8
Waisilaeli wangulanda wapegwe mndewa
1 Samweli loyawele sekulu, nakawawika wanage wawe watagusa hali Isilaeli.
2 Mlelwa wa mwaluko nakachemigwa Yoeli na itagwa lya yula wa keli nalyali Abiya, nawo nawali watagusa ako Beeli-sheba.
3 Ila wanage nahawawinzile nzila za heye. Nawabelenhuka na kuwinza lufufu lwa uhadi, nawabochela chinhu kwa uviso na kwajiliza hachi.
4 Lelo wasekulu weng'ha wa Isilaeli nawating'hana hamwe kuluta kwa Samweli ako Lama.
5 Nawamlonjela, “Ulole, hegwe nakuwa sekulu, wanago hambe wawinze nzila za hegwe, lelo tuwichile mndewa wa kutulongoza kota wanhu wa isi zinji zeng'ha.”
6 Ila hewo lowalonjile, “Utupe mndewa wa kutulongoza,” ali nalimzudiza Samweli, ahyo nakamlanda Mkulu Nguluwi.
7 Mkulu Nguluwi nakamlonjela Samweli, “Uhulichize gala geng'ha gawele wanhu awa gowalingukulonjela, kwa vila nahawakulemile hegwe, ila nawandema heni kuwa mndewa wa hewo.
8 Kota vila vyowaditile kulawa zuwa lila londiwalavile kulawa Misili mbaka zuwa ali lya lehano, kwa kundeka heni na kujikolela mijito milungu jinji, ndo vyowalingukuditila hegwe.
9 Lelo uwahulichize goya na uwazelese gala gowoditilwa na mndewa yalinguya kuwalongoza.”
10 Samweli nakawalonjela wala wanhu wawele wolanda wapegwe mndewa ulonzi weng'ha wa Mkulu Nguluwi.
11 Nakalonga, “Hino ndo vyoyowaditila mndewa yawele yowalongoza. Kowahola wana wa hemwe walume na kuwadita wakole mijito kuli mituka ja heye ja kitowa ngondo na falasi wa heye, nawo wolongola kumwando mwa mituka ja heye kujamila.
12 Naye kowawika kwa heye na wowa wakulu kwa wamizi maelufu na wakulu kwa wamizi makumi gahano. Wanji kowawika wawe wokatula kuli mgunda wa heye na kubeta mbena za heye na kugongomanya vinhu vya kitowa ngondo na vinhu vya mutuka wa heye.
13 Wahinza wa hemwe kowahola na wowa wogongomanya unhunyhililo na wateleka na walingubanika mibumunda.
14 Kohola migunda ja hemwe jinojile na migunda ja hemwe ja mizabibu na migunda ja mizeituni na kuwapa wakola mijito wa heye.
15 Kohola honhu hamwe ha kumi ha nyhule za hemwe na ha zabibu za hemwe na kuwapa vilongozi wa heye na wakola mijito wa heye.
16 Kowahola wakola mijito wa hemwe walume na wadala na wasongolo wa hemwe wanojile na midogowi ja hemwe kwa chiwalo cha heye yuye.
17 Kohola honhu hamwe ha kumi ha vilundo vya hemwe vya ming'holo na mhene na mwemwe baho mowa wapogozi wa heye.
18 Zuwa alyo holifika, molila kwa kugana utanzi kwa chiwalo cha mndewa mumhagule, ila Mkulu Nguluwi howedichila.”
19 Ila wanhu nawalema kumhulichiza Samweli, nawalonga, “Hebu! Twangugana mndewa wa kutulongoza.
20 Hamba towa kota wanhu wa isi zinji zeng'ha, tuwele na mndewa wa kutulongoza na kuluta kumwando kwa hetwe kwa kitowa ngondo kwa chiwalo cha hetwe.”
21 Samweli loyahuliche gala geng'ha gowalonjile wanhu, nakahiluchila kulonga hali Mkulu Nguluwi.
22 Mkulu Nguluwi nakamwidichila Samweli, “Wahulichize na uwape mndewa.” Hamba Samweli nakawalonjela wanhu wa Isilaeli, “Chila yumwe yalute mujini kwa heye.”