3
Nakwali na ngondo ya mhela winji hali wamizi wawele hamwe na ivyazi lya Sauli na wala wamizi wawele hamwe na Daudi. Ubanzi wa Daudi naulutilila kuwa na mong'ho ila ubanzi wa Sauli naulutilila kuwa ng'hochele.
Wana walume wa Daudi
Wana walume wa Daudi wapondigwe na wache wa Daudi ako Hebuloni nawali wano. Wa mwaluko nayali Amunoni, mayake nayali Ahinoamu kulawa Yesileeli na wa keli nayali Kileabu, mayake nayali Abigaili yafililwe na mlume wa heye Nabali kulawa Kalimeli na wa kadatu nayali Abusalomu, mayake nayali Maaka mhinza wa Talimayi, mndewa wa Geshuli na wa kane nayali Adoniya, mayake nayali Hagiti na wa kahano nayali Shefatiya, mayake nayali Abitali na wa sita nayali Itileamu, mayake nayali Egila, mche yunji wa Daudi. Wana weng'ha wano nawapondigwa mhela lowawele ako Hebuloni.
Abuneli kanguluta kwa Daudi
Ngondo vyoiwele ilutilila hali wanhu wa Daudi na wanhu wa Sauli, Abuneli nayali chilongozi yawele yolutilila kuwa na mong'ho na ludali hali wanhu wa Sauli. Sauli loyawele yang'hali mkomu, nayali na mhawake yumwe itagwa lyake nayali Lisipa, mhinza wa Aya. Lelo zuwa limwe Ishi-bosheti nakamuuza Abuneli, “Lekachoni nakuwasa na mha wa mhaza wa heni?”
Abuneli nakazudila lukami kwa chiwalo cha ulonzi wa Ishi-bosheti, nakamuuza, “Ndaze, kwangijesa heni ndomhinduka Sauli? Ndaze, kwangijesa heni ndanguwakolela mijito wanhu wa isi ya Yuda? Ulole, heni ndanguwaditila igano lya kwimilila wanhu wa mhaza wa hegwe Sauli na wang'holoze, siwawichile mmoko mwa Daudi kulawa mhela wula. Lelo lehano kwangumbona ndina nongwa kwa chiwalo cha mdala. Nguluwi yangaze na mzidi, wone ndoleka kumditila Daudi kota vila Mkulu Nguluwi vyoyamlahile. 10 Mkulu Nguluwi nakamlonjela Daudi kota kowusa undewa kulawa kwa wanhu wa Sauli na kumha heye. Heye kolongoza isi ya Isilaeli na Yuda kulawa Dani mbaka Beeli-sheba.” 11 Ishi-bosheti halonjile chinhu kwa Abuneli, kwa vila nakamdumba.
12 Lelo Abuneli nakalajiza wasenga kwa Daudi na kumlonjela, “Ndaze, isi yino ndo ya whaani? Udite ilagano na heni, ndokutanza kuidita Isilaeli yeng'ha iwe isi ya hegwe.” 13 Daudi nakedichila, “Goya, ndodita ilagano na hegwe. Ila ndangukugana udite mbuli imwe uwele ung'hali kumbona, kwanguganigwa ungalile Mikali mhinza wa Sauli. Aho kombona.” 14 Daudi kahi nakalajiza wasenga kwa Ishi-bosheti mwana wa Sauli, nakalonga, “Nyhilulile mchewangu Mikali ndimhesile kwa kulavya migovi miya imwe ja Wafilisti.” 15 Ishi-bosheti nakalajiza wanhu kumhola Mikali kulawa kwa mlume wa heye Palitieli, mwana wa Laishi. 16 Ila Palitieli nakaluta hamwe na mchewake yolila nzila yeng'ha mbaka kuko Bahulimu. Abuneli nakamlonjela Palitieli, “Uhiluche kaye.” Ahyo nakahiluka.
17 Abuneli nakalonga ulonzi unojile na wasekulu wa Isilaeli, nakawalonjela, “Kwa mhela winji namumgana Daudi yawe mndewa wa hemwe. 18 Lelo mumdite yawe mndewa, kwa vila Mkulu Nguluwi nakamlonjela Daudi yolonga, ‘Kwa moko wa hegwe Daudi, chitumagwa wa heni, ndowalohola wanhu wa heni wa Isilaeli kulawa kwa Wafilisti na kulawa kwa wang'honyo wa hewo weng'ha.’ ” 19 Abuneli kahi nakalonga na Wabenjamini, hamba nakaluta mbaka Hebuloni kumlonjela Daudi chila chinhu kuwala wanhu weng'ha wa Isilaeli mbaka nhanzi yeng'ha ya Benjamini chowaganile kudita.
20 Abuneli loyawele kwa Daudi ako Hebuloni, nayali na wanhu makumi meli, Daudi nakawaditila mnvina. 21 Abuneli nakamlonjela Daudi, “Lelo heni ndoluta kukugalila wanhu weng'ha wa Isilaeli, hegwe mndewa wa heni. Wokuya kudita ilagano na hegwe, leka uwe mndewa wa hewo, nagwe kuwalongoza weng'ha vyougana.” Daudi nakalagana na Abuneli nakaluta, naye nakaluta kwa kikala goya.
Abuneli kangukopoligwa
22 Hamba Yoabu na wanhu wanji wa Daudi nawahiluka kulawa kitowa, nawahola vinhu vinji kulawa kuli ngondo. Ila Abuneli hawele hamwe na Daudi ako Hebuloni kwa vila Daudi nayali yamkundize yalute, ahyo Abuneli nakaluta kwa kikala goya. 23 Yoabu loyagomole na ikugusi lya wamizi wa heye loyawele nalyo, nakapegwa mbuli ya kota Abuneli mwana wa Neli, nakoya kumona mndewa Daudi, nakalanda yalute, nakoka kwa kikala goya. 24 Yoabu nakaluta kwa mndewa na kumlonjela, “Lelo nakudita ndaze? Lole, Abuneli nakoya kwa hegwe, lekachoni nakumleka yalute? Lelo nakaluta! 25 Ndaze, nakuvizela kota Abuneli mwana wa Neli, nakoya kudeta kwa hegwe? Nakoya kuvizela mbuli za hegwe na choni choulingudita.”
26 Yoabu loyalawile kulonga na Daudi, nakalajiza wasenga wamigale Abuneli, nawo nawamfika kuli ideho lya Sila na kumhilula, ila Daudi nayali hambe yaizele mbuli ayo. 27 Abuneli loyahiluche Hebuloni, Yoabu nakamhola Abuneli hafungo ha lwizi lwa lukanzi lwa muji kota kangugana kulongasa na heye kwa uviso. Yoabu nakamhoma Abuneli mmunda mwa heye kwa vila Abuneli nayali yamkopole Asaheli, mdodowe Yoabu, Abuneli nakabagama. 28 Hamba Daudi loyahuliche mbuli ayo nakalonga, “Heni na undewa wa heni twahela nongwa mazuwa gose hali Mkulu Nguluwi kwa chiwalo cha danda ya Abuneli, mwana wa Neli. 29 Nongwa ya chiwalo cha kukopola ako iwe kwa Yoabu na wang'holoze mhaza wa heye. Yumwe wa wang'holoze Yoabu mazuwa geng'ha yawe na utamwa wa kutunda ufila ama utamwa wa ngozi ama yawe yalingujenda kwa ng'hweku ama kubagama kwa ipanga ama yawe yalihela chilyo.” 30 Yoabu na mng'holoze Abishayi nawamkopola Abuneli kwa vila nakamkopola mng'holozawo Asaheli mhela wa ngondo ako Gibeoni.
31 Hamba nakamlonjela Yoabu na wala weng'ha wawele hamwe na heye kota wadadule mivalo ja hewo na wavale mivalo ja igunila na kuchilongola chinhanda chiwele na mtufi wa Abuneli na kulombocheza. Mhela wa kutila ako, mndewa Daudi nakajenda kumbele kwa chinhanda acho cha kuwichila mtufi. 32 Nakatiligwa ako Hebuloni na mndewa nakalombocheza kwa lizi loyawele hafungo ha chilaga, wanhu wanji weng'ha nawadita hihila kahi. 33 Mndewa nakamlombochezela Abuneli, nakemba,
“Ndaze, lekachoni Abuneli nakabagama kota munhu yaditile nongwa?
34 Moko ga heye hagawopigwe
na magulu ga heye hagawichigwe pingu kota mwihe.
Nakabagama kota munhu yakopoligwe na wehile!”
Wanhu weng'ha nawalila kahi kwa chiwalo cha heye. 35 Hamba wanhu weng'ha nawaluta kumlonjela Daudi yalye ibumunda lokuwele kung'hali nemisi. Ila Daudi nakelaha yowalonjela, “Nguluwi yang'hopole wone ndojeza ibumunda ama chinhu choneche mbaka isanya holizibila.” 36 Wanhu weng'ha nawona mbuli azo, nawanojezwa kota vila vyowanojezwe na chila chinhu choyaditile mndewa.
37 Lelo zuwa lila Waisilaeli weng'ha nawavizela kota mndewa Daudi hehanzile kuli kumkopola Abuneli, mwana wa Neli. 38 Mndewa Daudi nakawalonjela vitumagwa wa heye, “Ndaze, hamvizelele kota lehano munhu yawele chilongozi na yanojile nakabagama Isilaeli? 39 Hanga nambakalizwa mafuta ndiwe mndewa, ila heni lehano nda ng'hochele. Wano wana wa Seluiya ndo wang'ang'ale lukami kusinda heni. Mkulu Nguluwi yawagaze wano kwa kiwhana na wihe wa hewo!”