19
1 Munhu yumwe nakamlonjela Yoabu, “Mndewa kangulila kwa vila Abusalomu nakabagama.”
2 Wamizi nawavizela kota mndewa Daudi kangulila kwa vila mwanage nakabagama, ahyo zuwa lya kusumya ngondo naligaluka liwa zuwa lya masinzo.
3 Wamizi nawali wokwinjila kuli muji wa Mahanaimu kuno wenyamalile, kota nawabilima kuli ngondo na kubasigwa soni.
4 Daudi nakagubika kumeho kwa moko ga heye na kulutilila kulila kwa lizi likulu yolonga, “Mwanangu Abusalomu! Abusalomu mwanangu! Mwanangu!”
5 Yoabu nakaluta kuli ng'handa yalingikala Daudi na kumlonjela, “Nakuwadita wamizi wa hegwe wabasigwe soni, wawele hawalohole ukomu wa hegwe yeka ila nawawalohola wana walume wa hegwe na wahinza wa hegwe na wache wa hegwe na waha wa hegwe kahi.
6 Kwanguwagana lukami wang'honyo kusinda walingukugana hegwe. Nakutulajila hazelu kota vilongozi wa hegwe na wanhu wa hewo wahela utanzi kwa hegwe. Ndangona kota wahasangalale wone Abusalomu yahawele mkomu lehano natwe tweng'ha twahawele tubagame.
7 Lelo winuche ulute kula kunze na uwakangaze wanhu wa hegwe. Ndangilaha kwa Mkulu Nguluwi kota wone hulawa, kowa haduhu ne munhu yopona hamwe na hegwe hoifika matinazo ya lehano. Chinhu achi chowa chihile ng'hatu kwa hegwe kusinda choneche chikulawile kulawa kuli usongolo wa hegwe mbaka sambi.”
8 Lelo Daudi nakenuka na kuluta kikalisa kuli chigoda cha heye hali lwizi lwa muji. Wanhu lowalonjelwe kota mndewa ka hali lwizi, wanhu weng'ha nawamlutila.
Daudi kangiwika goya kuhiluka Yelusalemu
Waisilaeli weng'ha nawali wabilime chila yumwe haluga hake.
9 Wanhu weng'ha nawali wochitwanza hewo kwa hewo kuli nhanzi zeng'ha za Isilaeli, wolonga, “Mndewa Daudi nakatulohola kulawa mmoko mwa wang'honyo wa hetwe, nakatulohola kahi kulawa mmoko mwa Wafilisti. Ila lelo nakalawa kuli isi, yombilima Abusalomu.
10 Abusalomu yotumbakalize mafuta yawe mndewa wa hetwe, nakabagama kuli ngondo. Lelo, lekachoni hatulingulonga kuwala mbuli ya kumhilusa mndewa Daudi?”
11 Mndewa Daudi nakalajiza usenga kwa watambika, Sadoki na Abiatali, “Muwalonjele wasekulu wa Yuda, ‘Lekachoni hemwe muwe wa kuduma kunyhilula heni mndewa haluga hangu? Usenga wa Waisilaeli weng'ha naufika kwa heni.
12 Hemwe mwa wang'holozangu na ivyazi lya heni, lekachoni muwe wa kuduma kunyhilula heni haluga?’
13 Mumuuze kahi Amasa, ‘Ndaze, hegwe hauwele ivyazi lya heni? Nguluwi yang'hopole wone sikuditile hegwe kuwa chilongozi wa wamizi wa heni kulawa lehano honhu ha Yoabu.’ ”
14 Ahyo Daudi nakawadita wanhu weng'ha wa Yuda wamkunde heye. Lelo nawamigalila usenga ulingulonga, “Uhiluche haluga hegwe na vitumagwa wa hegwe weng'ha.”
15 Aho ndo mndewa Daudi nakahiluka, nakaluta mbaka kuli lwanda lwa Yolodani. Lelo wanhu wa Yuda nawaluta mbaka ako Giligali leka kumbochela mndewa na kumtanza yaloche lwanda lwa Yolodani.
Daudi kangumlechela Shimeyi
16 Shimeyi mwana wa Gela, Mbenjamini, kulawa Bahulimu, nakadita himahima kuluta na wanhu wa Yuda leka kumbochela mndewa Daudi.
17 Shimeyi nakaluta hamwe na Wabenjamini elufu imwe. Siba chitumagwa wa ivyazi lya Sauli hamwe na wana wa heye kumi na tano na vitumagwa makumi meli, nawaluta himahima kuli lwanda lwa Yolodani kumlongola Daudi.
18 Lelo, nawaloka kuli honhu ha kulochela leka kulihilika ivyazi lya mndewa na kumditila geng'ha goyaganile. Shimeyi mwana wa Gela nakoya, naketoza na kufugama hali mndewa, mhela mndewa loyawele habehi kuloka lwanda lwa Yolodani.
19 Shimeyi nakamlonjela mndewa, “Ndangukulanda, mndewa wa heni, uleche kumbona ndina nongwa ne kukumbuchila nongwa yonditile zuwa lila lyouwele ukuka mujini Yelusalemu. Ndangukulanda uleche kugawika mnhumbula mwa hegwe.
20 Mina ndivizela kota heni, chitumagwa wa hegwe nandita gehile. Ndo mina nambuya lehano, ndiwele wa mwaluko kuli nhanzi ya Yusufu, kukubochela hegwe mndewa wa heni.”
21 Abishayi, mwana wa Seluiya, nakalonga, “Ndaze, Shimeyi halinguganigwa kukopoligwa kwa chiwalo cha mbuli ayi? Nakampanjila mbakalizwa mafuta wa Mkulu Nguluwi.”
22 Daudi nakedichila, “Mbuli ayi hailinguwawala hemwe, wana wa Seluiya. Lehano namuwa kota wang'honyo wa heni! Ndaze, hana yoneche yokopoligwa lehano hali Isilaeli? Ndaze, sivizelele kota lehano heni nda mndewa hali Isilaeli yeng'ha?”
23 Hamba, mndewa Daudi nakamlonjela Shimeyi, “Hegwe hukopoligwa.” Mndewa nakalagana na Shimeyi kwa chilaho.
Daudi kangumonela isungu Mefibosheti
24 Mefibosheti mzukulu wa Sauli, nakaluta kahi kumbochela mndewa Daudi. Kulawa zuwa lila mndewa vyoyochile Yelusalemu mbaka loyawele yohiluka kwa kikala goya, Mefibosheti nayali hahovuje magulu ga heye ne kubeya lulevu lwa heye ne kuhovuga nguwo za heye.
25 Lelo, Mefibosheti loyafichile kulawa Yelusalemu kumbochela mndewa, mndewa nakamuuza Mefibosheti, “Lekachoni hulutile hamwe na heni?”
26 Mefibosheti nakedichila, “Mndewa wa heni, kwa vila heni chitumagwa wa hegwe nda chete, nandimlonjela Siba, ‘Umbichile goya idogowi lya heni ndilikwine leka ndute hamwe na mndewa.’ Ila Siba nakandeteleza.
27 Naye nakalonga mbuli zihile kwa hegwe mndewa, kuwala heni. Ila mndewa wa heni ndo kota mhilisi wa Nguluwi, lelo udite choneche chilingukunojeza.
28 Walelwa weng'ha wa mhaza wa heni hambe waganigwe kupegwa chinhu choneche, ila kukopoligwa na mndewa wa heni. Ila nakumha heni, chitumagwa wa hegwe honhu hali wala wadile hali chisaga cha hegwe. Ndaze, ndina hachi yachi ya kumlanda mndewa mzidi wa ago?”
29 Mndewa Daudi nakamlonjela, “Uleche kundonjela mzidi wa mbuli za gwegwe baho. Heni nyamula kota hegwe na Siba mochigawila isi ya Sauli.”
30 Mefibosheti nakamlonjela mndewa, “Mleche Siba yahole isi yeng'ha yaliyeka. Heni sangalala kwa vila hegwe mkulu wa heni kwanguhiluka haluga kwa kikala goya.”
Daudi kangumditila ganojile Balisilayi
31 Balisilayi, Mgileadi, nayali yafichile kulawa Logelimu na kuluta hamwe na mndewa Daudi kuli lwanda lwa Yolodani leka walutase mbaka kumwambu mwa lwanda.
32 Balisilayi nayali sekulu ng'hatu, yawele na miyaka makumi nane. Nayali yomlolela mndewa Daudi loyawele yochikala ako Mahanaimu, kwa vila nayali na lufufu ng'hatu.
33 Lelo mndewa Daudi nakamlonjela Balisilayi, “Tulute hamwe ako Yelusalemu nani ndokulolela.”
34 Ila Balisilayi nakamwidichila mndewa, “Ndaze, ndina miyaka minji ja kulutilila kikala mbaka ndute hamwe na hegwe mndewa ako Yelusalemu?
35 Heni ndina miyaka makumi nane. Ndaze, ndoweza kugazela ganojile ama hebu? Ndaze, heni chitumagwa wa hegwe, ndoweza kuvizela kota chilyo chombelengulya ama kunwa, chinona ama chiha? Ndaze, ndoweza kuvizela kunoga kwa lizi lya walingwimba walume ama wadala? Lekachoni heni, chitumagwa wa hegwe ndiwe itunyo kwa hegwe, mndewa wa heni?
36 Lekachoni mndewa yamhe heni ndolendole ng'hulu ahyo? Heni chitumagwa wa hegwe ndoluta na hegwe kwa majendo mado kumwambu mwa lwanda lwa Yolodani.
37 Ndangukulanda, ung'hundize heni chitumagwa wa hegwe, nyhiluche na mbagame kuli muji wa heni, habehi na chilaga cha mhaza wa heni na maiwangu. Ila ayu chitumagwa wa hegwe Chimuhamu, mkundize yalute hamwe na hegwe, mndewa wa heni na umditile heye lyoneche lyoukona linoga.”
38 Mndewa Daudi nakamlonjela Balisilayi, “Chimuhamu koluta na heni na ndomditila lyoneche liwele linojile kwa hegwe. Lyoneche lyougana ndikuditile, ndokuditila.”
39 Wanhu weng'ha nawaloka lwanda lwa Yolodani na mndewa naye nakaloka. Mndewa nakamnonela na kumtambichiza Balisilayi, naye Balisilayi nakahiluka haluga hake.
40 Mndewa nakalutilila mbaka Giligali, Chimuhamu nayali hamwe na heye. Wanhu weng'ha wa Yuda na nusu ya wanhu wa Isilaeli nawali womhilika mndewa.
41 Hamba, wanhu weng'ha wa Isilaeli nawoya kwa mndewa na kumlonjela, “Lekachoni wang'holozetu wanhu wa Yuda nawahola hachi ya hetwe ya kukubochela, nawakulosa kuli lwanda lwa Yolodani, hegwe na ivyazi lya hegwe, hamwe na wanhu wa hegwe ne kutulonjela?”
42 Wanhu weng'ha wa Yuda nawawedichila wanhu wa Waisilaeli, “Natudita ahi kwa vila mndewa ka mng'holozetu wa habehi. Lekachoni mwanguzudila kwa chiwalo cha mbuli ayi? Ndaze, natulya chinhu choneche cha mndewa? Ndaze, natiholela chinhu choneche kwa chiwalo cha hetwe?”
43 Aho ndo wanhu wa Isilaeli nawawedichila wanhu wa Yuda, “Twanayo hachi mala kumi kumuwala mndewa Daudi kusinda hemwe. Lekachoni lelo mwangutubeza? Ndaze, hatuwele wa mwaluko kulonga mbuli ya kuwala kumhilula mndewa haluga?” Ila wanhu wa Yuda nawedichila kwa kung'hang'hala ng'hatu kusinda wanhu wa Isilaeli.