9
Utaguso kwa wang'honyo wa Isilaeli
1 Ulonzi wa Mkulu Nguluwi,
Mkulu Nguluwi kangulonga kuwala wanhu wa Hadalaki na wa Damasiko,
“Meho ga wanhu na ga nhanzi zeng'ha za Isilaeli, gomgalamchila Mkulu Nguluwi,
2 kahi muji wa Hamati ulingubakana na muji wa Hadalaki
mbaka miji ja Tilo na Sidoni,
hanga jangoneka jina luhala ng'hatu.
3 Muji wa Tilo nawizenjela ngome iwele nzinzili,
nauwika sendi kota nhimbwisi,
na zahabu kota wavu mnzila.
4 Ila Mkulu kohola lufufu lwa heye lweng'ha,
lufufu lwa heye kolwinjiza mbahali,
na kuulakaza muji awo kwa chiluli.
5 Muji wa Ashikeloni wogona ago na kudumba,
nawo muji wa Gasa wogalawata kwa usungu,
mbaka Ekiloni kahi wowa hihyo, kwa vila kitumbila kwake kokuka.
Muji wa Gasa wokwajiliza mndewa,
nawo Ashikeloni wowa ulihela wanhu.
6 Wajenzi wochikala kuli muji wa Ashidodi,
nani ndokudumya kidaya kwa Wafilisti.
7 Ndolemeza kulya miwunde jiwele na danda
na chilyo choneche chiwele ndo izudizo.
Wala wosigala wowa lufufu lwa heni,
kota lukolo lumwe kuli Yuda.
Wanhu wa Ekiloni wowa wa heni kota vyowawele Wayebusi.
8 Ndoyamila isi ya heni,
ndowalemeza wamizi waleche kukola amo.
Haduhu munhu yowabunza kahi wanhu wa heni,
kwa vila kwa meho ga heni,
nandiwona vyowagaziche.”
Mndewa wa kikala goya
9 Mtowe luchenze hemwe wanhu wa Siyoni!
Mlandule lizi, hemwe wanhu wa Yelusalemu!
Ulole, mndewa wa hemwe kanguya kwa hemwe,
kanguya kwa hachi ya kulongoza na kusumya!
Ndo yaliholile, nakakwina idogowi,
lyana lya idogowi.
10 Kojidumya mituka ja ngondo kuli isi ya Isilaeli
na falasi wa ngondo kulawa kuli muji wa Yelusalemu,
nawo upinde wa ngondo wobenigwa.
Kowikula kikala goya kwa wanhu wa isi,
ulongozi wa heye wokwenela kulawa bahali mbaka bahali,
kulawa lwanda lwa Eyufulate mbaka kuli kuduma kwa isi.
Wanhu wa Nguluwi wanguhiluswa
11 Mkulu Nguluwi kangulonga hino,
“Kwa chiwalo cha ilagano lya heni na hemwe,
ilagano liwele nalitawizwa kwa danda,
ndowagombola wanweng'hwa wa hemwe,
wawele nawawohigwa kuli ikulubila lilihela mazi.
12 Hemwe wanweng'hwa muwele na kitumbila,
mhiluche kuli ngome ya hemwe.
Lelo ndanguwawikulila kota
ndowahilulila ganojile mala keli.
13 Yuda ndomdita yawe upinde wa heni,
Isilaeli nandimdita msale wa heni.
Gwa Siyoni! Wanhu wa hegwe ndowadita wawe kota ipanga,
kuwatowa wanhu wa Ugilichi,
wowa kota ipanga lya yazidahe.”
14 Mkulu Nguluwi kolawila kwa wanhu wa heye,
kotoza misale jake kota lumwemwesa.
Mkulu Nguluwi Yawele na Ludali kopemba mhalamhanda,
kofika hamwe na chivuluvumbi cha kusini.
15 Mkulu Nguluwi Yawele na Mong'ho kowamila wanhu wa heye,
nawo wowadumya wang'honyo wa hewo.
Wotowa iyowe kuli ngondo kota wagalile,
woibohola danda ya wang'honyo wa hewo.
Yochililika kota danda ya nhambiko,
ibakalizwe kuli mbalati za hali honhu ha kulavila nhambiko kulawa mchisaye.
16 Mhela awo, Mkulu Nguluwi, Nguluwi wa hewo, kowalohola,
kwa vila hewo ndo chilundo cha heye,
nawo wopulika kuli isi ya heye,
kota maganga ga sendi nyinji gawele kuli itaji.
17 Ndaze kunoga na kinoliga kwa hewo vyokuwele!
Wasongolo na wahinza wodedemka,
kwa winji wa nyhule na divai inyale.