana higahe higayo, “Dewa udoꞋudona au adafaiweya faꞋina Yaubada ginanuwadogeda be yada koyona keke ginalaufata.” Au hidedemi hivehawala be Yesu Keliso hivekekeyena, Bana anakaibe yada Tovehimeya kadu yada Kaiwabu. Tuwai-moꞋena tovehawalai-dina fwayafwayadiyao adi matahiwadi faꞋina Veyao Tuwaina ana buki gigaheye-vagahina.
5 Wona velemona badi Yaubada hivenikohiyena-ma adi matahiwadi hinanuhagana. Au hidedemi ahe wahalamanena. Halamanimiyao nonogana nuwanuwaku nuwami ganatalafolena higa Kaiwabu yana yoꞋo Idifita againe gilugolegoledi, tu muliya tufoidi keke hidavetumaganeni faꞋina giluyaweyawelidi.
6 Kadu badi lobama ana tovenuwaꞋata dibudibutoyogidiyao wananuwenuwedi. Yaubada abavehimeya giveledi tu adi vehimeya keke hidaꞋitaveꞋavini. Keke nuwanuwadi Bana hinaꞋidibumuhigeni faꞋina, yadi abamiya hihegena ada Yaubada umalovaneya gikiveꞋavidi-yo bulava miyamiya-vagahina againe giyogodi be hinamiyami tu vedewayauga ana toveya.
7 Meda anafaiweya Sodoma be Gomola kadu adi awaꞋawaneya melala tufoidi wananuwenuwedi. Badi kalivai-dina dewa udoꞋudona againe hihawahegedi lobama ana tovenuwaꞋata koyodiyao amine. Yaubada adi ayauna giveledi amine keke hidahuluva, au mali kaliva agaidiya matadi giludigadigaga-moꞋa. Mena melalai-dina abaꞋita higa kaliva gaveyao dewa udoꞋudona tulina tulina agaidiya hinahawahegedi digo, ai giꞋalata-vagata ma againe adi matahiwadi hinanuhagana.
Yadi gahe ma ihawadanana moyaꞋaina.
8 Kadu meda anafaiweya badi tovehawala fwayafwayadiyao hihuluhuluva. Yadi avayauna hiyauyauna vaita Yaubada gidahawahegedi be dewa udoꞋudona againe taudiyao wowodi hikikivekoyona, abavehimeya hihawaveꞋiyohoyohoyena, lobama ana kaliva kikaiwabudiyao hiꞋihawadamanedi.
9 Gilubodadi be keke hinaꞋihawadamanedi. Boi tuwai-moꞋena Mosese giꞋalika againe Yaubada yana tovenuwaꞋata adi tonagona ana egana Maikeli Mosese ana aitauna faꞋina giꞋiveninisena, ada wowona faꞋina Setani buye hivekwageya. Tu bana Maikeli kaliva kikaiwabu-moꞋena nonogana keke-moꞋa yana waꞋihawadamana Yaubada matane Setani gidahawavekoyoyeni. Au gigaheꞋabobowena gigayo, “Kaiwabu ginadakeye.”
10 Maikeli kaliva kikaiwabuna nonogana yana wawowomumu Setani gigahena. Badi tovehawalai-dina kaliva-kawowodiyao faꞋina gilubodadi be lobama ana kaliva kikaiwabudiyao hidawowomumuyedi. Tu badi kwavakwavadiyao gaitoma tulina tulina keke hidahalamanedi-ma hihawavelaigedi. Ada gaitoma higa-kawokawowoyedi vaita kevakeva walawalaꞋa keke wanuwadiyao amine, medema gaitomai-dina agaidiya adi agolaufofola hinuhagana.
Yadi dewa ma abaluvefota tulina tulina giyakahidi.
11 Hoiyoi tovehawala fwayafwayadiyao! Keni yana dewa hiꞋitavaina, bana Yaubada keke gidawowomumuyeni tu taina giluveꞋalikana. Kadu Belami mani giꞋitaluvadigena faꞋina gikoyo amine, meda badi yadi italauvadiga faꞋina koyona againe hihawahegedi. Kadu badi Kola ahenao tuwaina Mosese be Eloni yadi abavehimeya Yaubada giveledi-ma hidalemadi faꞋina adi agolaufofola hinuhagana amine, meda badi tovehawalai-dina adi agolaufofola hinanuhagana.
12 Hida hima kalivai-dina vaita lai gava sevasevauyana tu waka givetulana amine, yami anuwaꞋuduꞋudu Yesu faꞋine againe hiꞋela be yadi nuwanuwa ayaꞋayafanina hiseusena faꞋina yamiꞋa hikivekoyokauyena. Vaita Yaubada yana sifi hidaꞋitaveꞋavidi tu taudiyaogaga hiveꞋadi. Kakaha ana tova buhibuhi giyoꞋo vaita wehi gidalugaga tu bolimana giꞋalugena amine, badi tovehawalai-dina yadi vehawala againe keke tamo ami veluga wadavaini. Kadu badi vaita aiyoyo ana toveya keke tamo guwadi hidaseni higa vaita boudiyao, ada kaliva hihabudi be hibou, yadi bou luhei. Meda tovehawalai-dina guwadi keke.
13 Lefo dokidoki wabugobugona taliyeya gilulakahina amine, badi yadi dewa wowowomumuna hiseseyemaunena. Kadu badi vaita ibadibadi akolukoludiyao amine. Nagona kaꞋitadi vaita mahamahalidiyao tu muliya gimaduhavaidi. Yadi abaga umalovana-kahukahu againe Yaubada ahe gikidewedewena ada medema againe hinamiyamiya-vagata.
14-15 Tu boi tuwai-moꞋena bana Inoki badi tovehawala fwayafwayadiyao faꞋidiya gigaheye-vagahina. Bana hima Inoki Adama yana yoꞋo anaveseveni ada gigaheye-vagahina gigayo, “WaꞋita, Kaiwabu ginahobuꞋela kadu yana tovenuwaꞋata mahamahalidiyao tausani tausani a gavaiyehi buye hinahobuꞋela be kaliva moyaꞋaida ginavedewayaugida. Ginavehimeya be kaliva gaveyao moyaꞋaidi Yaubada hivenikohiyena, medema adi matahiwadi hinanuhagana. Yadi dewa koyona moyaꞋaina hififaisewadi kadu yadi wonakoyokoyo Yaubada againe hiyakayakahina-ma vaita Yaubada hidavenikohiyeni. Yadi venikohihegahega faꞋina Yaubada ginavematahiwadiyedi.” Au hidedemi Inoki gigahe.
16 Tova moyaꞋaina hida hima tovehawalai-dina hiꞋalaꞋalawoluwolu kadu vita taudiyao hinuhagana-ma faꞋina mali kaliva hikiholiholina. Taudiyao yadi nuwanuwa itaꞋitaluvadigana hihuluvina. Taudiyao adi egana hikilakahina kadu mali kaliva hiveꞋamohinesebesebedi.
Yuda gigahevagadonedi be hinaꞋatuvefaꞋila.
17-18 Tu tobohiyaꞋaseꞋasekweyao, gavadi yada Kaiwabu Yesu Keliso yana afositolo agaimiya higaheye-vagahina, medema againe nuwami gidanauna. Higahemi higayo, “Tova ana abalauyabu againe tohawavelaiga hinalakayemu. Taudiyao yadi nuwanuwa itaꞋitaluvadigana vaita Yaubada ana venikohi amine ma hinahuluvina.”
19 Hida hima kalivai-dina omi tovetumagana hiludakami, dibudi koyona ana nuwanuwa hihuluvina, badi agaidiya AluꞋaluwa Mahalina keke gidamiyami.
20-21 Tu omi tobohiyaꞋaseꞋasekweyao, Keliso ana vetumagana againe ahe wahawahegemi, vetumaganai-nadi mahamahalinaga. Au yami vetumagana ana nuwanuwa wanaluvefovefofoni-yo wanavewaba, kadu tova moyaꞋaina AluꞋaluwa Mahalina yana faiwala againe wanaveꞋoveꞋoꞋola. Kadu aimo yada Kaiwabu Yesu Keliso walulubodena tu taumiyao wanaꞋitaꞋitaveꞋavimi be higa Yaubada yana nuwanuwa agaimiya wanaꞋayaꞋayaunena. Au hidedemi wananunauwena tu Yesu yana yewaꞋela ana toveya yana wahinekalikali yawai-vagahimi ana abageya ginavegaꞋaulemi.
22-23 Badi hinuwanuwaluga amanadi yami wahinekalikali wanakivetuvetunudi. Kaliva aiꞋalaꞋalata againe gibeꞋu tu walugolegolena be wasilakahina amine, badi dewa koyona againe hibeꞋu-ma wanamadusilakahidi. Kadu badi tova moyaꞋaina koyona hififaisewana-ma wanahinekalikaliyedi be nuwadi Yesu againe wanakiviviyena, tu taumiyao wanaꞋitaveꞋavimi be yadi dewa koyona keke nuwami ginaꞋabini-yo adi bwanene agaimiya ginadamana.
Yaubada be Yesu Keliso adi davadava.
24-25 Tu Yaubada ana egana kanakilakahina. Keke tamo hakwadi velugana Yaubada au Bana anakaibeꞋu-moꞋa. BanaꞋe yada koyona agaidiya yada Kaiwabu Yesu Keliso againe gikibababaleda. Kadu Bana anafaiweya omi ginayavayavami be keke wanabeꞋu, au ginanunauwena tu keke ami wavita tu yami wavemwamwala keke kabiꞋona Tauna matane ginakilakahimi-yo yana kaiwabu wanaꞋitana. E, tova moyaꞋaina BanaꞋe kanadavadavana faꞋina yana mahalina veꞋakinamanamalina be yana kaiwabu be yana faiwala be yana abavehimeya giduva-vagata. Tuwai-lokalokana tova aimo keke gidaveꞋinuba kadu tova adamoya giduva-vagata, meda tova mulina ginaduva-vagata tova inaga inaga keke ana abalauyabu. Ehe hidedemi.
(Iya Yuda bonaku.)