Folo yana leta anavelu KOLINITA tovetumagana agaidiya
Hida Kolinita tovetumagana yadi leta anavelu Folo Masedoniya ana fafaliya gimiyami tu giꞋetoladina. Kolinita melala kikaiwabuna Akaiya ana fafaliya.
Boi nagona Folo yana leta againe miKolinita gidakeyedi tu muliya Taitasi giꞋiveninisena be valeyadi ginaꞋaliyena. Valeyadi ma tufona hagihagina higa Folo yana dakeya hinogalini-yo hinuwavilana. Tu tufoidi yana abavehimeya hidibutoyogena. Hida leta ana inuba ma fowa. SaꞋeyana ma badi hinuwavilana-ma faꞋidiya yana vemwamwala giyakahina, kadu VenuwaꞋata Yamumuna ana nuwanuwa nafona faꞋina nuwadi gitalafolena. Anaveto ma givenuwaꞋatadi be higa yadi velekawowo tovetumagana koyokoyodiyao faꞋidiya hinakidewedewena. Anavefowa ma bana afositolo velemoꞋena ma tauna gibulavaꞋitotogena. Leta dobona hidede amine.
Mikolinita adi lusiule kadu Yaubada ana vesiule. 1:1-11
MiKolinita Folo hikiveꞋaseꞋuꞋaulolona tu nuwanuwana ginaveyaoyedi. 1:12-2:13
Folo ana vehimeya higa Yaubada yana veyao ivaguna ana laumamala ma faisewai-nadi gilukahihiyena. 2:14-6:10
Folo tauna ana ayauna miKolinita faꞋidiya gihawavemogatalena. 6:11-7:16
Velekawowo ana nuwanuwa kadu ana kidewadewa gilukahihiyena. 8:1-9:15
Folo yana veꞋafositolo ana abavehimeya kadu ana iyaꞋiyaya tulina tulina giyakahidi. 10:1-12:21
Folo yana vevai yana lauꞋage yana lukafoi. 16:1-13
1
1 Yo siule tobohiyakweyao moyaꞋaimi Kolinita againe. Iya Folo Yaubada givegideku be Yesu Keliso yana kabu gavaina, higa yana afositolo adi maka giveleku. IyaꞋeku kadu tobohiyada Timoti yama lukafoi agaimiya. Omi Yaubada yana yoꞋogaga Kolinita againe kadu yana kaliva mahamahalimiyao moyaꞋaimi Akaiya ana fafaliya yami leta aꞋetoladina be wanaꞋitana.
2 Yaubada Tamada kadu Kaiwabu Yesu Keliso hinanuwadogemi ada aseꞋasemi hinakiveniwalovina.
Folo Yaubada yana hawavemoluva faꞋina gilukahihi.
3 Keke tamo gavana faꞋina tu BanaꞋe yada Kaiwabu Yesu Keliso yana Yaubada kadu Tamana kanahawadavadavana. FaꞋina hinekalikali inubana Tamada againe ada hawavemoluva tulina tulina inubana kadu Bana againe.
4 Ide ada vita moyaꞋaina agaidiya gihawavemoluvida be higa gaveyao vita tulina tulina hinuhagadi medema ide adafaiweya kanahawavemoluvidi. E, gavaimi ide ada vita agaidiya Yaubada givelugada, medema tobohiyadeyao adi vita ana toveya kanalukahihiyedi be aseꞋasedi kadu kanakivevatuna.
5 WaꞋita, Keliso aulolo tagiya ide faꞋideya giwahina amine, meda ide vita lakahina Bana faꞋine kawahiwahina. Ada ide Keliso againe kamiyaveꞋavina faꞋina, kadu meda yana hawavemoluva lakahina kanunuhagana.
6 VenuwaꞋata Yamumuna ana laumamala faꞋina ime tolaumamala vita awahina. Keke adawahi-kawowoni, au Yaubada yana hawavemoluva kadu yana kibababala omi wananuhagana faꞋina vita awahina. Meda Yaubada yana hawavemoluva ime anuhagana be higa aimo ami vita ana toveya ime wananuwenuwema-yo kadu omi aseꞋasemi ginavatu. Au hidedemi omi vita wananuhagana ime anuhagana amine ma agaidiya yami waꞋasevatu wanaꞋatuvefaꞋila.
7 Ada ime anuwaveꞋavina-moꞋa higa ime vita anuhagana amine kadu omi wanuhagana, meda ime asevatu anuhagana amine kadu omi wananuhagana.
8 Tu tobohiyakweyao nuwanuwaku vita gavatubuga Esiya ana fafaliya ganuhagana-ma wanahalamane-hagihagiyena. Vitai-dina ganuhagadi-ma vaita vainuwana vita-moꞋedi keke akufaiweya ganawahidi, ada au ganuwanuwa vaita ganamaduꞋalika.
9 Taumadi nuwahinagekuya ganuwanuwa vaita kaꞋi ganaꞋalika o kaꞋi ganamiya tu gavaitana hidamiyaluveꞋalikaku. Tu hidedemi gaꞋayaunena be higa keke tauku ganaluveꞋavineku au Yaubada toꞋalika adi sivemidi anafaiweya ma againe ganaluveꞋavina.
10-11 Mena abagilagi koyo-moꞋena againe ahe gikibababaleku kadu tova adamoya ginakibababaleku. Meda ganuwaveꞋavina kaꞋi yami veꞋoꞋola againe wanaveluvelugaku amine, kadu tova moyaꞋaina yana kibababala agaikuya ginanauna. KaꞋi omi kaliva moyaꞋaimi iya faꞋikuya wanaveꞋoveꞋoꞋola, au yami veꞋoꞋola guwana Yaubada aku nuwakabubu againe ginaseyemaunena be wananuhagani-yo moyaꞋaimi wanavesiule-moꞋa.
Folo yanana Kolinita againe ana tova gisenauwena-ma
faꞋina gilukahihiyena.
12 Tu omi miKolinita gaitoma saꞋeyana faꞋina gagakahikahi-ma hidede amine. Yaubada gifaiwalaveleku-yo fafali tulina tulina kalivai-dina matadiya yaku waꞋasehawahega gahuluva yegayegana, tu omi matamiya yaku waꞋasehawahega-moꞋa gahuluva. Keke babi ana nuwahuya amine gadahuluvimi. Au Yaubada yana nuwadoga givehimeyeku-yo agaimiya gahuluva yegayegana, ada yaku dewa au hidedemi velemoꞋena ma togahe nuwafoukuya giꞋalakakila.
13-14 WaꞋita, yaku leta moyaꞋaina agaidiya keke tamo gahe sevasevauyana gadaꞋetoladini, au yaku nuwanuwa gaꞋetoladina-ma amifaiweya wanahawana kadu wanahalamanena. Tova adamoya yami halamana yaku nuwanuwa faꞋina tufona. Nuwanuwaku iya aku halamana agaimiya ginatubutubuga tu yaku nuwanuwa wanahalamane-Ꞌowona be higa Kaiwabu Yesu ginayewaꞋela ana toveya iya omi faꞋimiya ganagakahikahi amine, meda omi iya faꞋikuya amifaiweya wanagakahikahi.
15 Tu ahe ganuwaveꞋavina omi iya wanagakahikahiyeku faꞋina, gavevai higa vaita yaku nuwaliliuga againe omi miKolinita agaimiya gadavebutu kadu agaimiya gadaꞋela gadalauyabu be abavemwamwala luhei gadavelemi.
16 E, gavevai vaita yakuna Masedoniya ana fafaliya ana toveya agaimiya gadamadugolota, kadu Masedoniya gadahegena againe agaimiya gadayewaku be tamo gavadi aku veluga buye wadaꞋatuhegeku-yo gadana Yudiya ana fafaliya.
17 Mene gavaimi wanuwanuwa? Iya gagahe vaita gadaꞋela tu keke faꞋina kaꞋi wavaitana iya toveꞋalololo? Badi kaliva-kawowo hinagahe vaita hinaꞋela tu nuwadiya ela faꞋina keke velemona hidanuwanuwa. Tu iya keke medemi gadahuluva. KaꞋi veꞋehe ganayakahina digo, veꞋehe amine ganahuluva. KaꞋi vekeke digo, kadu vekeke.
18 Yaubada keke gidanuwaluga. Gavaimi ginagahe medemi makewaꞋe ginagugai. Meda anafaiweya ime Yaubada yana tofaisewa yama venuwaꞋata agaimiya keke nuwaluga amine vaita nagona adaveꞋehe tu muliya adavekeke.
19 FaꞋina iyaꞋeku kadu Sailosi Timoti buye Yaubada Natuna Yesu Keliso faꞋine omi hinafamiya alumamala. Bana Keliso keke tonuwaluga. Keke vaita gidaveꞋehe tu nuwahinagene vekeke amine gidanuwanuwa. Au gavaimi agaideya giwonadabadaba, medemi ginagugai.
20 Yaubada gavaimi giwonadabadaba, mena wonadabadabai-dina guwana Yesu Tauna giseyemaunena. Ada Yesu giseseyemaunena faꞋina, ide yada “Ehe hidedemi” kayakayakahina be Yaubada ana egana kakikilakahina.
21-22 KaduꞋe Bana Yaubada Tauna imeꞋeyao kadu omiꞋiyao Keliso buye giveꞋatutamoꞋaida-yo Bana nuwahinagene kamiyamiyadona. Bana Yaubada Tauna givegideda yana kibwa ide agaideya gisena ada kaliva kwamayoku gisetagona amine, meda Yaubada AluꞋaluwana nuwahinagedeya gisena be gisetagoda, higa gava nuwakabubu moyaꞋaina gigaheyena-ma aimo kananuhagana.
23 Tu wanogali! Yaubada gihalamaneku tu gagahegahe. Yami dewa ganuwenuwena faꞋina keke Kolinita againe gadamaduꞋela-yo gadaꞋitami. Keke nuwanuwaku kanaveꞋaꞋitaꞋita tu iya ganagolahegehegemi medema faꞋina keke gadamaduꞋela.
24 Keke vaita gavaimi gavaimi wanavetumaganena-ma iya ganavehimeyeni, keke. Iya gahalamanena yami vetumagana wakidonena. Tu iya gaveluvelugami be higa yami vemwamwala faꞋina.